GST without a physical office| దేశవ్యాప్తంగా మీ ఉత్పత్తులను విక్రయించాలంటే ప్రతి రాష్ట్రంలోనూ ప్రత్యేకంగా షాపు లేదా ఆఫీస్ తెరవాల్సిందేనా? చిన్న వ్యాపారులకు అలాంటి అవసరం లేకుండా జిఎస్‌టి (GST) రిజిస్ట్రేషన్ పొందే అవకాశం ఉంది. ఈ – కామర్స్ ప్లాట్‌ఫామ్‌ల ద్వారా వస్తువులను విక్రయించే వ్యాపారులకు జిఎస్‌టి నిబంధనల్లో ప్రత్యేక వెసులుబాటు కల్పించారు. దీని ప్రకారం.. కొన్ని కండీషన్స్ పాటిస్తే ఇతర రాష్ట్రాల్లో సొంత కార్యాలయం లేకుండానే రిజిస్ట్రేషన్ పొందవచ్చు. ఈ సదుపాయం ఎలా పనిచేస్తుంది? ఎవరికి ప్రయోజనం కలుగుతుంది? దరఖాస్తు ఎలా చేసుకోవాలి? తెలుసుకుందాం.
జిఎస్‌టి నిబంధన 14B ప్రకారం.. అర్హత కలిగిన చిన్న వ్యాపారులు ఇతర రాష్ట్రాల్లో సొంత ఆఫీస్ లేదా షాపు లేకుండానే రిజిస్ట్రేషన్ పొందవచ్చు. ఇందుకోసం సంబంధిత ఈ కామర్స్ కంపెనీకి చెందిన గోడౌన్‌ని తమ ప్రధాన వ్యాపార ప్రదేశంగా (ప్రిన్సిపాల్ ప్లేస్ ఆఫ్ బిజినెస్ లేదా PPoB) ప్రకటించవచ్చు. ఈ సదుపాయం ఐచ్ఛికంగా అందుబాటులో ఉంటుంది. దీని ముఖ్య ఉద్దేశం చిన్న వ్యాపారులు దేశవ్యాప్తంగా తమ ఉత్పత్తులను సులభంగా విక్రయించేలా ప్రోత్సహించడం.
జిఎస్‌టి చట్టంలోని సెక్షన్ 52 ప్రకారం.. పన్ను వసూలు చేసే ఈ కామర్స్ ఆపరేటర్ల ద్వారా వస్తువులను విక్రయించే వ్యాపారులు ఈ సదుపాయానికి అర్హులు. వ్యాపారికి మరో రాష్ట్రంలో సొంత కార్యాలయం లేకపోయినా, అక్కడ ఈ-కామర్స్ సంస్థ గిడ్డంగి ఉంటే రిజిస్ట్రేషన్ కోసం దరఖాస్తు చేసుకోవచ్చు. అయితే, ఈ రిజిస్ట్రేషన్ ద్వారా సంబంధిత ఈ-కామర్స్ ప్లాట్‌ఫామ్‌లోనే వస్తువులను విక్రయించాలి.
నమోదైన వ్యక్తులకు చేసే సరఫరాలపై వ్యాపారి నెలవారీ అవుట్‌పుట్ పన్ను బాధ్యత రూ.2.5 లక్షలకు మించకూడదు. ఇందులో సిజిఎస్‌టి, ఐజిఎస్‌టి లేదా యుటిజిఎస్‌టి, ఐజిఎస్‌టి పన్నులు కూడా ఉంటాయి. అందువల్ల, దరఖాస్తు చేసుకునే ముందు వ్యాపారులు తమ పన్ను బాధ్యతను సరిగ్గా లెక్కించుకోవాలి.
ఈ పథకం కింద ఒక PAN ఆధారంగా ఒక్కో రాష్ట్రం లేదా కేంద్రపాలిత ప్రాంతంలో ఒక రిజిస్ట్రేషన్ మాత్రమే పొందవచ్చు. వ్యాపారి తన సొంత రాష్ట్రంలో ఉన్న GSTIN వివరాలను కూడా సమర్పించాలి. అలాగే, వ్యాపారికి స్వస్థల రాష్ట్రంలో సాధారణ జిఎస్‌టి రిజిస్ట్రేషన్ ఇప్పటికే ఉండాలి. కేవలం నిబంధన 14B లేదా 14A కింద పొందిన రిజిస్ట్రేషన్ ఆధారంగా ఈ సదుపాయాన్ని ఉపయోగించలేరు.
Also Read: ఇంజినీర్ జాబ్ మానేసి రాపిడో డ్రైవర్ పనికి.. ఇప్పుడు నెలకు రూ.1.2 లక్ష ఆదాయం
వ్యాపారులు జిఎస్‌టి కామన్ పోర్టల్‌లో జిఎస్‌టి REG-01 ఫామ్ ద్వారా దరఖాస్తు చేసుకోవాలి. సంబంధిత రాష్ట్రంలో నిబంధన 14B కింద రిజిస్ట్రేషన్ పొందే ఎంపికను ఎంచుకోవాలి. దరఖాస్తులో స్వస్థల GSTIN, ఈ కామర్స్ గోడౌన్ చిరునామా, అవసరమైన ఇతర వివరాలను నమోదు చేయాలి. అదనపు గిడ్డంగులను వ్యాపార ప్రదేశాలుగా ప్రకటిస్తే, వాటి వివరాలను కూడా అందించాలి.
ఈ ప్రక్రియలో స్వస్థల రాష్ట్రంలో ఆధార్ ఆధారిత బయోమెట్రిక్ ధ్రువీకరణ, భౌతిక పరిశీలన కూడా తప్పనిసరి.
ఈ జిఎస్‌టి సదుపాయం చిన్న వ్యాపారులకు ఇతర రాష్ట్రాల్లో తమ మార్కెట్‌ను విస్తరించుకునే అవకాశాన్ని కల్పిస్తుంది. అయితే, దరఖాస్తు చేసే ముందు తాజా నిబంధనలు, అర్హతలు, పన్ను పరిమితులను పరిశీలించాలి.
Also Read: ఫ్రెషర్లకు కూడా స్కిల్స్, అనుభవం అడుగుతున్న కంపెనీలు.. మరి మొదటి అవకాశం ఎవరిస్తారు?
Share
సానియా మీర్జా సంచ‌ల‌న నిర్ణ‌యం...మసీదు కోసం స్థ‌లం విరాళం ?
మొబైల్ యూజర్లకు బిగ్ అలర్ట్.. నవంబర్ 1 నుంచి కొత్త రూల్.. ఇది మీ మంచికే బాస్!
