Indiramma Insurance: ఇందిరమ్మ కుటుంబ జీవిత బీమా పథకం (Indiramma Kutumba Jeevitha Bima Padhakam – IKJBP) కింద లబ్ధిదారుల నమోదు కోసం రాష్ట్ర ప్రణాళికా శాఖ మార్గదర్శకాలను విడుదల చేసింది. ఈ పథకం ద్వారా ప్రతి కుటుంబానికి రూ.5 లక్షల జీవిత బీమా సౌకర్యం కల్పించనున్నారు. ప్రతి కుటుంబం నుంచి ఒకరికి మాత్రమే బీమా పథకంలో నమోదు చేసుకునే అవకాశం ఉంటుంది. బీమా పొందిన వ్యక్తి మరణించిన సందర్భంలో ఆయన/ఆమె నామినీలకు రూ.5 లక్షల బీమా పరిహారం అందుతుంది. ఒకరి కంటే ఎక్కువ మంది నామినీలను నమోదు చేసుకునేందుకు ప్రభుత్వం అవకాశం కల్పించింది.
సమాజంలోని బలహీన వర్గాలకు ఆర్థిక భద్రత, సామాజిక రక్షణ కల్పించడమే ఈ పథకం ప్రధాన ఉద్దేశం. ప్రస్తుతం ప్రభుత్వం అమలు చేస్తున్న ఇతర బీమా పథకాలను కూడా కొనసాగిస్తూ, వాటన్నింటినీ ఇందిరమ్మ కుటుంబ జీవిత బీమా పథకం పరిధిలోకి తీసుకురావాలని ప్రభుత్వం నిర్ణయించింది.
ప్రతి కుటుంబం నుంచి ఒకరికి మాత్రమే ఈ పథకంలో నమోదు చేసుకునే అర్హత ఉంటుంది. సాధారణంగా కుటుంబం ప్రకటించిన సంపాదించే వ్యక్తికి ప్రాధాన్యత ఉంటుంది. నమోదు చేసుకునే సమయానికి వయస్సు 18 నుంచి 59 సంవత్సరాల మధ్య ఉండాలి. 1967 నవంబర్ 19 నుంచి 2008 నవంబర్ 18 మధ్య జన్మించిన వారు ఈ పథకానికి అర్హులు. వయస్సు నిర్ధారణకు ఆధార్ కార్డులోని పుట్టిన తేదీని ప్రామాణికంగా తీసుకుంటారు. ఆధార్ కార్డులో పుట్టిన సంవత్సరం మాత్రమే నమోదై ఉంటే, సంబంధిత సంవత్సరం జూలై 1వ తేదీని పుట్టిన తేదీగా పరిగణిస్తారు. ఆధార్ కార్డులో పుట్టిన తేదీ తప్పుగా ఉంటే, ముందుగా గుర్తింపు పొందిన ఆధార్ కేంద్రంలో సరిచేసుకున్న తర్వాతే ఈ పథకంలో నమోదు చేసుకోవాలి.
అర్హులైన ప్రతి కుటుంబం సులభంగా ఈ పథకంలో నమోదు చేసుకునేందుకు ప్రభుత్వం ప్రత్యేక నమోదు శిబిరాలను నిర్వహించనుంది. గ్రామీణ ప్రాంతాల్లో గ్రామ పంచాయతీ స్థాయిలో, పట్టణ ప్రాంతాల్లో గుర్తించిన వార్డుల పరిధిలో ఈ శిబిరాలను ఏర్పాటు చేస్తారు. వృద్ధులు, దివ్యాంగులు, ఇతర బలహీన వర్గాల వారికి ప్రత్యేక ఏర్పాట్లు చేయనున్నారు. ఎక్కువ కుటుంబాలు ఉన్న గ్రామ పంచాయతీలు, వార్డుల్లో అవసరాన్ని బట్టి అదనపు శిబిరాలు నిర్వహిస్తారు.
Also Read: తెలంగాణలో బీజేపీ దూకుడు.. వరుసగా 3 రోజులు అగ్రనేతల టూర్లు, షెడ్యూల్ ఇదే!
