Independence Day: మన దేశంలో ప్రతి ఏటా ఆగస్టు 15వ తేదీ వచ్చిందంటే చాలు పండగ వాతావరణం కనిపిస్తుంది. పాఠశాలల నుంచి ప్రభుత్వ కార్యాలయాల వరకు ఎక్కడ చూసినా మువ్వన్నెల జెండా రెపరెపలాడుతుంది. పరాయి పాలన నుంచి విముక్తి పొంది, మన దేశం సొంతంగా పరిపాలించుకోవడం ప్రారంభించిన అద్భుతమైన రోజది. అయితే ఈ ఆగస్టు 15వ తేదీ అనేది కేవలం భారత దేశానికి మాత్రమే పరిమితమైన ప్రత్యేకమైన రోజు కాదు. ప్రపంచ పటంలో మనతో పాటు మరికొన్ని దేశాలకు కూడా ఇదే రోజున స్వాతంత్ర్యం సిద్ధించింది. వేర్వేరు సంవత్సరాల్లో, వేర్వేరు పరిస్థితుల్లో ఆయా దేశాలు పరాయి దేశాల నుంచి విముక్తి పొందాయి. ఈ రోజే స్వేచ్ఛా వాయువులు పీల్చుకున్న ఆ ఐదు దేశాల గురించి ఇప్పుడు తెలుసుకుందాం.
ఈ జాబితాలో మనకు బాగా తెలిసిన దేశం దక్షిణ కొరియా. దాదాపు 35 ఏళ్లపాటు ఈ దేశం జపాన్ క్రూరమైన పాలన కింద నలిగిపోయింది. రెండవ ప్రపంచ యుద్ధంలో జపాన్ తీవ్రంగా నష్టపోయి ఓటమిని అంగీకరించిన తర్వాత, 1945లో ఆగస్టు 15న కొరియాకు విముక్తి లభించింది. అందుకే అక్కడ ప్రతి ఏటా ఈ రోజును చాలా ఘనంగా జరుపుకుంటారు. వారి భాషలో ఈ పండగను ‘గ్వాంగ్బోక్జియోల్’ అని పిలుస్తారు. దీని అర్థం వెలుగు తిరిగి వచ్చిన రోజు. జపాన్ అణచివేత నుంచి తమ దేశం స్వేచ్ఛను పొందినందుకు గుర్తుగా అక్కడి ప్రజలు ఈ రోజున దేశవ్యాప్తంగా పండగ వాతావరణంలో మునిగిపోతారు.
దక్షిణ కొరియాతో పాటు కొరియా ద్వీపకల్పంలో ఉన్న ఉత్తర కొరియా కూడా ఇదే రోజున స్వాతంత్ర్యాన్ని పొందింది. 1945 ఆగస్టు 15న జపాన్ వెనక్కి తగ్గినప్పుడు కొరియా దేశం స్వేచ్ఛను పొందింది. ఆ తర్వాతి కాలంలో రాజకీయ విభేదాల వల్ల అది రెండు ముక్కలుగా విడిపోయినప్పటికీ.. ఆరంభంలో లభించిన ఆ స్వేచ్ఛా దినాన్ని ఉత్తర కొరియా కూడా ఇప్పటికీ ఆగస్టు 15నే జరుపుకుంటుంది. అక్కడ ఈ రోజును ‘విముక్తి దినోత్సవం’ అని పిలుస్తారు. ఈ విధంగా ఒకే ప్రాంతానికి చెందిన రెండు వేర్వేరు దేశాలు ఒకే రోజున తమ స్వాతంత్ర్య దినోత్సవాన్ని జరుపుకోవడం ప్రపంచ చరిత్రలో ఒక విశేషంగా చెప్పుకోవచ్చు.
Also Read: లక్షన్నర iPhone 17 Pro Max రూ.98 వేలకే? కానీ ఆ ట్విస్ట్ తెలిస్తే షాక్ అవుతారు!
