Where Is My Train App: రైలు ప్రయాణంలో చాలామందికి ఎదురయ్యే ఇబ్బందుల్లో ప్లాట్ ఫారమ్ పై రైలు కోసం ఎదురుచూడటం ఒకటి. రైలు ఎప్పుడు వస్తుంది? ఏ ప్లాట్ ఫారమ్ మీద ఆగుతుంది? మన కోచ్ ఎక్కడ ఉంటుంది? వంటి ప్రశ్నలకు సమాధానం కోసం ప్రయాణికులు తరచూ డిస్ప్లే బోర్డులు చూస్తుంటారు. అయితే, ఈ సమాచారాన్ని ఒకే చోట అందించే కొన్ని యాప్స్ ప్రయాణాన్ని ఈజీగా మార్చేస్తాయి. వాటిలో ‘వేర్ ఈజ్ మై ట్రైన్’ యాప్ ఒకటి.
‘వేర్ ఈజ్ మై ట్రైన్’ను తొలుత సిగ్మాయిడ్ ల్యాబ్స్ అనే స్టార్టప్ అభివృద్ధి చేసింది. ఈ యాప్ను గూగుల్ 2018 డిసెంబర్లో కొనుగోలు చేసింది. అప్పటి నుంచి ఇది భారతీయ రైలు ప్రయాణికుల్లో విస్తృతంగా ఉపయోగించే ట్రావెల్ యాప్గా మారింది. రైలు లైవ్ స్టేటస్, టైమ్టేబుల్స్, PNR వివరాలు, స్టేషన్ సమాచారం లాంటి పలు సదుపాయాలను ఇందులో ఒకే చోట పొందవచ్చు.
ఈ యాప్లో ఆసక్తికరమైన ఫీచర్ రైలు లొకేషన్ ను అంచనా వేయగల సామర్థ్యం. కొన్ని సందర్భాల్లో యాక్టివ్ ఇంటర్నెట్, GPS లేకపోయినా సమీపంలోని మొబైల్ టవర్ల నుంచి అందే సమాచారాన్ని ఉపయోగించి రైలు ఎక్కడ ఉందో అంచనా వేయడానికి సహాయపడుతుంది. ప్రత్యేకంగా మొబైల్ డేటా సరిగా పనిచేయని రైల్వే మార్గాల్లో ఈ ఫీచర్ ఉపయోగపడుతుంది. అయితే ఇలాంటి లొకేషన్ సమాచారం అంచనా ఆధారంగా ఉంటుందని గుర్తుంచుకోవాలి.
రాత్రి వేళ రైలు ప్రయాణించే వారికి మరో ఉపయోగకరమైన ఫీచర్ డెస్టినేషన్ అలారం. ప్రయాణికులు తమ గమ్యస్థానాన్ని ఎంచుకుని అలర్ట్ సెట్ చేసుకోవచ్చు. రైలు ఆ స్టేషన్కు చేరువవుతున్నప్పుడు నోటిఫికేషన్ అందుతుంది. అదేవిధంగా రైలు లైవ్ లొకేషన్ను కుటుంబ సభ్యులు, స్నేహితులతో షేర్ చేసుకునే అవకాశం కూడా ఉంటుంది. దీంతో ప్రయాణికుడు ఎక్కడ ఉన్నాడో తెలుసుకోవడం వారికి సులభంగా మారుతుంది.
పెద్ద రైల్వే స్టేషన్లో రైలు కోసం ఎదురుచూస్తున్నప్పుడు మన కోచ్ ఏ ప్రాంతంలో ఆగుతుందో తెలుసుకోవడం చాలా ఉపయోగకరం. ‘వేర్ ఈజ్ మై ట్రైన్’లో అందుబాటులో ఉన్న రైళ్లకు కోచ్ పొజిషన్, సీటు, బెర్త్ లేఅవుట్ లాంటి వివరాలు చూడవచ్చు. దీంతో రైలు వచ్చిన తర్వాత చివరి నిమిషంలో కోచ్ కోసం పరుగులు పెట్టాల్సిన అవసరం తగ్గుతుంది. బోర్డింగ్ స్టేషన్కు సంబంధించిన ప్లాట్ఫారమ్ సమాచారాన్ని కూడా యాప్లో చూడవచ్చు.
ప్రయాణంలో ప్రతి చోట ఇంటర్నెట్ సిగ్నల్ అందుబాటులో ఉండదు. ఈ సమస్యను దృష్టిలో పెట్టుకుని యాప్లో ఇండియన్ రైల్వే టైమ్టేబుల్ సమాచారాన్ని ఆఫ్లైన్లో చూసే సదుపాయం ఉంది. రైలు నంబర్ గుర్తు లేకపోయినా బయలుదేరే, చేరే స్టేషన్ల ఆధారంగా రైలు కోసం సెర్చ్ చేయవచ్చు. కొన్ని సందర్భాల్లో రైలు పేరు, చిన్న స్పెల్లింగ్ తప్పులతోనూ సెర్చ్ చేయడం సాధ్యమవుతుంది.
PNR స్టేటస్, సీట్ల అవైలబులిటీ లాంటి వివరాలను కూడా యాప్ ద్వారా చెక్ చేసుకోవచ్చు. డేటా అందుబాటులో ఉన్న కొన్ని నగరాల్లో లోకల్, మెట్రో రైళ్ల సమాచారాన్ని కూడా అందిస్తుంది.
Read Also: ఢిల్లీలో రైళ్లకు బ్రేక్.. ఏకంగా 110 సర్వీసులపై ఎఫెక్ట్.. కారణం ఏంటంటే?
Share
ఈ ట్యాబ్ ఉంటే..ల్యాప్ టాప్ అవసరమే లేదు తెలుసా ?
ఏళ్లుగా క్రికెట్ రైవల్రీ... గేమ్ కోసం మొదలైన గొడవ కుల వివక్షపై పోరుగా మారితే... ఓటీటీలో సూపర్ స్పోర్ట్స్ డ్రామా
