Israel-Hamas War : ముగ్గురు హమాస్ ఉగ్రవాదులు, 50 మంది బందీలు మృతి!

Israel-Hamas War : ఇజ్రాయెల్ వైమానిక దాడుల్లో ముగ్గురు సీనియర్ హమాస్ ఉగ్రవాదులు హతం అయ్యారు. తమ ఫైటర్ జెట్‌లు ముగ్గురు సీనియర్ హమాస్ ఉగ్రవాదులను హతమార్చాయని ఇజ్రాయెల్ సైన్యాధికారులు శుక్రవారం తెల్లవారుజామున తెలిపారు.

అక్టోబర్ 7వ తేదీన ఇజ్రాయెల్‌పై జరిగిన దాడిలో దారాజ్ తుఫా బెటాలియన్ కార్యకర్తలు ముఖ్యమైన పాత్ర పోషించారని సమాచారం. ఇజ్రాయెల్‌పై దాడుల్లో ముఖ్యమైన పాత్ర పోషించిన దారాజ్ తుఫా బెటాలియన్‌కు చెందిన ముగ్గురు సీనియర్ హమాస్ ఉగ్రవాదులను లక్ష్యంగా చేసుకుని ఈ వైమానిక దాడి చేసినట్లు ఇజ్రాయెల్ సైన్యం ప్రకటించింది.

మరోవైపు ఇజ్రాయెల్ సరిహద్దు సమీపంలోని ఈజిప్టు పట్టణంపై క్షిపణి దాడి జరిగింది. ఇజ్రాయెల్ దాడుల్లో 50 మంది బందీలు మరణించారని హమాస్ తెలిపింది. హమాస్‌ను నిర్మూలించడానికి, బందీలను రక్షించడానికి గాజాలో భూదాడులు కొనసాగుతాయని ఇజ్రాయెల్ తెలిపింది. దేశం భూ దండయాత్రకు సిద్ధమవుతోందని ప్రధాన మంత్రి బెంజమిన్ నెతన్యాహు చెప్పిన తర్వాత ఈ క్షిపణి దాడులు జరిగాయి.

గాజాలో ఇజ్రాయెల్ దాడుల్లో మరణించిన 7,028 మంది పేర్లను పాలస్తీనా ఆరోగ్య మంత్రిత్వ శాఖ తాజాగా విడుదల చేసింది. గాజాలో హమాస్ ఆధ్వర్యంలోని ఆరోగ్య మంత్రిత్వ శాఖ విడుదల చేసిన మరణాల సంఖ్యపై అమెరికా అధ్యక్షుడు జో బిడెన్ అనుమానాలు వ్యక్తం చేయడంతో పాలస్తీనా ఈ జాబితాను ప్రకటించింది. ఇజ్రాయెల్, లెబనాన్, సిరియా మధ్య సరిహద్దు పోరాటం జరిగినట్లు వార్తలు వచ్చాయి.

వెస్ట్ బ్యాంక్‌లో, రాత్రిపూట ఇజ్రాయెల్ దాడిలో 60 మంది పాలస్తీనియన్లు అరెస్టు అయ్యారు. హమాస్,ఇస్లామిక్ జిహాద్‌కు చెందిన 500 మంది సభ్యులు ఇరాన్ గడ్డపై మిలిటరీ ద్వారా శిక్షణ పొందారని వాల్ స్ట్రీట్ జర్నల్ తన నివేదికలో పేర్కొంది. ఇజ్రాయెల్ పోరులో భాగంగా ప్రయోగించిన క్షిపణి శుక్రవారం తెల్లవారుజామున ఇజ్రాయెల్ సరిహద్దుకు సమీపంలో ఉన్న ఈజిప్షియన్ రిసార్ట్ టౌన్‌ను తాకింది.

ఇజ్రాయెల్‌లోని ఎర్ర సముద్రపు ఓడరేవు ఐలాట్‌కు సరిహద్దుగా ఉన్న తబాలోని ఆసుపత్రిని లక్ష్యంగా చేసుకున్న క్షిపణి దాడిలో ఆరుగురు గాయపడ్డారు. ఇజ్రాయెల్ డిఫెన్స్ ఫోర్సెస్ గురువారం గాజా స్ట్రిప్‌లో జరిగిన దాడిలో హమాస్ ఇంటెలిజెన్స్ డిప్యూటీ హెడ్ షాదీ బరుద్‌ను హతమార్చినట్లు తెలిపింది.

Share

• 
• 
• 
• 
• 
•