భవిష్యత్‌లో తెలంగాణకు బీసీయే సీఎం.. క్లారిటీ ఇచ్చిన మహేష్ కుమార్ గౌడ్!

BC Rights: బీసీ ప్రయోజనాల కోసం కాంగ్రెస్ నిరంతరం పోరాడుతూనే ఉంటుందని టీపీసీసీ చీఫ్ మహేష్ కుమార్ గౌడ్ తెలిపారు. బీసీల హక్కుల కోసం మాట్లాడే ధైర్యాన్ని కాంగ్రెస్ అగ్రనేత రాహుల్ గాంధీ ఇచ్చారని, ఆయన, మల్లికార్జున ఖర్గేల ఆశీస్సులతో భవిష్యత్ రోజుల్లో తెలంగాణకు బీసీ వ్యక్తి ముఖ్యమంత్రి కావడం ఖాయమని పీసీసీ చీఫ్ స్పష్టం చేశారు.

జనాభా ప్రకారం వాటా..

రాహుల్ గాంధీ చేపట్టిన ‘భారత్ జోడో యాత్ర’లో ప్రకటించిన ‘‘జనాభా ప్రకారం వాటా రావాలి” అనే నినాదానికి కట్టుబడి ఉన్నామని తెలిపారు. బీసీలకు రావాల్సిన వాటాను గౌరవంగా తీసుకుంటామని, అవసరమైతే పోరాడి లాక్కుంటామని హెచ్చరించారు. కేంద్రంలో అధికారంలో ఉన్న మోదీ ప్రభుత్వం బీసీలను దారుణంగా వంచిస్తోందని మహేష్ కుమార్ గౌడ్ తీవ్రస్థాయిలో ధ్వజమెత్తారు.

వారంతా దద్దమ్మలు..

కేంద్రం చేపడుతున్న సర్వే ఫారమ్‌లో ఎస్సీ, ఎస్టీ కాలమ్‌లను ఉంచి, ఓబీసీ కాలమ్‌ను ఎత్తివేసారని మండిపడ్డారు. తెలంగాణలో బీసీల హక్కుల కోసం ప్రధాని మోదీ, అమిత్ షాల వద్ద మాట్లాడే ధైర్యం రాష్ట్ర బీజేపీ ఎంపీలు, ఎమ్మెల్యేలకు లేదని, వారంతా దద్దమ్మలని విమర్శించారు. మోదీది రాతి గుండె అని, ఆయన గద్దె దిగే సమయం ఆసన్నమైందని వ్యాఖ్యానించారు.

Also read: బిగ్ బాస్ 10 నరేష్ ఫస్ట్ రెమ్యూనరేషన్ ఎంతో తెలుసా? వంద నుంచి లక్షల వరకూ!