ఆటగాళ్ల సెలెక్షన్ అంతా ఉత్తుత్తిదే.. హెచ్‌సీఎ లీడర్ల గుట్టు రట్టు చేసిన టీసీఏ!

HCA Scam: స్వేచ్ఛ బ్యూరో: హైదరాబాద్ క్రికెట్​ అసోసియేషన్​ (హెచ్​సీఏ)పై తెలంగాణ క్రికెట్​ అసోసియేషన్ తీవ్రస్థాయిలో ధ్వజమెత్తింది. అక్రమాలకు అడ్డాగా మారిన హెచ్​సీఏను రద్దు చేయటంతోపాటు నకిలీ సొసైటీ, ఎన్నికల రిగ్గింగ్, టీజీ2‌‌0 వేలం స్కాంపై సీఐడీ విచారణ జరిపించాలని డిమాండ్ చేసింది. అసలు, హెచ్​సీఏ అక్రమాలపై సిట్​ ఏర్పాటు చేయాలని హైకోర్టు ఆదేశాలు జారీ చేసినా ఇంతవరకు ఎందుకు ఏర్పాటు చేయాలని ప్రశ్నించింది. టీసీఏ ప్రధాన కార్యదర్శి దారం గురువారెడ్డి మీడియా సమావేశంలో మాట్లాడుతూ వంద కోట్ల రూపాయల టీజీ2‌‌0 నిధులను మళ్లించటానికి హెచ్​సీఏ కుట్రలు చేస్తోందని ఆరోపించారు. బీసీసీఐ అనుమతి లేకుండా, చట్టవిరుద్ధంగా టీజీ2‌‌0 గవర్నింగ్​ కౌన్సిల్ ను హెచ్​సీఏ ఎలా ఏర్పాటు చేస్తుందని ప్రశ్నించారు.

హెచ్​సీఏలో జరిగిన అక్రమాలపై..

ఫోర్జరీ, టీజీ2‌‌0 ఫ్రాంచైజీల వేలం జరుపుతూ హెచ్​సీఏ క్రికెట్​ ను అభివృద్ది చేయటం లేదని కార్టెల్​ మాఫియాలా వ్యవహరిస్తోందని మండిపడ్డారు. హెచ్​సీఏలో జరిగిన అక్రమాలపై సీఐడీలో ఇప్పటికే కేసులు నమోదై ఉన్నట్టు చెప్పారు. 2025, జూలై 9న ఈ కేసులో అరెస్టులు కూడా జరిగాయన్నారు. హెచ్​సీఏ పనితీరును పర్యవేక్షించటానికి హైకోర్టు జూలై నుంచి రిటైర్డ్​ జస్టిస్​ నవీన్​ రావును నియమించిన విషయాన్ని గుర్తు చేశారు. అయినా, పాలనా నియమాలను బేఖాతరు చేస్తూ అక్రమ కమిటీలు, నియామకాలు, ఆర్థిక నిర్ణయాలను హెచ్​సీఏ తీసుకుంటోందని చెప్పారు.

ఇదిగో నిదర్శనం..

ఆక్స్​ ఫర్ద్​ బ్లూస్​ క్రికెట్​ క్లబ్​ కు సంబంధించి ఓ షాకింగ్​ మోసం వెలుగు చూసినట్టు చెప్పారు. రంగారెడ్డి జిల్లా రిజిస్ట్రార్​ కార్యాలయం, హైదరాబాద్​ జిల్లా రిజిస్ట్రార్​ కార్యాలయంలో ఒకే పేరుతో రెండు సొసైటీలు నమోదై ఉన్నాయని పేర్కొన్నారు. హెచ్సీఏ ఓటర్ల జాబితాను తారుమారు చేయటానికే నకిలీ సొసైటీ గుర్తింపును ఉపయోగించారన్నారు. ఈ క్లబ్ కు ప్రాతినిధ్యం వహించిన ఎం.జీవన్​ రెడ్డి కేవలం నాలుగు నెలల్లోనే హెచ్​సీఏ గౌరవ కార్యదర్శిగా ఏకగ్రీవంగా ఎలా ఎన్నికయ్యారని ప్రశ్నించారు. దీనినిబట్టే ఫోర్జరీ, మాల్​ ప్రాక్టీస్, క్లబ్​ గుర్తింపును మోసపూరితంగా మార్చారన్న విషయం స్పష్టమవుతోందని చెప్పారు.

Also read: పంటి నొప్పితో నరకం చూస్తున్నారా? నిమిషాల్లో తగ్గించే చిట్కాలు ఇవే!

బీసీసీఐ రాజ్యాంగానికి వ్యతిరేకంగా..

ఆ వెంటనే సుప్రీం కోర్టు ఆమోదం ఉన్న బీసీసీఐ రాజ్యాంగంలోని 28 రూల్​ ను ఉల్లంఘిస్తూ ఆగమ్​ రావు ఆధ్వర్యంలో టీజీ20 గవర్నింగ్​ కౌన్సిల్​ ను అక్రమంగా ఏర్పాటు చేశారన్నారు. డబ్బు కొల్లగొట్టటానికి ప్రస్తుతం హెచ్​సీఏ టీజీ20 ఫ్​రాంచైజీలను 3 నుంచి 10కోట్ల రూపాయలకు వేలం వేయటానికి కుట్రలు చేస్తోందన్నారు. తద్వారా 100 కోట్లకు పైగా టర్నోవర్​ ను సాధించి థర్డ్​ పార్టీ హక్కులను సృష్టించి నిధులను దారి మళ్లించటానికి ప్రయత్నిస్తోందని పేర్కొన్నారు.

