Antarvedi Tourism: ఒకవైపు పచ్చని అడవి.. మరోవైపు నీలి సముద్రం.. మధ్యలో గోదావరి జలాలు. చుట్టూ ప్రశాంతమైన వాతావరణం.. పడవలో ప్రయాణిస్తూ దట్టమైన చెట్ల మధ్య నుంచి వెళ్లే అనుభూతి. ప్రకృతిని ఆస్వాదించాలనుకునేవారికి ఇలాంటి ప్రదేశం కచ్చితంగా ప్రత్యేకంగానే అనిపిస్తుంది. ఆ అందమైన అనుభూతిని అందించే ప్రాంతాల్లో అంతర్వేది మడ అడవులు ఒకటి. ఆంధ్రప్రదేశ్లోని డాక్టర్ బి.ఆర్. అంబేద్కర్ కోనసీమ జిల్లాలో వశిష్ట గోదావరి బంగాళాఖాతంలో కలిసే ప్రాంతానికి సమీపంలో ఈ మడ అడవులు ఉన్నాయి. ప్రకృతి అందాలతో పాటు జీవవైవిధ్యానికి కూడా ఈ ప్రాంతం ప్రత్యేక గుర్తింపు తెచ్చుకుంది.
గోదావరి, కృష్ణా నదుల డెల్టా ప్రాంతాల్లో విస్తరించిన మడ అడవులు తీరప్రాంత పర్యావరణ వ్యవస్థలో కీలక పాత్ర పోషిస్తాయి. సముద్రం నుంచి వచ్చే అలలు, తుఫానుల ప్రభావాన్ని తగ్గించడంలో ఇవి సహజ రక్షణ గోడల్లా పనిచేస్తాయి. అదే సమయంలో చేపలు, పీతలు, పక్షులు, ఇతర జీవులకు మడ అడవులు ఆశ్రయంగా నిలుస్తాయి. అందుకే ఇవి కేవలం పర్యాటక ప్రాంతాలు మాత్రమే కాకుండా ప్రకృతి సమతుల్యతకు అవసరమైన పర్యావరణ వ్యవస్థలుగా కొనసాగుతున్నాయి.
అంతర్వేది మడ అడవుల ప్రత్యేకతను దగ్గరగా ఆస్వాదించాలంటే బోటు ప్రయాణం బెస్ట్. పడవలో నీటి మార్గంలో ముందుకు వెళ్తుంటే రెండు వైపులా కనిపించే దట్టమైన మడ చెట్లు, ప్రశాంతమైన జలాలు ఆకట్టుకుంటాయి. చెట్ల మధ్య సన్నని నీటి మార్గాల్లో పడవ సాగుతుండగా నగర జీవితానికి పూర్తిగా భిన్నమైన వాతావరణం కనిపిస్తుంది. ఫ్యామిలీతో, ఫ్రెండ్స్ తో వెళ్లినప్పుడు ఈ ప్రయాణం మంచి జ్ఞాపకంగా మిగిలే అవకాశం ఉంది.
అంతర్వేది మరో ప్రత్యేకత సాగర సంగమం. వశిష్ట గోదావరి బంగాళాఖాతంలో కలిసే దృశ్యం ఇక్కడ ప్రధాన ఆకర్షణగా చెప్పుకోవచ్చు. నది, సముద్రం కలిసే ఈ ప్రాంతాన్ని దగ్గరగా చూడటం ప్రకృతి ప్రేమికులకు ప్రత్యేక అనుభూతిని అందిస్తుంది. కొన్ని సందర్భాల్లో డాల్ఫిన్లు కూడా కనిపిస్తాయి.
మడ అడవుల పరిసరాల్లో వివిధ రకాల పక్షులు కనిపిస్తాయి. ముఖ్యంగా ప్రకృతి, పక్షుల ఫొటోగ్రఫీ ఇష్టపడేవారికి ఈ ప్రాంతం ఆకట్టుకుంటుంది. ప్రశాంతంగా గడపాలనుకునేవారు కూడా ఇక్కడ కొంత సమయం ప్రకృతితో కలిసి గడపవచ్చు. ఉదయం వేళల్లో, సాయంత్రం సమయంలో పరిసరాల అందాలు మరింత ఆకర్షణీయంగా కనిపిస్తాయి.
అంతర్వేది పర్యటనను కేవలం మడ అడవులకే పరిమితం చేయాల్సిన అవసరం లేదు. ప్రసిద్ధ అంతర్వేది శ్రీ లక్ష్మీనరసింహ స్వామి ఆలయం, అంతర్వేది బీచ్, లైట్హౌస్ లాంటి ప్రాంతాలను కూడా సందర్శించవచ్చు. ప్రకృతి అందాలు, నదీ ప్రయాణం, సముద్ర తీర వాతావరణం, ఆధ్యాత్మిక ప్రదేశాలు, అన్నింటిని కలిపి ఒకే పర్యటనలో విభిన్న అనుభూతులను అందించే ప్రాంతంగా అంతర్వేది నిలుస్తుంది.
Read Also: రాముడు, కృష్ణుడు నీలం రంగులో ఎందుకు కనిపిస్తారు? అసలు వర్ణం నలుపు కాదా?
Share
అస్తిత్వ పోరాటానికి దృశ్య రూపం.. థియేటర్లో ‘పారడైజ్’ మూవీ వాచ్.. కేటీఆర్తోపాటు సీనియర్ నేతలు
పొల్లూరు జలపాతం ఉగ్రరూపం.. కుప్పకూలిన ‘ఇరుముడి’ చెక్క వంతెన!
