సాయి కృష్ణ కేసులో బిగ్ ట్విస్ట్.. పోలీసుల దాడిలోనే మరణించాడని సిట్ నిర్ధారణ!

Sai Krishna: అమరావతి ప్రాంతంలో తీవ్ర సంచలనం సృష్టించిన సాయి కృష్ణ మిస్సింగ్, డెత్ కేసుకు సంబంధించి దర్యాప్తు వేగవంతమైంది. ఈ ఘటనపై విచారణ చేపట్టిన ప్రత్యేక దర్యాప్తు బృందం (సిట్) అధికారులు తాజాగా స్థానిక కోర్టులో కీలకమైన ఛార్జిషీట్‌ను దాఖలు చేశారు.

పోలీసుల దాడిలోనే మృతి

సాయి కృష్ణ పోలీసుల దాడిలోనే మరణించాడని సిట్ అధికారులు తమ ఛార్జిషీట్‌లో స్పష్టంగా పేర్కొన్నారు. అతడిని అరెస్టు చేసిన సమయం నుంచి పోలీసుల దాడికి గురై మృతి చెందే వరకు చోటుచేసుకున్న ప్రతి పరిణామాన్ని వివరంగా పొందుపరిచారు. సాయి కృష్ణ మిస్సింగ్ కేసుగా మొదలై హత్యగా మారిన తీరును అధికారులు సమగ్రంగా కోర్టుకు వివరించారు.

కోర్టుకు హాజరైన సిట్ ఐవో

సిట్ దర్యాప్తు అధికారి (ఐవో) సుధాకర్ బాబు స్వయంగా కోర్టుకు హాజరై ఈ ఛార్జిషీట్‌ను సమర్పించారు. బాధితుడి తల్లి విజయలక్ష్మి చేసిన ఆరోపణల అనంతరం, కృష్ణలంక పోలీసులు ప్రవర్తించిన తీరును కూడా ఇందులో నివేదించారు. ప్రభుత్వం ఇచ్చిన నిష్పక్షపాత విచారణ ఆదేశాలకు అనుగుణంగానే పారదర్శకంగా దర్యాప్తు పూర్తి చేసినట్లు తెలిపారు.

సాక్ష్యాలు, అరెస్టుల వివరాలు

ఈ కేసులో ఇప్పటివరకు ఏడుగురిని నిందితులుగా చేర్చి అరెస్టు చేసినట్లు సిట్ అధికారులు వెల్లడించారు. తమ ఆరోపణలకు బలమైన ఆధారాలుగా టెక్నికల్ ఎవిడెన్స్, ఫోరెన్సిక్ ఆధారాలు , ప్రత్యక్ష సాక్షుల స్టేట్‌మెంట్లను కోర్టుకు సమర్పించారు.

Also Read: అక్రమంగా సంపాదించినవి పీకడానికే వెళ్లాం.. జగదీశ్ రెడ్డిపై అద్దంకి దయాకర్ ఫైర్