పాముతో పెళ్లి, నదిలో అద్భుతం.. బతుకమ్మ పాటల్లో ఆ పేర్లలో ఉన్న రహస్యం ఇదే!

Bathukamma Story: ధర్మపురి ప్రజల ప్రచారంలో ఉన్న పురాణగాథ ప్రకారం.. చిందు దేశాన్ని పరిపాలించే రాజు కుమార్తె విజయ. ఆమెకు కుజదోషం ఉండటంతో ఎన్ని వివాహ సంబంధాలు చూసినా పెళ్లి కుదరలేదు. దీంతో తన కుమార్తెకు వివాహం చేయాలని రాజు మంత్రిని కోరాడు. అయితే.. రాజుపై కుట్ర పన్నిన మంత్రి, విజయకు కుజదోషం ఉందనే కారణంతో కత్తికి బాసింగం కట్టి, నాగుపాముతో ఆమెకు వివాహం జరిపించాడు. ఆ తర్వాత విజయ తన పేరును సత్యవతిగా మార్చుకుని, నాగుపామునే తన భర్తగా స్వీకరించింది.

పవిత్ర గోదావరి నదిలో..

నాగుపాముతో కలిసి పుణ్యక్షేత్రాలను దర్శించుకుంటూ సత్యవతి ధర్మపురికి చేరుకుంది. పవిత్ర గోదావరి నదిలో స్నానం చేయాలనే సంకల్పంతో నదిలోకి దిగి మూడు మునకలు వేసింది. అంతే నాగుపాము స్థానంలో అందమైన యువకుడు ప్రత్యక్షమయ్యాడని పురాణగాథ చెబుతోంది. దీంతో సత్యవతి అతని చేయి పట్టుకుని నదిలో నుంచి బయటకు వచ్చింది. ఆ యువకుడే ధర్మాంగదుడు. అయితే.. ఈ అద్భుతాన్ని చూసిన ప్రజలు సత్యవతిపై అనుమానాలు వ్యక్తం చేశారు. నాగుపామును చంపేసి మరో యువకుడితో బయటకు వచ్చిందంటూ నిందలు వేశారు. దీంతో తన పాతివ్రత్యాన్ని నిరూపించుకోవాలని సత్యవతి నిర్ణయించుకుంది.

Also read: కోల్‌కతాలోని రోడ్లకు ఇలా రంగులు ఎందుకు వేస్తున్నారు? దాని కోసమేనా?

ఆమె ప్రతిజ్ఞకు గుర్తుగా..

తన పవిత్రతకు సాక్ష్యంగా సత్యవతి ఓ ప్రతిజ్ఞ చేసిందని స్థానిక పురాణగాథలు చెబుతున్నాయి. ధర్మపురిలోని ఇసుకను చేతితో పైకి విసిరి.. ఆ ఇసుక ఎంత ఎత్తుకు చేరుతుందో అంత ఎత్తులో రాతి స్తంభం ఏర్పడాలని కోరుకుందని విశ్వసిస్తారు. ఆమె ప్రతిజ్ఞకు గుర్తుగా రాతి స్తంభం ప్రత్యక్షమైందనేది స్థానికుల విశ్వాసం. నేటికీ ధర్మపురిలోని సత్యవతి ఆలయంలో ఈ స్తంభాన్ని చూడవచ్చని చెబుతారు. అయితే, ధర్మాంగదుడు, సత్యవతి దంపతులకు వరుసగా తొంభై తొమ్మిది మంది సంతానం కలిగినా వారు మరణించారని పురాణగాథ వివరిస్తుంది. వందవ బిడ్డ జన్మించిన తర్వాత కూడా తన సంతానం ఎందుకు నిలవడం లేదని సత్యవతి ఓ పండితుడిని అడిగింది.

ఆ బిడ్డకు సత్యవతి బతుకమ్మ..

అప్పుడు ధర్మపురి క్షేత్రంలో కొలువై ఉన్న శ్రీలక్ష్మీనరసింహస్వామిని దర్శించుకోవాలని పండితుడు సూచించినట్లు ఈ కథనం చెబుతుంది. కుజదోష నివారణ కోసం స్వామివారిని దర్శించుకోవాలని సలహా ఇచ్చాడని స్థానికంగా ప్రచారంలో ఉన్న గాథ వివరిస్తుంది. దీంతో సత్యవతి తన భర్త ధర్మాంగదుడితో కలిసి ధర్మపురికి వచ్చి శ్రీలక్ష్మీనరసింహస్వామిని దర్శించుకుంది. ఆ తర్వాత వారికి వందవ సంతానం కలిగిందని ఆ బిడ్డకు సత్యవతి బతుకమ్మ అని పేరు పెట్టిందని పురాణగాథ చెబుతోంది. ఇలా సత్యవతి, ధర్మాంగదుల కథకు బతుకమ్మ పండుగతో సంబంధం ఉందనేది ధర్మపురి ప్రాంతంలో ప్రచారంలో ఉన్న ఒక పురాణగాథ. అందుకే బతుకమ్మ పాటల్లో ధర్మాంగదుడు, సత్యవతి పేర్లు వినిపిస్తాయని చెబుతారు.

Also read: 2027 వరల్డ్ కప్‌లో టీమిండియా, పాక్ మధ్య ఫైనల్స్ జరిగేలా ఐసీసీ కుట్రలు