బిగ్‌బాస్ టైటిల్ అతను గెలిస్తే హ్యాపీ.. మహేష్ అచంట మనసులో మాట!

Kissik Talks: తాజాగా బిగ్ టీవీ నిర్వహిస్తున్న ‘కిస్సిక్ టాక్స్’ కార్యక్రమంలో పాల్గొన్న మహేష్ అచంట సినిమా ప్రయాణంతో పాటు వ్యక్తిగత జీవితానికి సంబంధించిన ఆసక్తికర విషయాలను పంచుకున్నారు.ముఖ్యంగా బిగ్ బాస్ లో తనకు ఇష్టమైన పార్టిసిపెంట్ గురించి తనదైన శైలిలో ఇలా చెప్పుకొచ్చారు.

బిగ్‌బాస్‌లో నరేష్ అంటే ఇష్టం..

ఈ సీజన్‌లో తనకు నరేష్ అంటే వ్యక్తిగతంగా చాలా ఇష్టమని మహేష్ అచంట చెప్పారు. అతను ఎలా ఆడినా తనకు నచ్చుతాడని, నరేష్ టైటిల్ గెలిస్తే సంతోషిస్తానని తెలిపారు.ఇతరుల విజయాన్ని చూసి నిజంగా సంతోషపడే మనస్తత్వం తనకు ఇష్టమని చెప్పారు. ఎదుటివారు సక్సెస్ అయితే దాన్ని మన సక్సెస్‌లా భావించాలని, ఇతరులు ఎదుగుతున్నప్పుడు అసూయ పడకూడదని తన అభిప్రాయాన్ని వెల్లడించారు.

అయితే ఈ రోజుల్లో మన మంచిని కోరుకునే వ్యక్తులు ఎవరో తెలుసుకోవడం కష్టంగా మారిందని కూడా వ్యాఖ్యానించారు. తనకు దగ్గరగా ఉండి చూసిన వ్యక్తుల గురించి మాత్రమే తాను చెప్పగలనని వివరించారు.

నన్ను నేనే మోసం చేసుకున్నా.. మనశ్శాంతి పోయింది!

తన జీవితంలో ఎవరైనా మోసం చేశారా అని వర్ష అడిగిన ప్రశ్నకు మహేష్ ఆసక్తికరంగా స్పందించారు. ఇతరులను నమ్మి, తనను తాను నమ్మకపోవడం వల్ల తానే తనను మోసం చేసుకున్నానని చెప్పారు.డబ్బు కంటే మనశ్శాంతి చాలా ముఖ్యమని ఆయన అభిప్రాయపడ్డారు. మనశ్శాంతి ఉన్న వ్యక్తికి పెద్ద పెద్ద సౌకర్యాలు లేకపోయినా ప్రశాంతంగా జీవించగలడని వివరించారు. రోడ్డు పక్కన పడుకున్న వ్యక్తికి కూడా ప్రశాంతంగా నిద్రపట్టవచ్చని ఉదాహరణగా చెప్పారు.

తన జీవితంలో ఒక వారం పాటు మనశ్శాంతి దూరమైందని, ఆ అనుభవం తనకు ఎన్నో విషయాలు నేర్పిందని తెలిపారు. ఇకపై తన దారిలో తాను ముందుకు సాగడమే ముఖ్యమని చెప్పారు.

మోసం చేసే వాళ్లకు మహేష్ అచంట సలహా!

మోసం చేసే వ్యక్తులకు ఏం చెబుతారని వర్ష అడగ్గా.. మనం ఇతరులను మోసం చేస్తే, ఎప్పుడో ఒకప్పుడు మనల్ని కూడా ఎవరో మోసం చేస్తారని మహేష్ అన్నారు. అదే విధంగా మనం ఎవరికైనా సాయం చేస్తే, మనకు కూడా ఎప్పుడో ఒకప్పుడు సాయం అందుతుందని చెప్పారు.

ఎవరైనా మన గురించి తప్పుగా మాట్లాడినంత మాత్రాన మనం చెడ్డవాళ్లం అయిపోమని, మన మంచితనం ఇతరుల మాటలపై ఆధారపడదని వివరించారు. మనం ఎలా ఉన్నామో మన మనస్సాక్షికి తెలుసని అన్నారు.

ఏనుగు వెళ్తుంటే కుక్కలు మొరుగుతాయి..

మనం ఏనుగులా ముందుకు వెళ్తుంటే, కుక్కలు మొరుగుతూనే ఉంటాయని చెప్పారు. వాటిని పట్టించుకోకుండా మన దారిలో మనం ముందుకు సాగాలని సూచించారు.ప్రతి ఒక్కరికీ సమాధానం చెప్పాల్సిన అవసరం లేదని, మనం సరైన దారిలో ఉన్నామా లేదా అనేది మనకు తెలిసి ఉంటే చాలన్నారు.

ALSO READ :ఆరుగురిని లవ్ చేశా.. నా భార్యకు చెబితే .. మహేష్ అచంట లవ్ స్టోరీలో ఇన్ని ట్విస్టులా?

మొత్తానికి మహేష్ అచంట ‘కిస్సిక్ టాక్స్’ ఇంటర్వ్యూలో ప్రేమ, పెళ్లి, కుటుంబ జీవితం, స్నేహం, మనశ్శాంతి వంటి అంశాలపై తనదైన శైలిలో మాట్లాడారు. సరదా వ్యాఖ్యలతో నవ్వులు పూయించడంతో పాటు, జీవితానికి సంబంధించిన కొన్ని విషయాలను కూడా పంచుకున్నారు.