ప్రయాణ సమయంలో షూస్ తీసుకెళ్లడానికి ఇబ్బందిపడుతున్నారా? సూట్‌కేస్‌లో ఇలా ప్యాక్ చేస్తే స్థలం ఆదా

ప్రయాణానికి సిద్ధమవుతున్నప్పుడు సూట్‌కేస్‌లో షూస్ సరిగ్గా ప్యాక్ చేయడం చాలా మందికి కష్టంగా అనిపిస్తుంది. బ్యాగ్ లేదా సూట్ కేస్‌లో షూస్ ఎక్కువ స్థలాన్ని ఆక్రమిస్తాయి. వాటిని సరిగా ప్యాక్ చేయకపోతే బట్టలు మురికిగా మారే అవకాశం ఉంటుంది. అలాగే ఖరీదైన షూస్ ఆకారం కూడా దెబ్బతినవచ్చు.

అయితే కొన్ని ఈజీ ట్రావెల్ టిప్స్ పాటిస్తే ఈ సమస్యలను సులభంగా నివారించవచ్చు. ఈ చిట్కాలు పాటిస్తే సూట్‌కేస్‌లో స్థలం ఆదా కావడంతో పాటు మీ షూస్ కూడా సురక్షితంగా ఉంటాయి.

ప్యాక్ చేసే ముందు షూస్ శుభ్రం చేయండి

ఎప్పుడూ మురికిగా ఉన్న షూస్.. నేరుగా సూట్‌కేస్‌లో పెట్టకండి. ముందుగా షూ అడుగుభాగంలో ఉన్న మట్టి, దుమ్మును పాత టూత్‌బ్రష్‌తో శుభ్రం చేయండి. తర్వాత తడి గుడ్డతో మొత్తం షూను తుడవండి. షూల నుంచి దుర్వాసన వస్తే ‘షూ డియోడరైజర్’ స్ప్రే ఉపయోగించండి. అలాగే ప్రయాణానికి ముందురోజు రాత్రంతా షూ లోపల కొద్దిగా బేకింగ్ సోడా వేసి ఉంచితే ఉదయం దానిని తొలగించి ప్యాక్ చేయండి. ఇలా చేస్తే దుర్వాసన తగ్గి బట్టలు కూడా శుభ్రంగా ఉంటాయి.

షూ లోపల చిన్న వస్తువులు పెట్టండి

షూలను ఖాళీగా ఉంచకుండా లోపల టిష్యూ పేపర్ లేదా ప్యాకింగ్ పేపర్ నింపండి. ఇలా చేస్తే షూల ఆకారం అలాగే ఉంటుంది. సూట్‌కేస్‌లో స్థలం ఆదా చేయాలంటే షూ లోపల సాక్స్, బెల్ట్ లేదా చిన్న బట్టలు పెట్టవచ్చు. ఈ చిట్కా వల్ల స్థలం వృథా కాకుండా ఉంటుంది. ప్రయాణంలో షూస్ నలిగిపోకుండా కూడా రక్షణ లభిస్తుంది.

ప్రతి షూను ప్రత్యేక బ్యాగ్‌లో పెట్టండి

షూలను నేరుగా బట్టలతో కలిపి పెట్టకండి. వాటిని షూ బ్యాగ్, క్లాత్ బ్యాగ్ లేదా ప్లాస్టిక్ బ్యాగ్‌లో పెట్టండి. దీంతో షూలపై ఉన్న మురికి బట్టలకు అంటదు. అలాగే దుర్వాసన కూడా వ్యాపించదు. సాధ్యమైతే ప్రతి షూను వేర్వేరు బ్యాగ్‌లలో ఉంచడం మరింత మంచిది. దీనివల్ల షూలకు అదనపు రక్షణను అందిస్తుంది.

Also Read: లైఫ్ ఈజ్ బ్యూటిఫుల్.. ఈ తేదీల్లో పుట్టినవారు టెన్షన్ తీసుకోరు, ఎప్పుడూ సంతోషంగా ఉంటారు

సూట్‌కేస్‌లో సరైన స్థానంలో షూస్ ఉంచాలి

షూస్.. సూట్‌కేస్ అంచుల వద్ద ఉంచడం మంచిది. షూ అడుగుభాగం బట్టలకు తగలకుండా బయటవైపు ఉండేలా అమర్చండి. లేదా షూలను పైభాగంలో పెట్టి వాటి చుట్టూ మడిచిన బట్టలను అమర్చండి. సూట్‌కేస్‌లో ప్రత్యేక జిప్ కంపార్ట్‌మెంట్ ఉంటే అందులో సరిపోయే స్థలం ఉంటే అక్కడ షూలను ఉంచండి. ఈ విధానం వల్ల ప్రయాణ సమయంలో షూస్ పై ఒత్తిడి తగ్గుతుంది.

సరైన ప్యాకింగ్ ఎందుకు ముఖ్యం?

విమాన ప్రయాణాల్లో లగేజ్‌ను చాలాసార్లు గట్టిగా విసురుతారు. సరిగా ప్యాక్ చేయకపోతే షూలు నలిగిపోవచ్చు లేదా దెబ్బతినవచ్చు. సరైన ప్యాకింగ్ వల్ల షూస్ సురక్షితంగా ఉంటాయి. బట్టలు కూడా శుభ్రంగా ఉంటాయి. సూట్‌కేస్‌ను తెరిచిన తర్వాత అవసరమైన వస్తువులను సులభంగా తీసుకోవచ్చు.

షూస్ ప్యాక్ చేయడం కష్టమైన పని కాదు. కొన్ని సులభమైన పద్ధతులు పాటిస్తే సూట్‌కేస్‌లో ఎక్కువ స్థలం దొరుకుతుంది. బట్టలు శుభ్రంగా ఉంటాయి. ప్రయాణం కూడా మరింత సౌకర్యవంతంగా మారుతుంది.

Share

• 
• 
• 
• 
• 
•