సీఐడీకి ఫిర్యాదు..

టీజీ20 రికార్డులను జప్తు చేయటంతోపాటు ఖాతాలను ఫ్రీజ్​ చేయటానికి తక్షణ చర్యలు చేపట్టాలని సీఐడీకి ఫిర్యాదు ఇవ్వనున్నట్టు తెలిపారు. సీనియర్​ క్రికెటర్లు ఎంతోమంది ఉండగా అంబటి రాయుడును క్రికెట్​ అడ్మినిస్ట్రేటర్​ గా నియమించారన్నారు. పదవి చేపట్టగానే అంబటి రాయుడు తన స్నేహితునికి పగడాల నిరంజన్​ ను కమిటీలో నియమించుకున్నారన్నారు. నిజానికి నిరంజన్​ 8వ్యూస్​ అనే ఈవెంట్​ మేనేజ్​ మెంట్​ కంపెనీలో భాగస్వామి అయ్యే అవకాశాలు ఉన్నాయన్నారు. అంబటి రాయుడు, జీవన్​ రెడ్డి చేతులు కలిపి అర్హత లేని సెలెక్షన్​ కమిటీలను ఏర్పాటు చేసి మొత్తం వ్యవస్థనే హైజాక్​ చేశారని దుయ్యబట్టారు. సీఐడీ విచారణ జరుగుతున్నా, హైకోర్టు నియమించిన ఏకసభ్య జస్టిస్​ కమిటీ ఉన్నా హెచ్​సీఏ అన్ని చట్టాలను ఉల్లంఘిస్తోందని పేర్కొన్నారు.

Also Read: తహసీల్దార్ కార్యాలయాల్లో ప్రైవేట్ వ్యక్తుల పెత్తనం..?

పేరూ ఊరు లేని అయిదుగురు క్రికెటర్లు..

కామంటేటర్​ గా ఉన్న టీ.సుమన్​ ను హెచ్​సీఏ సెలెక్టర్​ గా నియమించారని చెప్పారు. ఆయనే స్వయంగా సోషల్​ మీడియా ద్వారా ఓపెన్​ సెలెక్షన్​ కోసం క్రికెటర్లను ప్రకటించటం అవినీతికి ద్వారాలు తెరిచిందని పేర్కొన్నట్టు ఆరోపించారు. కేంద్ర ప్రభుత్వ ఉద్యోగి ఆకాశ్​ భండారి జూనియర్స్​ సెలెక్షన్​ కమిటీ ఛైర్మన్​ గా ఉన్నారని చెప్పారు. సెక్రటరీ జీవన్​ రెడ్డితో కలిసి పేరూ ఊరు లేని అయిదుగురు క్రికెటర్లను హెచ్​సీఏ నిధులతో ముంబయిలోని వెంకట్రావు నడుపుతున్న ప్రైవేట్​ అకాడమీ ద్వారా ఇంగ్లండ్​ పర్యటనకు పంపిస్తున్నారని చెప్పారు. అదీ ఓ ప్రైవేట్​ జట్టుతో అని తెలిపారు.

ఇష్టారాజ్య నిర్ణయాలు..

కొన్నేళ్లుగా హెచ్​సీఏ ప్రీమియం ప్రైవేట్​ మార్కెట్​ ప్లేస్​ గా మారిపోయిందని దుయ్యబట్టారు. హెచ్​సీఏలో అక్రమ, అర్హత లేని నియామకాలన్నంటిపై లీగల్​ నోటీసులు పంపించనున్నట్టు చెప్పారు. గతంలో జమ్మూ కాశ్మీర్​‌లో చేసినట్టుగానే హెచ్సీఏను తక్షణమే రద్దు చేయాలని డిమాండ్​ చేశారు. రాష్ట్రవ్యాప్తంగా ఒకేరోజు 14 నుంచి 36ఏళ్ల మధ్య వయసు ఉన్న ఆటగాళ్లకు 45డిగ్రీల ఎండలో ఓపెన్​ సెలెక్షన్స్​ నిర్వహించాలన్న హెచ్​సీఏ నిర్ణయం జరుగనున్న మోసాన్ని తెలియచేస్తోందని చెప్పారు. ఇలాంటి ఇష్టారాజ్య నిర్ణయాలు, అక్రమ చర్యలను సహించేది లేదని హెచ్చరించారు. సమావేశంలో టీసీఏ సలహాదారు గోపాల్ శర్మ, చిత్తరంజన్, వరుణ్ పాల్గొన్నారు.

Also Read: బండి బగీరథ్ కేసులో బిగ్ ట్విస్ట్.. బాధితురాలి తల్లి లేఖ వెనుక సంచలనాలు.. ఇరుకుంటున్న పెద్దలు

Share

• 
• 
• 
• 
• 
•