శిబిరాల నిర్వహణకు సంబంధించి వేదికలు, తేదీలు, బాధ్యతలు చేపట్టే అధికారుల వివరాలను ముందుగానే ఖరారు చేసి ప్రజలకు తెలియజేస్తారు. నమోదు ప్రక్రియ, నామినీ వివరాల నమోదు తదితర అంశాలపై శిక్షణ పొందిన సిబ్బందిని నియమిస్తారు. శిబిరాల్లో కౌంటర్లు, కూర్చునేందుకు సౌకర్యం, తాగునీరు, విద్యుత్, ప్రత్యామ్నాయ విద్యుత్ సరఫరా తదితర ఏర్పాట్లు చేయాలని అధికారులకు సూచించారు. నెల రోజుల పాటు నమోదు కార్యక్రమాన్ని నిర్వహించనున్నారు.
నమోదు శిబిరానికి వచ్చే కుటుంబాలు ఈ క్రింది వివరాలు, పత్రాలను తీసుకురావాలి. ఆధార్ కార్డు, రేషన్ కార్డు, మొబైల్ ఫోన్ నంబర్. రేషన్ కార్డు ఈ-కేవైసీ పెండింగ్లో ఉన్న కుటుంబాలు తమకు కేటాయించిన ప్రజా పంపిణీ వ్యవస్థ (పీడీఎస్) దుకాణంలో ఈ-కేవైసీ ప్రక్రియను పూర్తి చేసుకోవాలి. అదనపు పత్రాలు అవసరమైతే ప్రభుత్వం లేదా సంబంధిత అధికార యంత్రాంగం అధికారికంగా జారీ చేసే సూచనల ద్వారా తెలియజేస్తారు.
నమోదు సమయంలో బీమా పొందే వ్యక్తి, నామినీల వివరాలు, ఒకరి కంటే ఎక్కువ మంది నామినీలను ఎంపిక చేసుకున్నప్పుడు బీమా పరిహారాన్ని వారి మధ్య ఏ విధంగా పంపిణీ చేయాలనే అంశాలను అధికారులు స్పష్టంగా వివరించాలి. లబ్ధిదారుల వివరాలు పూర్తిగా, కచ్చితంగా, ఎలాంటి పునరావృత నమోదు లేకుండా నమోదు చేయాలి. రేషన్ కార్డు నంబరునే దరఖాస్తు ఫారం నంబరుగా పరిగణిస్తారు.
ఇతర జిల్లాకు చెందిన రేషన్ కార్డు కలిగిన కుటుంబాలు తమకు సమీపంలోని నమోదు శిబిరంలో దరఖాస్తు చేసుకోవచ్చు. వారి వివరాలను సంబంధిత స్వస్థల జిల్లా నుంచి సేకరిస్తారు. వివరాల పరిశీలనను స్వస్థల జిల్లాకు చెందిన అధికారులు చేపడతారు. ఒక రేషన్ కార్డుపై ఒక దరఖాస్తుకు మాత్రమే అనుమతి ఉంటుంది. తెలంగాణ రాష్ట్రంలో జారీ చేసిన రేషన్ కార్డుల ఆధారంగానే నమోదు ప్రక్రియ చేపడతారు. ఒకసారి నమోదు చేసుకున్న బీమా లబ్ధిదారుడికి బీమా రక్షణ ప్రారంభమైన తేదీ నుంచి సంబంధిత పాలసీ సంవత్సరం ముగిసే వరకు పూర్తి బీమా రక్షణ ఉంటుంది. ఈ కాలంలో లబ్ధిదారుడు గరిష్ఠ వయోపరిమితిని దాటినా, ఆ పాలసీ సంవత్సరం ముగిసే వరకు బీమా రక్షణ కొనసాగుతుంది.
Also Read: జియో యూజర్లకు బంపర్ ఆఫర్.. రూ.450 రీఛార్జ్తో ఫ్రీ జియో హాట్స్టార్, ఏడాది పాటు కాన్వా ప్రో లైట్!
శిబిరాల ద్వారా నమోదు చేయడం వల్ల దరఖాస్తుదారులకు నేరుగా అధికారులతో మాట్లాడే అవకాశం ఉంటుంది. వివరాలను పరిశీలించడం, సందేహాలను నివృత్తి చేయడం, అవసరమైన సమాచారాన్ని అక్కడికక్కడే సరిచేసుకోవడం వంటి సౌకర్యాలు అందుబాటులో ఉంటాయి. నమోదు సమయంలో కుటుంబం ఇప్పటికే ప్రభుత్వం అమలు చేస్తున్న ఇతర బీమా పథకాల ద్వారా పొందుతున్న బీమా సౌకర్యాల వివరాలను కూడా దరఖాస్తులో నమోదు చేస్తారు. కుటుంబ సభ్యులకు నమోదు చేసిన వివరాలను చూపించి, బీమా పొందే వ్యక్తి, నామినీల వివరాలను ధ్రువీకరించుకోవాలని సూచిస్తారు.
