Kalvakuntla Kavitha: బీఆర్ఎస్ – బీజేపీ పొత్తు బహిర్గతం.. మున్సిపల్ ఎన్నికలే సాక్ష్యం, కవిత సంచలనం

అంగన్ వాడీ కేంద్రాల నిర్వహణలో రాజకీయ జోక్యాన్ని పెంచేలా ప్రభుత్వం తీసుకొచ్చిన జీవోను వెంటనే వెనక్కి తీసుకోవాలని తెలంగాణ జాగృతి అధ్యక్షురాలు కల్వకుంట్ల కవిత డిమాండ్ చేశారు. మహిళా శిశు సంక్షేమ శాఖ పరిధిలో ఉన్న అంగన్ వాడీలను గ్రామ పంచాయతీల కిందకు తీసుకురావడం సరికాదని ఆమె స్పష్టం చేశారు. అంగన్ వాడీ టీచర్లు ప్రభుత్వానికి వెన్నుముకగా నిలుస్తున్నారని కొనియాడారు. గర్భిణులు అలాగే చిన్న పిల్లలకు పౌష్టికాహారాన్ని అందిస్తూ కీలక పాత్ర పోషిస్తున్న వారిపై ఒత్తిడి పెంచవద్దని కోరారు. ఆరు నుండి తొమ్మిది నెలలుగా వేతనాలు నిలిపివేయడం అన్యాయమని మండిపడ్డారు. సంక్షేమ పథకాల కోసం అంగన్ వాడీలు ఇంకా ఆశా కార్యకర్తల జీతాలను ఆపడం ప్రభుత్వ అసమర్థతకు నిదర్శనమని ధ్వజమెత్తారు. ఎన్నికల సమయంలో ఇచ్చిన హామీ ప్రకారం వెంటనే వారికి జీతాలు పెంచాలని డిమాండ్ చేశారు.

రాష్ట్రంలో బీఆర్ఎస్ ఇంకా బీజేపీ పార్టీల మధ్య ఉన్న అంతర్గత పొత్తు మున్సిపల్ ఎన్నికల ద్వారా బయటపడిందని కవిత సంచలన వ్యాఖ్యలు చేశారు. కరీంనగర్ తో పాటు నారాయణపేటలో బీఆర్ఎస్ గైర్హాజరు కావడం వల్లే బీజేపీకి పదవులు దక్కాయని వివరించారు. ఈ రెండు పార్టీల మధ్య ఉన్న అవగాహన మున్సిపల్ చైర్మన్ ఎన్నికలతో తేటతెల్లమైందన్నారు. తన గత వ్యాఖ్యలు నిజమని నేడు రుజువైందని ఆమె పేర్కొన్నారు.

ALSO READ: Telangana Govt: త్వరలో మూడు కార్పొరేషన్ల ఎన్నికలు.. కసరత్తు మొదలుపెట్టిన సర్కారు

మహిళలకు నెలకు రూ. 2,500 ఆర్థిక సాయం అలాగే పెన్షన్ల పెంపుతో పాటు కళ్యాణలక్ష్మి కింద తులం బంగారం ఇవ్వాలని డిమాండ్ చేస్తూ కవిత నేతృత్వంలో తెలంగాణ జాగృతి బృందం బేగంపేటలోని మహాత్మా జ్యోతిరావు ఫూలే ప్రజాభవన్ ను ముట్టడించింది. భారీ సంఖ్యలో తరలివచ్చిన మహిళలతో ఆ ప్రాంతం ఉద్రిక్తంగా మారింది. పోలీసులు ఆందోళనకారులను అడ్డుకోవడంతో తోపులాట జరిగింది. అనంతరం పోలీసులు కవితను ఇతర నాయకులను లోపలికి అనుమతించారు. ప్రజావాణి స్పెషల్ ఆఫీసర్ దివ్యా దేవరాజన్ ను కలిసి డిమాండ్లతో కూడిన వినతిపత్రాన్ని అందజేశారు. ప్రభుత్వం ప్రవేశపెట్టే పూర్తిస్థాయి బడ్జెట్ లో మహిళల పథకాలకు నిధులు కేటాయించాలని గట్టిగా కోరారు.

రైతులకు కేవలం సన్నవడ్లకే బోనస్ ఇస్తూ ప్రభుత్వం మోసం చేస్తోందని విమర్శించారు. ఎన్నికల హామీలను నెరవేర్చడంలో కాంగ్రెస్ వైఫల్యం చెందిందని ఆరోపించారు. రాష్ట్రవ్యాప్తంగా మహిళలు అలాగే యువతకు ఇచ్చిన మాట నిలబెట్టుకోకపోతే రానున్న రోజుల్లో అసెంబ్లీతో పాటు సెక్రటేరియట్ ను ముట్టడిస్తామని హెచ్చరించారు. ప్రజాభవన్ లో తమ కార్యకర్తల పట్ల పోలీసులు వ్యవహరించిన తీరును తప్పుబట్టారు. అరెస్టులతో ఉద్యమాన్ని ఆపలేరని స్పష్టం చేశారు. బడ్జెట్ సమావేశాల నాటికి ప్రభుత్వంపై ఒత్తిడి పెంచేలా రాష్ట్రవ్యాప్తంగా నిరసనలు చేపడతామని కల్వకుంట్ల కవిత ప్రకటించారు.

ALSO READ: Minister Seethakka: గ్రామాల అభివృద్ధిలో సర్పంచులదే కీలకపాత్ర.. మంత్రి సీతక్క కీలక వ్యాఖ్యలు