ఇక కరీంనగర్-వరంగల్ నాన్‌స్టాప్ బస్సులు.. పూర్తి షెడ్యూల్ ఇదే?

Electric Buses: కరీంనగర్‌ – వరంగల్‌ నగరాల మధ్య ప్రయాణ సమయాన్ని తగ్గించేందుకు ఆర్టీసీ సరికొత్త సర్వీసులకు శ్రీకారం చుట్టింది. ప్రయాణికులు వేగంగా గమ్యస్థానాలకు చేరుకునేలా నేటి నుంచి నాన్‌స్టాప్‌ ఎలక్ట్రిక్‌ బస్సులను ప్రారంభించింది. నూతనంగా అందుబాటులోకి వచ్చిన రహదారి మీదుగా ఈ సర్వీసులు పరుగులు తీయనున్నాయి.

బైపాస్‌ మీదుగా దూకుడు.. మధ్యలో హాల్టింగులు బంద్‌!

కరీంనగర్‌ డిపోకు చెందిన నాలుగు అధునాతన విద్యుత్‌ (ఎలక్ట్రిక్‌) బస్సులకు డీలక్స్‌ బోర్డులు ఏర్పాటు చేసి నాన్‌స్టాప్‌గా నడుపుతున్నారు. నూతన బైపాస్‌ రోడ్డు మార్గంలో ఈ సర్వీసులు ప్రయాణించనుండటంతో శంకరపట్నం (కేశవపట్నం), హుజూరాబాద్‌, ఎల్కతుర్తి, హసన్‌పర్తి తదితర ప్రాంతాల్లో ఎక్కడా ఆగవు. పట్టణాలు, మండల కేంద్రాలను తాకకుండా బస్సులు నేరుగా బైపాస్‌ మీదుగానే గమ్యానికి చేరుకుంటాయి.

డీలక్స్‌ కేటగిరీ.. ‘మహాలక్ష్మి’ వర్తించదు!

ఈ నాన్‌స్టాప్‌ బస్సులకు డీలక్స్‌ ఛార్జీలు వసూలు చేస్తున్నారు. డీలక్స్‌ హోదా ఉండటంతో మహిళలకు కల్పించిన ఉచిత బస్సు ప్రయాణ (మహాలక్ష్మి) పథకం వీటికి వర్తించదు. ఈ బస్సులను తొలుత వరంగల్‌కు ఒక ట్రిప్పు, అనంతరం హనుమకొండకు రెండు ట్రిప్పుల చొప్పున నడుపుతున్నట్లు డ్రైవర్లు తెలిపారు.

ఉద్యోగులు, వ్యాపారులకు సమయం ఆదా..

కరీంనగర్‌, ఉమ్మడి వరంగల్‌ జిల్లాల మధ్య నిత్యం రాకపోకలు సాగించే ఉద్యోగులు, వాణిజ్య వర్గాలు, వివిధ రంగాల ప్రొఫెషనల్స్‌కు ఈ నాన్‌స్టాప్‌ సర్వీసులు పెద్ద ఊరటనివ్వనున్నాయి. మార్గమధ్యంలో ఎలాంటి హాల్టింగులు లేకపోవడంతో సమయం గణనీయంగా ఆదా కానుంది.

Also Read: కన్‌స్ట్రక్షన్లకు మంచినీళ్లు వాడుతున్నారా.. జలమండలి మరో మాస్టర్ ప్లాన్!