Revanth Reddy: తెలంగాణ రాజకీయాల్లో మరోసారి తీవ్ర దుమారం రేగింది. ‘తెలంగాణ భవన్’కు వెళ్తామంటూ సవాల్ విసిరి, తీరా గన్ పార్క్ వద్దకు వచ్చాక వెనక్కి తగ్గడంపై కాంగ్రెస్ వర్గాల్లో పెను కలకలం సృష్టించింది. తాజా పరిణామాలపై ముఖ్యమంత్రి రేవంత్ రెడ్డి తన మంత్రివర్గ సహచరులపై తీవ్ర ఆగ్రహం వ్యక్తం చేసినట్లు తెలుస్తోంది. సవాల్ విసిరిన తర్వాత వెనకడుగు వేయడం వల్ల పార్టీ ప్రతిష్ట మసకబారుతుందని, పైగా ప్రత్యర్థి బీఆర్ఎస్ పార్టీకి రాజకీయంగా అస్త్రం ఇచ్చినట్లయిందని సీఎం మంత్రులకు గట్టిగానే క్లాస్ పీకారు.
గన్ పార్క్ వద్ద అసలేం జరిగింది?
నిజానికి, బీఆర్ఎస్ నేతలతో సవాల్ ప్రతిసవాళ్ల నేపథ్యంలో కాంగ్రెస్ మంత్రులు కొందరు గన్ పార్క్ అమరవీరుల స్థూపం వద్దకు చేరుకున్నారు. అక్కడ అమరవీరులకు నివాళులర్పించి, నేరుగా బీఆర్ఎస్ ప్రధాన కార్యాలయమైన తెలంగాణ భవన్కు వెళ్తామని ప్రకటించారు. అయితే, గన్ పార్క్ వద్ద కొంత సమయం వేచి చూసిన మంత్రులు, బీఆర్ఎస్ నాయకులు రాకపోవడంతో అక్కడి నుంచి వెనుదిరిగారు. ఇదే ఇప్పుడు రేవంత్ రెడ్డి ఆగ్రహానికి కారణమైంది. “బీఆర్ఎస్ నేతలు వచ్చే వరకు అక్కడే ఎందుకు వేచి ఉండలేదు? అంత తొందరగా వెళ్ళిపోవాల్సిన అవసరం ఏమొచ్చింది?” అంటూ సీఎం మంత్రులను నిలదీసినట్లు సమాచారం.
సెల్ఫ్ డిఫెన్స్లో కాంగ్రెస్.. ముఖ్యమంత్రి అసంతృప్తి!
ఈ వ్యూహాత్మక తప్పిదం వల్ల కాంగ్రెస్ పార్టీ అనవసరంగా ఆత్మరక్షణలో పడిపోయిందని సీఎం రేవంత్ రెడ్డి అభిప్రాయపడ్డారు. బీఆర్ఎస్ నేతలు వచ్చే వరకు గన్ పార్క్ వద్దే కూర్చుని ఉంటే రాజకీయంగా కాంగ్రెస్ మైలేజ్ పెరిగేదని, కానీ మధ్యలోనే వచ్చేయడం వల్ల ప్రజల్లోకి తప్పుడు సంకేతాలు వెళ్లాయని ఆయన మంత్రులకు వివరించారు. ఒక వైపు తాము దూకుడుగా వెళ్తుంటే, మంత్రుల అనాలోచిత నిర్ణయాల వల్ల ప్రతిపక్షానికి విమర్శలు చేసే అవకాశం దక్కిందని సీఎం అసంతృప్తి వ్యక్తం చేశారు.
సవాల్ చేస్తే వెనక్కి తగ్గొద్దు: రేవంత్ రెడ్డి క్లాస్
రాజకీయాల్లో ఒకసారి సవాల్ విసిరిన తర్వాత దానికి కట్టుబడి ఉండాలని, అప్పుడే ప్రజల్లో నమ్మకం ఉంటుందని సీఎం రేవంత్ రెడ్డి మంత్రులకు స్పష్టం చేశారు. భవిష్యత్తులో ఇలాంటి గందరగోళ పరిస్థితులకు తావివ్వద్దని, ఏ నిర్ణయమైనా పక్కా వ్యూహంతోనే అమలు చేయాలని ఆదేశించారు. ఈ పరిణామంతో అప్రమత్తమైన కాంగ్రెస్ శ్రేణులు, బీఆర్ఎస్ విమర్శలను తిప్పికొట్టేందుకు కొత్త వ్యూహాలకు పదును పెడుతున్నాయి. రానున్న రోజుల్లో ఈ సవాల్ రాజకీయం మరెన్ని మలుపులు తిరుగుతుందో చూడాలి.
Also Read: ఒకరిది ‘మర్డర్ ప్లాన్’.. మరొకరిది ‘బొందపెట్టే ప్లాన్’.. మెట్రోలో ‘కౌంటర్’ అదిరిందిగా!
Share
ఫిర్యాదు చేసేదాకా కాదు.. ముందే అడ్డుకోండి.. టెలిగ్రామ్కు కేంద్రం హెచ్చరిక!
బ్యాంకు ఉద్యోగి దొంగగా మారితే?...పృథ్వీరాజ్ సుకుమారన్ ‘ఐ, నోబడీ’ రిలీజ్ డేట్ ఫిక్స్!
