అదాయ పన్ను రిటర్న్స్ ఫైలింగ్ జూలై 31 చివరి తేదీ.. కానీ అందరికీ కాదు.. వీరికి మినహాయింపు

ITR Deadline| ప్రతి పన్ను చెల్లింపుదారుడు జూలై 31లోపు ఆదాయపు పన్ను రిటర్న్ (ITR) దాఖలు చేయాలని చాలామంది అనుకుంటారు. అయితే ఇది ప్రతి ఒక్కరికీ వర్తించదు. మీ ఆదాయం ఏ వనరు నుంచి వస్తుందో, మీరు ఏ ఐటీఆర్ ఫామ్ దాఖలు చేయాలో బట్టి గడువు తేదీ మారుతుంది. అందువల్ల ముందుగా మీకు వర్తించే గడువును తెలుసుకోవడం చాలా ముఖ్యం.

జూలై 31లోపు ఎవరు ఐటీఆర్ దాఖలు చేయాలి?

జీతం పొందే ఉద్యోగులు, పెన్షనర్లు, ఇంటి అద్దె ఆదాయం పొందేవారు సాధారణంగా జూలై 31లోపు ఐటీఆర్ దాఖలు చేయాలి. అలాగే మూలధన లాభాలు లేదా వడ్డీ వంటి ఇతర ఆదాయం ఉన్నవారికి కూడా ఇదే గడువు వర్తిస్తుంది. వీరిలో ఎక్కువ మంది ఐటీఆర్ 1 లేదా ఐటీఆర్ 2 ఫామ్‌లను ఉపయోగిస్తారు. మీకు ఇతర బిజినెస్ లేదా ప్రొఫెషనల్ ఇన్‌కం లేకపోతే మీకు అందరి లాగే జూలై 31 చివరి తేదీ అవుతుంది.

ఆగస్టు 31 వరకు సమయం ఎవరికి ఉంటుంది?

కొంతమంది పన్ను చెల్లింపుదారులకు అదనపు సమయం ఉంటుంది. బిజినెస్ లేదా ఇతర వృత్తి ఆదాయం ఉన్నవారు, కానీ వారి ఖాతాలకు ట్యాక్స్ ఆడిట్ అవసరం లేని వారు ఆగస్టు 31 వరకు ఐటీఆర్ దాఖలు చేయవచ్చు. ఇందులో ఫ్రీలాన్సర్లు, కన్సల్టెంట్లు, స్వతంత్ర నిపుణులు, చిన్న వ్యాపార యజమానులు ఉంటారు. వీరు సాధారణంగా ఐటీఆర్ 3 లేదా ఐటీఆర్ 4 ఫామ్‌లను దాఖలు చేస్తారు.

మీకు ఏ గడువు వర్తిస్తుందో ఎలా తెలుసుకోవాలి?

ముందుగా మీ ఆదాయ స్వభావాన్ని పరిశీలించండి. మీకు వ్యాపార లేదా వృత్తి ఆదాయం లేకపోతే జూలై 31 గడువు వర్తించే అవకాశం ఎక్కువ. బిజినెస్ నుంచి ఆదాయం ఉన్నా.. ట్యాక్స్ ఆడిట్ అవసరం లేకపోతే ఆగస్టు 31 వరకు సమయం ఉంటుంది. ఆడిట్ చేయాల్సిన ఖాతాలు ఉన్నవారికి ప్రత్యేక చట్టబద్ధమైన గడువు ఉంటుంది.

ఆదాయ రకం ఎందుకు ముఖ్యమైనది?

మీ ఆదాయం ఏ వనరు నుంచి వస్తుందో దానిపైనే మీరు దాఖలు చేయాల్సిన ఐటీఆర్ ఫామ్ ఆధారపడి ఉంటుంది. అదే మీ రిటర్న్ గడువును కూడా నిర్ణయిస్తుంది. అందరికీ ఒకే తేదీ వర్తిస్తుందని భావించడం వల్ల అనవసరమైన సమస్యలు ఎదురయ్యే అవకాశం ఉంది.

గడువు దాటితే ఏమవుతుంది?

సమయానికి ఐటీఆర్ దాఖలు చేయకపోతే పెనాల్టీ (ఆలస్య రుసుము) చెల్లించాల్సి రావచ్చు. చెల్లించాల్సిన పన్నుపై వడ్డీ కూడా విధించే అవకాశం ఉంటుంది. కొన్ని పన్ను ప్రయోజనాలు కోల్పోయే ప్రమాదం ఉంది. అలాగే మీ రీఫండ్ ప్రాసెస్ కూడా ఆలస్యం కావచ్చు.

Also Read: నెలకు రూ.10 లక్షల వరకు జీతం.. ప్రపంచమంతా తిరిగిరావొచ్చు.. ఇంటర్మీడియట్ ఉంటే చాలు

ముందుగానే దాఖలు చేయడం మంచిది

చివరి రోజు వరకు వేచి ఉండకుండా ముందుగానే ఐటీఆర్ దాఖలు చేయడం ఉత్తమం. ఇలా చేస్తే సాంకేతిక సమస్యలను నివారించవచ్చు. అవసరమైన పత్రాలను ముందుగానే సిద్ధం చేసుకుని వివరాలను ఒకసారి పరిశీలించిన తర్వాత మాత్రమే రిటర్న్ సమర్పించాలి.

ఐటీఆర్ దాఖలు చేసే చివరి తేదీ అందరికీ ఒకేలా ఉండదు. మీ ఆదాయం, మీరు ఉపయోగించే ఐటీఆర్ ఫామ్ ఆధారంగా గడువు నిర్ణయించబడుతుంది. సరైన తేదీని ముందుగానే నిర్ధారించుకుని సమయానికి రిటర్న్ దాఖలు చేస్తే జరిమానాలు, వడ్డీ, ఇతర ఇబ్బందులను సులభంగా నివారించవచ్చు.

Also Read: కేంద్ర ప్రభుత్వ ఉద్యోగులకు సాలరీ పెరిగేది అప్పుడే.. 8వ పే కమిషన్ అప్‌డేట్ ఇదిగో