Congress PAC: తెలంగాణ రాజకీయాల్లో వేడి పెరుగుతోంది. టీపీసీసీ అధ్యక్షుడు మహేష్ కుమార్ గౌడ్ వ్యాఖ్యలు రాష్ట్ర వ్యాప్తంగా చర్చనీయాంశంగా మారాయి. హైదరాబాద్‌లో జరిగిన కాంగ్రెస్ పొలిటికల్ అఫైర్స్ కమిటీ (PAC) సమావేశంలో ఆయన మాట్లాడుతూ, దేశంలో ఓటు చోరీ పెద్ద ఎత్తున జరిగిందని, దాని వలననే బీజేపీ మూడోసారి అధికారంలోకి వచ్చిందని ధ్వజమెత్తారు. ఈ అంశంపై రాహుల్ గాంధీ ఇప్పటికే పూర్తి వివరాలను ప్రజలకు అందజేశారని, రాష్ట్ర స్థాయిలో కూడా ఈ ఉద్యమాన్ని విస్తృతంగా చర్చించి, ప్రజల్లో అవగాహన కల్పించాల్సిన అవసరం ఉందని ఆయన స్పష్టం చేశారు.
మహేష్ గౌడ్ మాట్లాడుతూ.. ప్రజల్లో ఓటు చోరీ గురించి అవగాహన కల్పించి, ప్రతి ఇంటికి ఈ సందేశం చేరేలా కృషి చేయాలి. ఈ దిశగా పార్టీ శ్రేణులు బలంగా పనిచేయాలి. రాహుల్ గాంధీ దేశ వ్యాప్తంగా ఈ సమస్యపై ఆందోళనను మొదలుపెట్టారు. ఇప్పుడు తెలంగాణలో కూడా ఈ ఉద్యమాన్ని వేగంగా ముందుకు తీసుకెళ్లాలని పిలుపునిచ్చారు.
ఇదే సమయంలో రాష్ట్ర ప్రభుత్వ పనితీరుపై మహేష్ గౌడ్ ప్రత్యేకంగా ప్రస్తావించారు. ఆయన మాట్లాడుతూ, రాష్ట్రంలో ప్రజా పాలన అద్భుత ఫలితాలు ఇస్తోంది. రైతు భరోసా, రుణమాఫీ, రేషన్ కార్డులు, ఇందిరమ్మ ఇళ్లు, సన్న బియ్యం పంపిణీ వంటి సంక్షేమ పథకాలు ప్రజల్లో విశేషమైన స్పందన తెచ్చాయి. ముఖ్యంగా రైతులు, బీసీ వర్గాల నుంచి ప్రభుత్వం చేపడుతున్న కార్యక్రమాలకు పెద్ద మద్దతు లభిస్తోందని చెప్పారు.
పార్టీ ఆధ్వర్యంలో చేపట్టిన పాదయాత్రల గురించి కూడా మహేష్ గౌడ్ ప్రస్తావించారు. టీపీసీసీ ఆధ్వర్యంలో చేపట్టిన పాదయాత్రకు ప్రజల నుంచి అద్భుతమైన స్పందన వస్తోంది. ప్రజలు కాంగ్రెస్ పట్ల ఆశతో ఎదురుచూస్తున్నారు. ఈ ఉత్సాహాన్ని స్థానిక సంస్థల ఎన్నికల్లో ఘన విజయంగా మలచుకోవాలని అన్నారు.
స్థానిక సంస్థల ఎన్నికల ప్రాధాన్యత
సమావేశంలో రాబోయే స్థానిక సంస్థల ఎన్నికలపై కూడా చర్చ జరిగింది. బీసీలకు 42 శాతం రిజర్వేషన్లు అమలుపై ముఖ్యంగా చర్చ సాగింది. మహేష్ గౌడ్ మాట్లాడుతూ, బీసీ రిజర్వేషన్ల అమలు ద్వారా పార్టీ బలాన్ని మరింతగా పెంచుకోవచ్చు. ఈ అవకాశాన్ని సద్వినియోగం చేసుకోవాలన్నారు. అలాగే జూబ్లీహిల్స్ అసెంబ్లీ ఉప ఎన్నికలను ప్రతిష్టాత్మకంగా తీసుకోవాలని, దానికోసం పూర్తి స్థాయి వ్యూహరచన చేయాలని సూచించారు.
