వైఎస్ షర్మిల సంచలన నిర్ణయం.. స్థానిక ఎన్నికలు నిలిపివేయాలని ఎస్ఈసీకి లేఖ!

YS Sharmila: రాష్ట్రంలో ‘అర్నాబ్’ తుపాను తీవ్ర ప్రభావం చూపే అవకాశం ఉన్నందున రాబోయే పట్టణ స్థానిక సంస్థల ఎన్నికలను తక్షణమే వాయిదా వేయాలని ఆంధ్రప్రదేశ్ కాంగ్రెస్ కమిటీ డిమాండ్ చేసింది. ఈ మేరకు ఏపీసీసీ అధ్యక్షురాలు వైఎస్ షర్మిలా రెడ్డి రాష్ట్ర ఎన్నికల కమిషనర్‌కు సమగ్ర లేఖను సమర్పించారు. ప్రజల భద్రతను దృష్టిలో ఉంచుకుని నవంబర్ 1న జరగాల్సిన పోలింగ్‌ను వాయిదా వేయాలని ఆమె విజ్ఞప్తి చేశారు.

ప్రాణాలకు ముప్పు..

తుపాను తీవ్రత దృష్ట్యా ప్రస్తుతం ఎన్నికలు నిర్వహించడం ప్రజల ప్రాణాలకు, భద్రతకు తీవ్ర ముప్పుగా పరిణమిస్తుందని షర్మిల లేఖలో ఆందోళన వ్యక్తం చేశారు. ఓటర్లు, అభ్యర్థులతో పాటు ఎన్నికల విధుల్లో పాల్గొనే వేలాది మంది సిబ్బంది ప్రాణాలు ప్రమాదంలో పడే అవకాశం ఉందని పేర్కొన్నారు. విపత్తు వేళ ప్రజా సంక్షేమానికే ప్రథమ ప్రాధాన్యం ఇవ్వాలని సూచించారు.

రాకపోకలకు అవరోధం

అర్నాబ్ తుపాను కారణంగా రాష్ట్రవ్యాప్తంగా భారీ వర్షాలు, బలమైన ఈదురుగాలులు వీచే అవకాశం ఉందని వాతావరణ శాఖ హెచ్చరించిన విషయాన్ని ఈ సందర్భంగా షర్మిల గుర్తుచేశారు. భారీ వర్షాల వల్ల రవాణా, విద్యుత్ సరఫరా, టెలికాం వ్యవస్థలకు తీవ్ర అంతరాయం కలుగుతుందని ఎస్ఈసీకి తెలిపారు. ఇటువంటి క్లిష్ట పరిస్థితుల్లో తీర ప్రాంతాలు, లోతట్టు ప్రాంతాల ప్రజలు పోలింగ్ కేంద్రాలకు చేరుకోవడం సాధ్యం కాదని వివరించారు.

Also Read: DPDP చట్టంపై సుప్రీంలో విచారణ.. జర్నలిస్టుల గోప్యత, స్వేచ్ఛపై కేంద్రానికి నోటీసులు!

ఐఎండీ నివేదిక ఆధారంగా..

భారత వాతావరణ శాఖ (IMD), రాష్ట్ర విపత్తు నిర్వహణ సంస్థల వద్ద ఉన్న తాజా నివేదికలను పరిగణనలోకి తీసుకుని వారితో సంప్రదింపులు జరిపిన తర్వాతే ఎన్నికల షెడ్యూల్‌పై తుది నిర్ణయం తీసుకోవాలని షర్మిల డిమాండ్ చేశారు. తుపాను ప్రభావాన్ని క్షేత్రస్థాయిలో సమగ్రంగా అంచనా వేసి పరిస్థితులు పూర్తిగా అనుకూలించిన తర్వాతే స్థానిక ఎన్నికలను నిర్వహించాలని రాష్ట్ర ఎన్నికల సంఘాన్ని ఆమె కోరారు.

Also Read: జంతువుల కోసం ఫ్లైఓవరా? కెనడా చేసిన ఈ పనికి.. యావత్ ప్రపంచమే ఫిదా!