నామినీల పేర్లు ఆన్లైన్ వ్యవస్థలో ఇప్పటికే నమోదై ఉన్న కుటుంబ సభ్యుల జాబితా నుంచి ఎంపిక చేసుకునే అవకాశం ఉంటుంది. ఒకరి కంటే ఎక్కువ మంది నామినీలను ఎంపిక చేసుకోవాలనుకుంటే, బీమా పరిహారంలో ప్రతి ఒక్కరికి ఎంత శాతం వాటా కేటాయించాలనే విషయాన్ని బీమా పొందే వ్యక్తి ప్రకటించిన మేరకు అధికారులు నమోదు చేస్తారు. ఈ వాటాలు పూర్తి సంఖ్యలో శాతాల రూపంలో ఉండాలి. మొత్తం వాటా 100 శాతానికి మించకూడదు. ప్రతి నామినీకి సంబంధించిన పేరు, బీమా పొందే వ్యక్తితో ఉన్న సంబంధం, వయస్సు లేదా పుట్టిన తేదీ వివరాలను నమోదు చేయాలి.
నామినీలలో ఎవరైనా మైనర్ (18 ఏళ్లలోపు వారు) అయితే, వారి తరఫున బీమా పరిహారాన్ని స్వీకరించేందుకు ఒక మేజర్ (18 ఏళ్లు నిండిన వ్యక్తి) పేరును అపాయింటీగా నమోదు చేయాలి. ఒకరి కంటే ఎక్కువ మంది మైనర్ నామినీలు ఉన్నా అనుమతిస్తారు. అపాయింటీగా నమోదు చేసే వ్యక్తి కుటుంబ సభ్యుడే అయి ఉండాల్సిన అవసరం లేదు. విజయవంతంగా నమోదు పూర్తయిన ప్రతి లబ్ధిదారుడికి లావాదేవీ గుర్తింపు సంఖ్య (ట్రాన్సాక్షన్ ఐడీ)తో కూడిన రసీదు సందేశం పంపిస్తారు. నమోదు సమయంలో వివరాల్లో తేడాలు, సాంకేతిక సమస్యలు లేదా ఇతర సందేహాలు ఎదురైతే, వాటి కారణంగా ఏ కుటుంబాన్నీ వెనక్కి పంపకూడదు. సమస్యను పరిష్కరించుకునేందుకు అవసరమైన మార్గదర్శకాలను అధికారులు అందించాలి.
ప్రతి నమోదు శిబిరంలో ఫిర్యాదులు, సందేహాలు, వివరాల్లో తేడాలు, ఇతర ప్రత్యేక సమస్యలను పరిష్కరించేందుకు ప్రత్యేక హెల్ప్డెస్క్ లేదా బాధ్యతాయుత అధికారిని నియమించాలి. ప్రతి ఫిర్యాదు లేదా సమస్యకు సంబంధించిన వివరాలు, కుటుంబ గుర్తింపు సమాచారం, ఫిర్యాదు అందిన తేదీ, బాధ్యత వహించే అధికారి, తీసుకున్న చర్యలను రికార్డుల్లో నమోదు చేయాలి. సమస్యను పరిష్కరించుకునేందుకు అవసరమైన చర్యలు, ఎవరిని సంప్రదించాలి అనే విషయాలను సంబంధిత కుటుంబాలకు స్పష్టంగా తెలియజేయాలి.
పరిష్కారం కాని సమస్యలను రోజువారీ జిల్లా స్థాయి సమీక్షలో పరిశీలించాలి. రాష్ట్ర స్థాయిలో స్పష్టత అవసరమైన అంశాలను సంబంధిత ఉన్నతాధికారుల దృష్టికి తీసుకెళ్లాలి. కుటుంబానికి సంబంధించిన సమాచారం అందుబాటులో లేకపోయినా, లేదా వివరాల్లో మార్పులు, సవరణలు అవసరమైనా, సరైన మార్గదర్శకత్వం ఇవ్వకుండా ఏ కుటుంబాన్నీ నమోదు శిబిరం నుంచి వెనక్కి పంపకూడదని ప్రభుత్వం స్పష్టం చేసింది.
Also Read: కాంగ్రెస్లో ప్రజాస్వామ్యం ఎక్కువైంది.. ఆ ఇద్దరు ఎమ్మెల్యేల వ్యాఖ్యలపై అధిష్టానం సీరియస్ ఫోకస్!