Natti Kumar: టాలీవుడ్ పెద్దలు జూన్ 15 న ఏపీ సీఎం చంద్రబాబుతో భేటీ కానున్న సంగతి తెల్సిందే. గత కొన్నిరోజులుగా ఇండస్ట్రీలో జరుగుతున్న సంఘటనల గురించి ఏపీ ప్రభుత్వంతో చర్చించనున్నారు. సినీ పరిశ్రమ అభివృద్ధితో పాటు.. ఇండస్ట్రీలో ఉన్న సమస్యలను కూడా ఏకరువు పెట్టనున్నారు. ఈ సమావేశానికి ఏపీ డిప్యూటీ సీఎం, నటుడు పవన్ కళ్యాణ్ సారథ్యం వహించనున్నారు. జూన్ 15 న టాలీవుడ్ లోని పెద్ద నిర్మాతలు, డైరెక్టర్లు, నటులు మొత్తం కలిసి 52 మంది ఈ భేటీలో పాల్గొననున్నారని తెలుస్తోంది. అయితే అందరూ పెద్ద పెద్దవారిని తప్ప చిన్న సినిమాల నిర్మాతలను పిలవడం లేదని, ఈ భేటీకి తనకు ఆహ్వానం రాలేదని నిర్మాత నట్టి కుమార్ ఆవేదన వ్యక్తం చేశాడు.
పవన్ కళ్యాణ్ అందరినీ సమానంగాగా పిలవమని కోరినా సినిమాటోగ్రఫీ మంత్రి మాత్రం కొందరిని మాత్రమే ఆహ్వానించడాని వాపోయాడు. అందరి కంటే ఎక్కువ తమలాంటి సినిమా నిర్మాతలకే ఎక్కువ సమస్యలు ఉన్నాయని, దయచేసి తమ డిమాండ్లను కూడా దృష్టిలో ఉంచుకోవాలని కోరుతూ నట్టి కుమార్.. ఏపీ ప్రభుత్వానికి బహిరంగంగా లేక రాశాడు. ఈ లేఖలో తాము ఎదుర్కుంటున్న సమస్యలకు పరిష్కారం తెలపాలని కోరాడు. “నేను నట్టి కుమార్, తెలుగు సినీ ప్రొడ్యూసర్స్ కౌన్సిల్ జాయింట్ సెక్రటరీ, మాజీ ప్రొడ్యూసర్స్ సెక్టార్ చైర్మన్, తెలుగు ఫిలిం ఛాంబర్ అఫ్ కామర్స్, ఫిలిం డిస్ట్రిబ్యూటర్, ఎగ్జిబిటర్..
గౌరవనీయులు ఆంధ్రప్రదేశ్ సీఎం, డిప్యూటీ సీఎంల ఆధ్వర్యంలో 15-06-2025వ తేదీన (ఆదివారం) తెలుగు సినీ పరిశ్రమకు సంబంధించిన సమావేశం ఏర్పాటు చేయడం శుభపరిణామం. అయితే డిప్యూటీ సీఎం శ్రీ పవన్ కల్యాణ్ గారు దాదాపు పదిరోజుల క్రితం మాట్లాడిన మాటల్లో ఫిలిం ఛాంబర్, ప్రొడ్యూసర్స్ కౌన్సిల్స్ ఆధ్వర్యంలో మాత్రమే ప్రభుత్వాన్ని కలవాలని చెప్పారు. అలా వారు చెప్పడం మా అందరిలో చాలా సంతోషాన్ని కలిగించింది. కానీ ఆ తర్వాత ఎక్కడ కమ్యూనికేషన్ గ్యాప్ జరిగిందో తెలియదు కానీ డైరెక్ట్ గా సినిమాటోగ్రఫీ మంత్రి కొందరు సినీ పరిశ్రమ పెద్ద సినిమాల వాళ్ల పేర్లను మాత్రమే ఆదివారం మీటింగ్ కు 52 మందిని ఆహ్వానించడం జరిగింది. ఈ పిలుపులో పెద్ద నిర్మాతలు , పెద్ద డైరెక్టర్స్ , పెద్ద హీరోలు తప్ప చిన్న చిత్రాల నిర్మాతలకు ప్రాతినిధ్యమే లేకపోవడం బాధాకరమైన విషయం.
చిన్న చిత్రాల నిర్మాతల సమస్యలు ఎప్పట్నుంచో పెండింగ్ లో ఉన్నాయి. కూటమి ప్రభుత్వం అధికారంలోనికి వస్తే, తమ సమస్యలు పరిష్కారం అవుతాయని చిన్న చిత్రాల నిర్మాతలు వేయి కళ్ళతో ఎదురు చూస్తున్నారు. ముఖ్యంగా చిన్న చిత్రాల నిర్మాతలు సుదీర్ఘంగా విజ్ఞప్తి చేస్తున్నది తమరి దృష్టికి తీసుకుని వస్తున్నాను. దయచేసి పెద్ద మనసుతో చిన్న చిత్రాల నిర్మాతల సమస్యలను పరిష్కరించాలని ఆంధ్రప్రదేశ్ కు చెందిన వ్యక్తిగా తమరికి మనవి చేస్తున్నాను.
