అమరావతి సీడ్ యాక్సెస్ రోడ్డు ‘వంపు’పై ట్రోల్స్.. గట్టి కౌంటర్ ఇచ్చిన ఏపీ సర్కార్!

Amaravati Seed Access Road: ఏపీ రాజధాని అమరావతిలో నిర్మించిన సీడ్ యాక్సెస్ రోడ్డును సీఎం చంద్రబాబు గురువారం ప్రారంభించిన సంగతి తెలిసిందే. ఈ క్రమంలోనే బకింగ్ హామ్ కెనాల్ పై నిర్మించిన స్టీల్ బ్రిడ్జ్ ను ఓపెన్ చేసి.. శీలాఫలకాన్ని ఆవిష్కరించారు. అయితే ఈ బ్రిడ్జ్ గుండా వెళ్లే రోడ్డులో ‘S’ ఆకారపు వంపు ఉండటంతో ఒక్కసారిగా విమర్శలు మెుదలయ్యాయి. రోడ్డును నేరుగా వేసే అవకాశం ఉన్నా.. ఎందుకిలా మెలిక తిప్పుతూ వేశారని వైసీపీ సోషల్ మీడియాతో పాటు నెటిజన్లు ప్రశ్నించారు. నేరుగా వేస్తే.. అక్కడ ఉన్న టీడీపీ నేతల ఆస్తులు పోతాయని ఇలా చేశారా అంటూ రకరకాల కామెంట్స్ పెట్టారు. దీంతో ఆ విమర్శలను ఏపీ ప్రభుత్వం అధికారికంగా ఖండించింది.

సీడ్ యాక్సెస్ రహదారిలోని ‘S’ ఆకారపు మలుపులపై ప్రజల్లో అపోహలను కలిగించేందుకు కొందరు అసత్య ప్రచారం చేస్తున్నారని సీఆర్డీఏ మండిపడింది. ప్రస్తుతం వంపుతో కనిపిస్తున్న మార్గం.. భవిష్యత్తులో చేపట్టనున్నన్న కీలక రహదారుల అనుసంధానాలకు అనుగుణంగా రూపొందిందని స్పష్టం చేసింది. ‘సీడ్ యాక్సెస్ రహదారి అభివృద్ధి కార్యాచరణను ప్రస్తుత, భవిష్యత్ అవసరాలను దృష్టిలో ఉంచుకుని దశలవారీగా చేపట్టడం జరిగింది. ఫేజ్-3లో విజయవాడ – చెన్నై జాతీయ రహదారిని మణిపాల్ హాస్పిటల్ సమీపంలో అనుసంధానించే ప్రధాన రహదారి నిర్మాణానికి అనుగుణంగానే ప్రస్తుత రహదారి రూపకల్పన చేయబడింది’ అని పేర్కొంది.

ప్రజారాజధాని అమరావతి సీడ్ యాక్సెస్ రహదారిలోని S ఆకారపు మలుపులపై సామాజిక మాధ్యమాల్లో జరుగుతున్న ప్రచారంపై అధికారిక వివరణ!

సీడ్ యాక్సెస్ రహదారి అభివృద్ధి కార్యాచరణను ప్రస్తుత, భవిష్యత్ అవసరాలను దృష్టిలో ఉంచుకుని దశలవారీగా చేపట్టడం జరిగింది.

ఫేజ్-3లో విజయవాడ–చెన్నై జాతీయ రహదారిని… pic.twitter.com/jO4UZbpYUF

— Amaravati-The Peoples Capital (@PrajaRajadhani) August 13, 2026

Also Read: ఒకేసారి స్వాతంత్రం వస్తే.. పాక్‌లో ఆగస్టు 14నే వేడుకలు ఎందుకు? 1947లో ఏం జరిగింది?

రాజధాని అమరావతికి మంగళగిరి, విజయవాడ ప్రాంతాలతో మెరుగైన రహదారి అనుసంధానం కల్పించడంతో పాటు.. కరకట్టపై వాహనాల రద్దీని తగ్గించడం ప్రధాన ఉద్దేశ్యంగా సీడ్ యాక్సెస్ రహదారిని అందుబాటులోకి తీసుకువచ్చినట్లు సీఆర్డీఏ స్పష్టం చేసింది. అందువల్ల సీడ్ యాక్సెస్ రహదారిలోని ‘S’ ఆకారపు మలుపులను భవిష్యత్ రహదారి కారిడార్ నిర్మాణం, అనుసంధాన అవసరాలు, సమగ్ర ట్రాఫిక్ నిర్వహణ ప్రణాళికలో భాగంగా చూడాలని తెలియజేసింది. వీటిపై వస్తున్న అసత్య ప్రచారాలు, అపోహల ఎవరూ నమ్మవద్దని హితవు పలికింది.