డస్టర్ To సెల్టోస్.. ఇండియన్ మార్కెట్లో హైబ్రిడ్ కార్ల జోరు!

Upcoming Hybrid Cars 2026: భారత్ లో SUVలకు డిమాండ్ రోజు రోజుకూ పెరుగుతోంది. అదే సమయంలో పెరుగుతున్న ఇంధన ధరలు, సీరియస్ పొల్యూషన్ రూల్స్ కారణంగా వాహన తయారీ సంస్థలు కొత్త టెక్నాలజీలపై దృష్టి పెడుతున్నాయి. ముఖ్యంగా స్ట్రాంగ్ హైబ్రిడ్ టెక్నాలజీ ఇప్పుడు మిడ్‌సైజ్ SUVలలో కీలకంగా మారే అవకాశం కనిపిస్తోంది. ఈ నేపథ్యంలో రెనాల్ట్, హ్యుందాయ్, కియా సంస్థలు ప్రముఖ SUVలకు హైబ్రిడ్ వెర్షన్లను సిద్ధం చేస్తున్నాయి. త్వరలో మార్కెట్ లోకి ఇవ్వబోతున్న మూడు సూపర్ కార్ల గురించి ఇప్పుడు తెలుసుకుందాం..

1.రెనాల్ట్ డస్టర్ హైబ్రిడ్

ఈ లిస్టులో ముందుగా ఇండియన్ మార్కెట్లోకి వచ్చే మోడల్‌గా రెనాల్ట్ డస్టర్ హైబ్రిడ్. దీపావళి సమయంలో హైబ్రిడ్ వెర్షన్‌ను తీసుకురావాలని రెనాల్ట్ ఇప్పటికే ప్రకటించింది. ఈ SUVలో 1.8 లీటర్, నాలుగు సిలిండర్ల పెట్రోల్ ఇంజిన్‌తో పాటు ఎలక్ట్రిక్ మోటార్ ఉండొచ్చని తెలుస్తోంది. ఇందులో 49bhp ఎలక్ట్రిక్ మోటార్, 20bhp హైబ్రిడ్ స్టార్టర్ జనరేటర్, 1.4kWh బ్యాటరీ ప్యాక్ ఉండే అవకాశం ఉంది. మొత్తం పవర్ సుమారు 160bhp వరకు ఉండొచ్చని అంచనా. ఈ పవర్‌ ట్రెయిన్‌తో డస్టర్ పనితీరుతో పాటు మెరుగైన మైలేజీని అందించే అవకాశం ఉంది.

2.హ్యుందాయ్ క్రెటా హైబ్రిడ్

హ్యుందాయ్ క్రెటా ఇప్పటికే భారత్ లో మంచి ఆదరణ పొందిన మిడ్‌సైజ్ SUVలలో ఒకటి. ఇప్పుడు కంపెనీ దీనికి స్ట్రాంగ్ హైబ్రిడ్ వెర్షన్‌ను తీసుకురావడానికి రెడీ అవుతోంది. క్రెటా హైబ్రిడ్ 2027లో మార్కెట్లోకి వచ్చే అవకాశం ఉంది. అయితే, దీని ఇంజిన్, బ్యాటరీ, ఎలక్ట్రిక్ మోటార్ లాంటి పూర్తి వివరాలను హ్యుందాయ్ ఇంకా వెల్లడించలేదు. ట్రాఫిక్‌లో తక్కువ వేగంతో ప్రయాణిస్తున్నప్పుడు ఎలక్ట్రిక్ మోటార్ సహాయం అందించడం వల్ల పెట్రోల్ వినియోగాన్ని తగ్గించే అవకాశం ఉంటుంది.

3.కియా సెల్టోస్ హైబ్రిడ్

హ్యుందాయ్ క్రెటాతో పాటు కియా సెల్టోస్ కూడా హైబ్రిడ్ టెక్నాలజీని అందుకోనుంది. సెల్టోస్ హైబ్రిడ్ 2027లో భారత మార్కెట్లోకి వచ్చే అవకాశం ఉందని తెలుస్తోంది. హ్యుందాయ్, కియా మధ్య ఉన్న టెక్నాలజీ భాగస్వామ్యాన్ని చూస్తే, భవిష్యత్ సెల్టోస్ హైబ్రిడ్‌ లో క్రెటా హైబ్రిడ్‌కు దగ్గరగా ఉండే పవర్‌ ట్రెయిన్‌ను ఉపయోగించే అవకాశం ఉంది. పెట్రోల్ వెహికల్ కంటే మెరుగైన ఇంధన సామర్థ్యం కావాలనుకునే వారికి, అదే సమయంలో పూర్తిగా ఎలక్ట్రిక్ కారుకు మారడానికి సిద్ధంగా లేని వారికి ఈ మోడల్ బెస్ట్ ఆప్షన్ గా చెప్పుకోవచ్చు.

హైబ్రిడ్ SUVలకు పెరుగుతున్న డిమాండ్

భారత మార్కెట్లో హైబ్రిడ్ వాహనాలకు ఆదరణ క్రమంగా పెరుగుతోంది. ముఖ్యంగా మంచి మైలేజీ, సౌకర్యం, పెట్రోల్ ఇంజిన్ అందించే సుదూర ప్రయాణ సామర్థ్యం కోరుకునే వినియోగదారులకు ఇవి ఆసక్తికరంగా మారుతున్నాయి. డస్టర్, క్రెటా, సెల్టోస్ హైబ్రిడ్ వెర్షన్లు మార్కెట్లోకి వస్తే మిడ్‌సైజ్ SUV విభాగంలో పోటీ మరింత పెరగనుంది.