ఆఫ్రికా ఖండంలో ఉన్న ‘రిపబ్లిక్ ఆఫ్ కాంగో’ దేశానికి కూడా ఆగస్టు 15 ఎంతో ముఖ్యం. దాదాపు 85 ఏళ్లపాటు ఈ దేశం ఫ్రాన్స్ ఆధీనంలో ఉంది. ఫ్రెంచ్ పాలకులు అక్కడ సహజ వనరులను విపరీతంగా వాడుకున్నారు. ఎన్నో ఏళ్ల పోరాటాల తర్వాత, 1960 ఆగస్టు 15న కాంగో దేశానికి సంపూర్ణ స్వాతంత్ర్యం లభించింది. ఫ్రెంచ్ పాలన ముగిసి తమ సొంత ప్రభుత్వం ఏర్పాటు కావడంతో అక్కడి ప్రజలు దీనిని ‘కాంగో జాతీయ దినోత్సవం’గా జరుపుకోవడం ప్రారంభించారు.
మధ్య ప్రాచ్య ప్రాంతంలో ఉండే చిన్న ద్వీప దేశం బహ్రెయిన్. మన దేశం లాగే బహ్రెయిన్ కూడా బ్రిటిష్ పాలన కిందనే చాలా కాలం ఉంది. బ్రిటిష్ ప్రభుత్వంతో చేసుకున్న ఒప్పందాల వల్ల అక్కడ వారి ఆధిపత్యం ఎక్కువగా ఉండేది. 20వ శతాబ్దం మధ్యలో అక్కడి ప్రజలు స్వేచ్ఛ కోసం పెద్ద ఎత్తున నిరసనలు చేపట్టారు. దీని ఫలితంగా 1971 ఆగస్టు 15న బ్రిటిష్ దళాలు ఆ దేశం నుంచి పూర్తిగా వెనక్కి వెళ్లాయి. ఆ రోజునే బహ్రెయిన్ తనను తాను స్వతంత్ర దేశంగా ప్రకటించుకుంది. అయితే ఆ దేశ పాలకులు డిసెంబర్ 16న తమ జాతీయ దినోత్సవాన్ని జరుపుకున్నప్పటికీ, చరిత్ర ప్రకారం వారికి బ్రిటిష్ పాలన నుంచి నిజమైన స్వేచ్ఛ లభించింది మాత్రం ఆగస్టు 15నే.
యూరప్ ఖండంలో ఉన్న చాలా చిన్న దేశాలలో ‘లీచ్టెన్స్టెయిన్’ ఒకటి. ఈ దేశానికి 1866 లోనే జర్మనీ పాలన నుంచి విముక్తి లభించింది. కానీ వారు ఆగస్టు 15ని తమ జాతీయ దినోత్సవంగా ఎంచుకోవడానికి ఒక ఆసక్తికరమైన కారణం ఉంది. 1939లో ఆ దేశ ప్రభుత్వం తమ జాతీయ దినోత్సవాన్ని ఒక నిర్ణీత రోజున జరుపుకోవాలని భావించింది. అదే సమయంలో ఆగస్టు 15న వారి రాజు ‘ప్రిన్స్ ఫ్రాంజ్ జోసెఫ్ 2’ పుట్టినరోజు కూడా ఉండటంతో, ఆ రోజునే తమ జాతీయ దినోత్సవంగా ఖరారు చేశారు. నాటి నుంచి నేటి వరకు వారు ప్రతి ఏటా ఆగస్టు 15న తమ దేశ స్వాతంత్ర్యాన్ని, రాజు పుట్టినరోజును కలిపి ఎంతో వేడుకగా జరుపుకుంటారు. ఈ విధంగా ఆగస్టు 15వ తేదీ కేవలం మన దేశానికి మాత్రమే కాకుండా.. ప్రపంచంలో ఉన్న అనేక ఇతర దేశాలకు కూడా ఎంతో ప్రాముఖ్యత ఉన్న రోజుగా మారింది.
Also Read: ఆఫర్ల పండగ.. Flipkart Saleలో సగం ధరకే మోటరోలా 5G ఫోన్లు.. డోంట్ మిస్!
Share
రూ. 30 వేలలోపు నెక్స్ట్ లెవెల్ ఏఐ ఫోన్లు.. మధ్యతరగతికి పర్ఫెక్ట్ ఛాయిస్!
ఏపీకి గట్టి షాకిచ్చిన తెలంగాణ.. కృష్ణా నీళ్ల పంపకాలపై షాకింగ్ ట్విస్ట్!
