Flight Instructor: విమానం గాల్లో ఎగురుతుండగా.. పైలట్ సీట్లో ఉన్న గురువు అకస్మాత్తుగా కిందికి దూకేస్తే.. ఆ సీన్ ఊహించుకుంటేనే వెన్నులో వణుకు పుడుతుంది. సరిగ్గా ఇలాంటి ఊహించని, గుండె ఆగిపోయేంత భయాందోళనకరమైన ఘటనే అర్జెంటీనాలో జరిగింది. ట్రైనింగ్ ఇస్తున్న సమయంలోనే ఓ ఫ్లైట్ ఇన్స్ట్రక్టర్ విమానం నుంచి దూకి ఆత్మహత్యకు పాల్పడటం ఇప్పుడు అంతర్జాతీయంగా తీవ్ర కలకలం రేపుతోంది.
‘ఏం చేయాలో నీకు తెలుసు..’
అర్జెంటీనాలోని టొలెడా ప్రాంతంలో ఉన్న ‘ఫ్లయింగ్ ప్యారెట్ కార్డొబా ఫ్లయింగ్ స్కూల్’లో లియాండ్రో ఆండ్రెస్ (42) సీనియర్ ఇన్స్ట్రక్టర్గా పనిచేస్తున్నారు. గత వారం ఆయన ఓ విద్యార్థిని విమానంలో తీసుకెళ్లి ఆకాశంలో ట్రైనింగ్ ఇస్తున్నారు. విమానం గాల్లో ఉండగానే.. లియాండ్రో అకస్మాత్తుగా తన హెడ్సెట్, సీట్ బెల్ట్ విప్పేశారు. ఏం జరుగుతుందోనని ఆ స్టూడెంట్ కంగారుపడుతుండగానే.. ‘ఏం చేయాలో నీకు తెలుసు.. ఆ ప్రకారమే నడుచుకో’ అని చెప్పి విమానం డోర్ తెరిచి కిందకు దూకేశారు.
Also Read: మమ్మల్ని కొన్నాళ్లు పని చేయనివ్వండి.. విపక్షాలకు సీఎం రేవంత్ రెడ్డి స్ట్రాంగ్ కౌంటర్!
సురక్షితంగా రన్వేపై ల్యాండింగ్
కళ్లముందే గురువు గాల్లోకి దూకేయడంతో ఆ విద్యార్థి ఒక్కసారిగా షాక్కు గురయ్యాడు. అయితే, ప్రాణాలు కాపాడుకోవాలనే పట్టుదలతో గుండె నిబ్బరం తెచ్చుకున్నాడు. తనకు గుర్తున్న మెలకువలతో, ఎంతో చాకచక్యంగా వ్యవహరించి విమానాన్ని సురక్షితంగా రన్వేపై ల్యాండ్ చేశాడు. దీంతో ఒక పెద్ద ప్రమాదం తప్పడమే కాకుండా, ఆ విద్యార్థి ప్రాణాలతో బయటపడ్డాడు.
యాజమాన్యం విస్మయం
ఈ విషాద ఘటనపై ఫ్లయింగ్ స్కూల్ డైరెక్టర్ ఎడ్వర్డో అల్వారెజ్ దిగ్భ్రాంతి వ్యక్తం చేశారు. లియాండ్రో ఎంతో అనుభవజ్ఞుడని, ఆయన మనసులో ఇలాంటి ఆత్మహత్య ఆలోచనలు ఉన్నాయని తాము అస్సలు ఊహించలేకపోయామని చెప్పారు. పైగా గాల్లో ప్రయాణిస్తున్నప్పుడు విమానం డోర్ తెరవడం చాలా కష్టమైన పని అని పేర్కొన్నారు. కాగా, ఘటనా స్థలానికి చేరుకున్న పోలీసులు లియాండ్రో మృతదేహాన్ని స్వాధీనం చేసుకుని, ఆయన అంత తీవ్ర నిర్ణయం తీసుకోవడానికి గల కారణాలపై దర్యాప్తు జరుపుతున్నారు.
Share
టెక్టన్ కోసం హృతిక్ రోషన్.. నిస్సాన్ మాస్టర్ ప్లాన్ మామూలుగా లేదుగా!
రూ.11 వేలకే..పెద్ద కుటుంబాలకు సరిపోయే వాషింగ్ మెషీన్
