చమురు నిలిపివేత.. రాబోయే ఆర్థిక భూతం.. మన జేబులకు ఎంత చిల్లు పడనుంది?

US- Iran Conflict: పశ్చిమాసియా నేడు తీవ్ర సంక్షోభంలో కూరుకుపోయింది. విద్వేషపు మాటలు, యుద్ధ విమానాల భయంకర శబ్దాలు, ప్రతీకార హెచ్చరికల మధ్య అక్కడ ఏ నగరం చూసినా, ఏ గల్లీ చూసినా సామాన్య ప్రజల ఆక్రందనలే వినిపిస్తున్నాయి. అమెరికా, ఇరాన్ దేశాల అగ్ర నేతల ఆధిపత్య పోరులో సామాన్యుల జీవితాలు బలికావడం అత్యంత విచారకరం.

ఆధిపత్య పోరులో నలిగిపోతున్న అమాయకులు

ఒకవైపు అమెరికా కఠిన హెచ్చరికలతో విరుచుకుపడుతుంటే, మరోవైపు ఇరాన్ ప్రతిదాడి హెచ్చరికలతో ఉద్రిక్తతలను మరింత పెంచుతోంది. ఈ రాజకీయం వెనుక నలిగిపోతున్నది మాత్రం నిరుపేదలు, సామాన్య పౌరులే. తుపాకీ గొట్టాల మధ్య, బాంబుల మోతల నడుమ విలపిస్తున్న వేలాది కుటుంబాల రోదనలు ఏ అగ్రరాజ్యానికి పట్టడం లేదు. యుద్ధాల్లో కూలిపోతున్నది కేవలం భవనాలు, వంతెనలు మాత్రమే కాదు.. ఎన్నో కుటుంబాల భవిష్యత్తు, ఆశలు కూడా.

ప్రపంచాన్ని వణికిస్తున్న చమురు సంక్షోభం

పశ్చిమాసియా సంక్షోభం కేవలం ఆ ప్రాంతానికే పరిమితం కాకుండా ప్రపంచం మొత్తంపైనా ముప్పు తెచ్చిపెడుతోంది. ‘మేం చమురు అమ్మకపోతే.. ప్రపంచంలో ఇంకెవరినీ అమ్మనివ్వం’ అన్నట్టుగా పరిస్థితి మారింది. ఎర్ర సముద్రం నుండి ప్రధాన జలసంధుల వరకు చమురు ట్యాంకర్లపై దాడులు జరుగుతున్నాయి. ఫలితంగా చమురు సరఫరా నిలిచిపోయి, ప్రపంచవ్యాప్తంగా నిత్యావసరాల ధరలు పెరిగే ప్రమాదం పొంచి ఉంది. ఇప్పటికే ఆర్థిక సమస్యలతో సతమతమవుతున్న పేద, మధ్యతరగతి ప్రజలకు ఇది మరింత భారంగా మారనుంది.

శాంతి ఎలా సాధ్యం?

ఈ విధ్వంసకర యుద్ధానికి ముగింపు పలకాలంటే అంతర్జాతీయ సమాజం తక్షణమే స్పందించాలి. ఐక్యరాజ్యసమితితో పాటు ప్రపంచ దేశాలు చొరవ తీసుకుని ఇరుపక్షాల మధ్య రాయబారాలు నడపాలి. పంతాలు పక్కన పెట్టి దౌత్యపరమైన చర్చల ద్వారానే సమస్యలను పరిష్కరించుకోవాలి. ఆధిపత్యం కంటే మానవత్వమే ముఖ్యమని గ్రహించి, ఆయుధాల హోరును ఆపినప్పుడే ఆ ప్రాంతంలో శాంతి అలలు మళ్లీ వికసిస్తాయి.

Also Read: ‘వైసీపీ విమర్శిస్తుంటే సైలెంట్‌గా ఉంటారా?’.. క్యాబినెట్‌లో మంత్రులకు బాబు క్లాస్!