Delhi Metro Reopens All Stations: ఢిల్లీలో మెట్రో ప్రయాణికులకు ఊరట లభించింది. నిరసన కార్యక్రమం నేపథ్యంలో భద్రతా కారణాలతో మూసివేసిన మెట్రో స్టేషన్లు తిరిగి ఓపెన్ అయ్యాయి. ఢిల్లీ మెట్రో నెట్‌వర్క్‌ లోని అన్ని స్టేషన్లలో రాకపోకలు సాధారణ స్థితికి చేరుకున్నాయి. సుమారు 25 గంటల పాటు కొనసాగిన ఆంక్షల కారణంగా ఇబ్బందులు ఎదుర్కొన్న ప్రయాణికులు ఇప్పుడు.. కాస్త రిలాక్స్ అయ్యారు. మరోవైపు, రైలు సర్వీసులు కూడా సాధారణ షెడ్యూల్ ప్రకారం నడుస్తాయని రైల్వే శాఖ ప్రకటించింది.
ప్రధాన ఎన్నికల కమిషనర్ జ్ఞానేష్ కుమార్‌కు వ్యతిరేకంగా సీజేపీ తలపెట్టిన నిరసన నేపథ్యంలో ఢిల్లీలో భద్రతను కట్టుదిట్టం చేశారు. జంతర్ మంతర్ దగ్గర నిరసన కార్యక్రమం జరగనున్న నేపథ్యంలో శుక్రవారం రాత్రి 9 గంటల నుంచి మెట్రో స్టేషన్లపై ఆంక్షలు విధించారు. ఈ నిర్ణయంలో భాగంగా మొదట 57 స్టేషన్లు క్లోజ్ చేశారు. ఆ తర్వాత ఆ సంఖ్యను 45కు తగ్గించారు. శనివారం రాత్రి ఢిల్లీ మెట్రో రైల్ కార్పొరేషన్ (DMRC) అన్ని స్టేషన్లను ఓపెన్ చేసినట్లు ప్రకటించింది. ప్రయాణికులు ఇప్పుడు మెట్రో రైళ్ల ద్వారా ప్రయాణం చెయ్యొచ్చని ప్రకటించింది.
భద్రతా చర్యల్లో భాగంగా రాజీవ్ చౌక్, సెంట్రల్ సెక్రటేరియట్, పటేల్ చౌక్, జన్‌పథ్, మండి హౌస్, ఐటీఓ, కాశ్మీర్ గేట్, న్యూఢిల్లీ లాంటి ప్రధాన స్టేషన్లలో ఆంక్షలు విధించారు. ఈ స్టేషన్లు నగరంలోని కీలక ప్రాంతాలకు రవాణా సౌకర్యాన్ని అందిస్తాయి. ఇక్కడ పెద్ద సంఖ్యలో ప్రజలు గుమిగూడే అవకాశం ఉందన్న సమాచారంతో ఢిల్లీ పోలీసుల సూచన మేరకు అధికారులు ఈ చర్యలు తీసుకున్నారు.
మెట్రో సేవలతో పాటు రైల్వే సర్వీసులపైనా ఢిల్లీలో ఆంక్షల ప్రభావం పడింది. అక్టోబర్ 9, 10 తేదీల్లో న్యూఢిల్లీ, హజ్రత్ నిజాముద్దీన్ రైల్వే స్టేషన్లకు వచ్చే, అక్కడి నుంచి బయలుదేరే పలు రైళ్లను రద్దు చేశారు. మొత్తం 245 రైళ్లను రద్దు చేసినట్లు రైల్వే శాఖ ప్రకటించింది. స్టేషన్ల పరిసరాల్లో భారీ ట్రాఫిక్ రద్దీ ఏర్పడే అవకాశం ఉండటంతో ప్రయాణికులకు ఇబ్బందులు కలగకుండా ముందస్తు చర్యలు తీసుకున్నట్లు అధికారులు తెలిపారు. ఇవాళ్టి నుంచి రైళ్లు సాధారణ షెడ్యూల్ ప్రకారం నడుస్తాయని రైల్వే ప్రకటించింది. అయినప్పటికీ, ప్రయాణికులు తమ రైలు స్టేటస్‌ను అధికారిక వెబ్‌సైట్‌లో ఒకసారి చెక్ చేసుకోవడం మంచిది.
మెట్రో, రైల్వే సేవలపై విధించిన ఆంక్షల విషయంలో సుప్రీంకోర్టు కూడా స్పందించింది. రవాణా సదుపాయాలపై పూర్తిస్థాయి ఆంక్షలు విధించడంపై అభ్యంతరాలు వ్యక్తమైనట్లు సమాచారం. కోర్టు ఆదేశాలు ఉన్నప్పటికీ మెట్రో స్టేషన్లను మూసివేయడం, రైళ్లను రద్దు చేయడం, ప్రయాణికులకు సరైన ముందస్తు హెచ్చరికలు ఇవ్వకపోవడం వంటి అంశాలపై ధిక్కార పిటిషన్ దాఖలైంది. ఈ పిటిషన్‌పై ఇవాళ విచారణ జరగనుంది.
Read Also: రైళ్ల రద్దుపై కీలక అప్‌డేట్.. ఇండియన్ రైల్వే ఏం చెప్పిందంటే!
Share
వైసీపీ పరువు తీసిన ఓ ఎన్నారై.. వెంకటేశ్రెడ్డికి అమెరికాలో 50 నెలలు జైలుశిక్ష, అసలు ఏం జరిగింది?
Intinti Ramayanam Today Episode: పల్లవి ప్లాన్ సక్సెస్.. ప్రణతి కాపురంలో చిచ్చు.. అవని, కమల్ అరెస్ట్..