Also Read: Vizag iconic spots: కైలాసగిరి పై కొత్త అద్భుతం.. పర్యాటకులకు హైలైట్ స్పాట్ ఇదే!
రాష్ట్రంలో యూరియా కొరతపై దుష్ప్రచారం
మహేష్ గౌడ్ వ్యాఖ్యల్లో మరో ముఖ్యాంశం యూరియా కొరతపై బీఆర్‌ఎస్ చేస్తున్న దుష్ప్రచారం. ఆయన మాట్లాడుతూ, రాష్ట్రంలో యూరియా కొరత అంటూ బీఆర్‌ఎస్ ప్రజల్లో భయాందోళనలను సృష్టించే ప్రయత్నం చేస్తోంది. కానీ ఇది పూర్తిగా అవాస్తవం. రైతులు మోసపోవద్దు. ప్రభుత్వం సమయానికి ఎరువులు అందిస్తోందని స్పష్టం చేశారు.
ఓటు చోరీ ప్రచార లోగో ఆవిష్కరణ
ఈ PAC సమావేశంలో సీఎం రేవంత్ రెడ్డి కూడా కీలక నిర్ణయాలు తీసుకున్నారు. ఆయన ఓటు చోరీపై అవగాహన కల్పించే ప్రచార లోగోను ఆవిష్కరించారు. ఈ లోగో ద్వారా గ్రామాల నుంచి పట్టణాల వరకు ప్రచారాన్ని విస్తరించేందుకు ప్రణాళికలు సిద్ధం చేస్తున్నారు. అదనంగా, రాష్ట్రంలోని వివిధ కార్పొరేషన్‌లకు త్వరలో కొత్త చైర్మన్లను నియమించనున్నట్లు సీఎం రేవంత్ ప్రకటించారు.
PACలో చర్చించిన ఏడు అంశాలు
సమావేశంలో మొత్తం ఏడు అంశాలను చర్చించారు. ముఖ్యంగా స్థానిక సంస్థల ఎన్నికల వ్యూహం, ఓటు చోరీపై రాష్ట్ర వ్యాప్తంగా ప్రచారం, బీసీ రిజర్వేషన్ల అమలు, కార్పొరేషన్ చైర్మన్ల నియామకం, రాబోయే ఉప ఎన్నికల ప్రణాళికలు వంటి అంశాలు ప్రాధాన్యం సంతరించుకున్నాయి. అలాగే, ఉపరాష్ట్రపతి అభ్యర్థిగా జస్టిస్ సుదర్శన్ రెడ్డి ఎంపికపై PAC హర్షం వ్యక్తం చేసింది. ఇది కాంగ్రెస్ పార్టీకి గౌరవకరమైన ఘట్టంగా భావించబడుతోంది.
కాంగ్రెస్ PAC సమావేశం రాష్ట్ర రాజకీయ దిశను నిర్ణయించేలా సాగింది. ఓటు చోరీ అంశంపై ప్రజల్లో చైతన్యం కల్పించడం, స్థానిక సంస్థల ఎన్నికల్లో బలమైన వ్యూహరచన, రైతులు, బీసీ వర్గాలను మరింతగా ఆకర్షించే విధానాలు తదితర అంశాలపై ఈ సమావేశంలో చర్చ జరగడం రాష్ట్ర కాంగ్రెస్ దూకుడు పెరుగుతోందనే సంకేతాలిస్తున్నాయి.
Share
OTT Movie : బాబా భాస్కర్ అరాచకం... వయోలెన్స్ తో పాటు ఆ సీన్లు కూడా... ఇంత ఓపెన్ గా చూపించారేంటి భయ్యా ?
Priyanka Chopra: బాలీవుడ్ పై గ్లోబల్ బ్యూటీ అసహనం.. ఆ మార్పు రావాలంటూ?
