Gold volcano: అగ్నిపర్వతం అనగానే మనకు గుర్తొచ్చేది ఉప్పొంగే లావా, దట్టమైన పొగ, ప్రాణాలు తీసే విషవాయువులు. కానీ ఈ భూమ్మీద ఒక వింతైన అగ్నిపర్వతం మాత్రం వీటన్నింటికీ భిన్నంగా ఏటా కోట్ల రూపాయల విలువైన స్వచ్ఛమైన బంగారాన్ని గాల్లోకి వెదజల్లుతోంది. అంటార్కిటికాలోని మంచు ఖండంలో దాగున్న ఈ ప్రకృతి వింత శాస్త్రవేత్తలను సైతం ముక్కున వేలేసుకునేలా చేస్తోంది.
మంచు కొండల్లో మండుతున్న లావా సరస్సు..
ప్రపంచంలోనే అత్యంత దక్షిణాన, అంటార్కిటికాలోని ‘రాస్ ఐలాండ్’ లో కొలువై ఉన్న ‘మౌంట్ ఎరెబస్’ (Mount Erebus) ఒక సజీవ అగ్నిపర్వతం. దీని ప్రత్యేకత ఏమిటంటే, ఇందులో ఎప్పుడూ మరిగిపోయే ఒక లావా సరస్సు ఉంటుంది. శాస్త్రవేత్తల అంచనా ప్రకారం.. ఈ పర్వతం నుండి ప్రతిరోజూ దాదాపు 80 గ్రాముల అచ్చమైన బంగారం సూక్ష్మ కణాల (గోల్డ్ డస్ట్) రూపంలో బయటకు వస్తోంది. ప్రస్తుత మార్కెట్ ధరల ప్రకారం లెక్కిస్తే దీని విలువ రోజుకు సుమారు రూ. 5.6 లక్షలు కాగా, ఏడాదికి దాదాపు రూ. 19 కోట్ల పైమాటే!
వేల కిలోమీటర్లు ప్రయాణించే ‘బంగారు ధూళి’
ఇలా వెలువడే బంగారం మనం నగలు చేయించుకునేలా గడ్డలుగా ఉండదు. ఇవి కంటికి కనిపించనంత సూక్ష్మంగా, కేవలం 20 నుండి 60 మైక్రాన్ల పరిమాణంలో ఉండే స్ఫటికాలు. (ఒక మీటరును పది లక్షల భాగాలు చేస్తే వచ్చేదే ఒక మైక్రాన్). అగ్నిపర్వతం నుండి వచ్చే వాయువులతో కలిసి ఈ బంగారు రేణువులు గాల్లో తేలుతూ ఏకంగా వెయ్యి కిలోమీటర్ల దూరం వరకు ప్రయాణిస్తాయి. చివరికి అంటార్కిటికా తెల్లటి మంచు పొరలపై పడి కలిసిపోతాయి. అత్యంత సూక్ష్మంగా, మంచులో కలిసిపోవడం వల్లే దీన్ని సేకరించడం ఎవరికీ సాధ్యపడటం లేదు.
ముప్పై ఏళ్లుగా వీడని ‘గోల్డ్ మిస్టరీ’
నిజానికి హవాయిలోని కిలౌయా, ఇటలీలోని ఎట్నా వంటి అగ్నిపర్వతాల వద్ద కూడా ఇలాంటి బంగారు ఆనవాళ్లు కనిపించినా, మౌంట్ ఎరెబస్ స్థాయిలో ఎక్కడా లేదు. భూగర్భంలోని విపరీతమైన వేడికి బంగారం కరిగి, వాయువులతో కలిసి పైకి వస్తుందని కొందరు చెప్తుంటే.. లావా సరస్సు ఉపరితలంపైనే ఈ ప్రక్రియ జరుగుతుందని మరికొందరు భావిస్తున్నారు. మూడు దశాబ్దాలుగా పరిశోధనలు జరుగుతున్నా, ఈ అగ్నిపర్వతం ఇంతలా బంగారం ఎలా కురిపిస్తోందనే రహస్యం ఇప్పటికీ శాస్త్రవేత్తలకు పూర్తిస్థాయిలో అంతుచిక్కడం లేదు.
Also Read: హైదరాబాద్లో ఘోర ప్రమాదం.. భారీ పేలుడుతో కుప్పకూలిన ఓ ఇల్లు.. స్పాట్లో!
Share
పాత జ్ఞాపకాలు గుర్తొచ్చేలా.. నోకియా కంపెనీ నుంచి ఊహించని క్రేజీ ఫోన్.. లీకైన లుక్స్ చూశారా?
ఓట్ల కోసం వందల అవతారాలా? చంద్రబాబుపై రాచమల్లు ఫైర్!
