Telangana Liberation Day: పరేడ్ గ్రౌండ్‌లో విమోచన దినోత్సవ వేడుకలు.. అమరవీరులకు నివాళులర్పించిన కేంద్రమంత్రులు

Telangana Liberation Day: తెలంగాణ రాష్ట్రంలో సెప్టెంబర్ 17 తేదీ చారిత్రాత్మక ప్రాముఖ్యత కలిగిన రోజు. 1948 సెప్టెంబర్ 17న, భారత స్వాతంత్ర్యం తర్వాత 13 నెలల పాటు నిజాం ఒస్మాన్ అలీఖాన్ పాలనలో ఉన్న హైదరాబాద్ రాజ్యం భారత యూనియన్‌లో విలీనమైంది. ఈ ఘటనను పోలీస్ యాక్షన్ ద్వారా సర్దార్ వల్లభ్‌భాయ్ పటేల్ నాయకత్వంలో భారత సైన్యం సాధించింది. ఈ రోజు తెలంగాణ ప్రజలు నిజాం రాజకీయాలు, రజాకార్ల అత్యాచారాల నుంచి విముక్తి పొందారు. ఈ చారిత్రక ఘట్టాన్ని గుర్తించి, వివిధ పార్టీలు, ప్రభుత్వాలు ఈ తేదీని విభిన్న పేర్లతో జరుపుకుంటున్నాయి. అలాగే ఈ సంవత్సరం కూడా నేడు ‘తెలంగాణ ప్రజా పాలన దినోత్సవం’గా ఘనంగా నిర్వహించింది.

1947 ఆగస్టు 15న భారత దేశం స్వాతంత్ర్యం పొందినప్పటికీ, హైదరాబాద్ రాజ్యం నిజాం పాలనలోనే ఉండిపోయింది. నిజాం పాకిస్తాన్‌తో విలీనం కోరుకున్నాడు, కానీ భారత ప్రభుత్వం దాన్ని అంగీకరించలేదు. 1948 సెప్టెంబర్ 13 నుంచి 17 వరకు జరిగిన ‘పోలీసు చర్య’లో భారత సైన్యం హైదరాబాద్‌ను విముక్తి చేసింది. ఈ పోరాటంలో ఆంధ్ర మహాసభ, కమ్యూనిస్ట్ పార్టీలు, సామాన్య ప్రజలు పోరాడారు. ఈ రోజు తెలంగాణ చరిత్రలో ‘విమోచన దినోత్సవం’గా, ‘విలీన దినోత్సవం’గా పిలువబడుతుంది. గతంలో బీఆర్ఎస్ ప్రభుత్వం దీనిని ‘జాతీయ సమైక్యతా దినోత్సవం’గా జరుపుకుంది. కేంద్ర బీజేపీ ప్రభుత్వం 2023 నుంచి ‘హైదరాబాద్ విమోచన దినోత్సవం’గా ప్రకటించి, గెజిట్‌లో విడుదల చేసింది. ఈ రోజు ప్రధానమంత్రి మోదీ జన్మదినం, విశ్వకర్మ దినోత్సవంతో కలిసి జరుగుతుంది.

నేడు సికింద్రాబాద్ పోలీస్ పరేడ్ గ్రౌండ్‌లో హైదరాబాద్ లిబరేషన్ డే వేడుకలకు హాజరైన కేంద్రమంత్రి రాజ్‌నాథ్ సింగ్.. జాతీయ జెండాను ఆవిష్కరించారు. కేంద్ర సాంస్కృతిక, పర్యాటకశాఖ ఆధ్వర్యంలో రాష్ట్ర విమోచన దినోత్సవాన్ని నిర్వహిస్తుంది బీజేపీ. పోలీస్ అమరవీరులకు నివాళులర్పించిన కేంద్రమంత్రి.. అనంతరం పరేడ్‌లో పాల్గొని పోలీసుల గౌరవ వందనం స్వీకరించారు.

తెలంగాణ శాసనసభలో స్పీకర్ గడ్డం ప్రసాద్ కుమార్ జాతీయ జెండాను ఘనంగా ఎగురవేశారు. శాసన మండలిలో చైర్మన్ గుత్తా సుఖేందర్ రెడ్డి కూడా జెండా ఆవిష్కరణ చేశారు. ఈ కార్యక్రమాలు ఉదయం నుంచి జరిగి, శాసనసభ సభ్యులు, అధికారులు పాల్గొన్నారు. స్పీకర్ ప్రసాద్ మాట్లాడుతూ, తెలంగాణ ప్రజల త్యాగాలను గుర్తుచేసి, ప్రజా పాలనకు కట్టుబడి ఉండాలని పిలుపునిచ్చారు.

హైదరాబాద్‌లోని పబ్లిక్ గార్డెన్స్లో ఉదయం 10 గంటలకు ముఖ్య కార్యక్రమం జరిగింది. ముఖ్యమంత్రి ఎ. రేవంత్ రెడ్డి హాజరై, జాతీయ జెండాను ఎగురవేశారు. ఈ సందర్భంగా రేవంత్ రెడ్డి మాట్లాడుతూ, “సెప్టెంబర్ 17ను కొందరు వివాదాస్పదం చేయడం క్షమించరు. ఇది తెలంగాణలో ప్రజా పాలన ప్రారంభమైన రోజు. నిజాంను మట్టికరిపించిన చరిత్ర మనది” అని అన్నారు. ఆయన ప్రజల ఐక్యతను, ప్రభుత్వ కార్యక్రమాలను ప్రస్తావించారు. కార్యక్రమంలో మంత్రులు, శాసనసభ్యులు, ప్రజలు పాల్గొన్నారు. ఈ రోజు నుంచి 3,159 వైద్య శిబిరాలు ప్రారంభమయ్యాయి. అంతేకాకుండా నదీ జలాల వాటా విషయంలో రాజీపడే ప్రసక్తి లేదన్నారు సీఎం రేవంత్ రెడ్డి. పబ్లిక్ గార్డెన్‌లో తెలంగాణ ప్రజా పాలన దినోత్సవంలో ఈ వ్యాఖ్యలు చేశారు. కృష్ణా జలాల్లో ప్రతి చుక్క నీటిపై పక్కా హక్కులు సాధించే దిశగా ప్రభుత్వం పోరాటానికి సిద్ధమవుతుందన్నారు. కృష్ణా జలాల్లో రావాల్సిన వాటాను పక్కా ప్రణాళికతో సాధించుకుంటామని తెలిపారు.

Also Read: అటు క్లాస్.. ఇటు మాస్.. జూబ్లీహిల్స్‌లో బైపోల్‌లో హైవోల్టేజ్!

రాష్ట్రవ్యాప్తంగా 33 జిల్లాల్లో జెండా ఆవిష్కరణలు, సాంస్కృతిక కార్యక్రమాలు జరిగాయి. ఖమ్మంలో ఉపముఖ్యమంత్రి మల్లు భట్టి విక్రమార్క పరేడ్ గ్రౌండ్‌లో పాల్గొన్నారు. నిర్మల్‌లో గౌరవ అదనపు కలెక్టర్ ఫైజాన్ అహ్మద్ సఖి కేంద్రంలో జెండా ఎగురవేశారు. రామచంద్రాపురంలో కార్పొరేటర్ పుష్ప నాగేష్‌లు GHMC కార్యాలయంలో కార్యక్రమం నిర్వహించారు. పెద్దపల్లిలో ఎమ్మెల్యే చింతకుంట విజయరామనారాయణ శుభాకాంక్షలు తెలిపారు.