సినిమా థియేటర్లలో 5 (ఐదు) షోలకు సంబంధించి, మధ్యాహ్నం 2-30 గంటల షోను తప్పనిసరిగా చిన్న చిత్రాలకు కేటాయించాలన్న డిమాండ్ ఎప్పట్నుంచో పెండింగ్ లో ఉన్నది. 175 స్క్రీన్స్ లోపు రిలీజ్ చేసే చిన్న చిత్రాలకు 2-30 గంటల షోను కేటాయించామని పోరాటం జరుగుతూనే ఉంది.
అలాగే మల్టీఫ్లెక్స్ లలో సీటింగ్ కెపాసిటీ లో 20% ఆక్యుపెన్సీ టిక్కెట్ ధరను 75/- రూపాయలుగా నిర్ణయిస్తూ, జీవో ఉన్నప్పటికీ, దానిని ఎవరూ అమలు పరచడం లేదు. ముఖ్యంగా ఈ రెండు సమస్యలు పరిష్కారం కావాలన్నది చిన్న చిత్రాల నిర్మాతల కల. వాస్తవానికి చిత్ర పరిశ్రమలో ఏడాదికి సరాసరి 200 సినిమాలు నిర్మాణం అయితే అందులో 150 వరకు చిన్న సినిమాలే ఉంటాయన్నది అందరికీ తెలిసిందే. చిన్న చిత్రాలను ఆధారం చేసుకుని ఎంతోమంది సాంకేతిక నిపుణులు, ఆర్టిస్టులు, కార్మికులు జీవనం సాగిస్తున్నారు. కానీ చిన్న చిత్రాల నిర్మాతల సమస్యలు మాత్రం అలాగే మిగిలి ఉన్నాయి. వీటిని పరిశీలించవలసిందిగా తమరికి విజ్ఞప్తి చేస్తున్నాను.
ఇక ఆదివారం ఆంధ్ర ప్రదేశ్ లో జరగబోయే మీటింగ్ కు వస్తున్న సినీ పెద్దలకు 35 శాతం సినిమా షూటింగ్ తప్పనిసరిగా ఆంధ్రప్రదేశ్ లోనే జరపాలని తమరు ఆదేశించాలని కోరుతున్నాను వాస్తవానికి ఏపీ నుంచి సినిమా రెవిన్యూ 68 శాతం పరిశ్రమకు లభిస్తే, 32 శాతం నైజాం నుంచి లభిస్తోంది. ఈ విషయాన్ని మీరు పరిగణలోనికి తీసుకోవాలని విజ్ఞప్తి చేస్తున్నాను.
అలాగే ఆంధ్రప్రదేశ్ లో చిత్ర పరిశ్రమ, అలాగే టూరిజం అభివృద్ధి చెందాలంటే infrastructure అభివృద్ధి కావాల్సిన అవసరం ఎంతైనా ఉంది. GST లను కూడా ఆంధ్రప్రదేశ్లోనే కట్టేవిధంగా సినీ పెద్దలకు సూచించాలని తమరిని కోరుతున్నాను. వీటివల్ల ఎంప్లాయిమెంట్ పెరుగుతుంది. ఏపీకి చెందిన వ్యక్తిగా ఆంధ్రప్రదేశ్ అభివృద్ధి చెందాలి, అలాగే సినీపరిశ్రమ, చిన్న చిత్రాల నిర్మాతలకు మేలు జరగాలన్న సదాశయంతో ఈ విజ్ఞాపన పత్రాన్ని తమరికి రాయడం, మీ దృష్టికి తేవడం జరుగుతోంది” అంటూ తన ఆవేదనను వెళ్లగక్కాడు. ప్రస్తుతం ఈ లేఖ సోషల్ మీడియాలో వైరల్ గా మారింది. మరి ఈ లేఖలోని అంశాలను ఏపీ ప్రభుత్వం పరిగణలోకి తీసుకుంటుందా.. ? లేదా.. ? అనేది తెలియాల్సి ఉంది.
Share
Tips For Hair Fall: ఈ సింపుల్ టిప్స్ పాటిస్తే.. జుట్టు ఊడమన్నా ఊడదు
Director vetrimaran: సినిమా స్టైల్ లో వెట్రిమారన్ లవ్ స్టోరీ.. ఆమె తండ్రి ఏం చేశాడంటే?
