Heart Health: హార్ట్ ఎటాక్స్ రాకూడదంటే.. ఈ టిప్స్ ఫాలో అవ్వాల్సిందే ?

Heart Health: గుండె అనేది మన శరీరంలో అత్యంత ముఖ్యమైన అవయవం. ఆరోగ్యకరమైన జీవితాన్ని గడపడానికి గుండెను జాగ్రత్తగా చూసుకోవడం చాలా అవసరం. ప్రస్తుత జీవనశైలిలో గుండె జబ్బులు సర్వసాధారణంగా మారాయి. అయితే.. కొన్ని రకాల అలవాట్లను మార్చుకోవడం ద్వారా మనం గుండె జబ్బుల నుంచి దూరంగా ఉండవచ్చు. గుండె ఆరోగ్యాన్ని కాపాడుకోవడానికి పాటించాల్సిన 10 చిట్కాలను గురించి ఇప్పుడు తెలుసుకుందాం.

ఆరోగ్యకరమైన ఆహారం తీసుకోండి: గుండె ఆరోగ్యంగా ఉండాలంటే.. పండ్లు, కూరగాయలు, పప్పులు, తక్కువ కొవ్వు ఉన్న ఆహారాన్ని మీ రోజువారీ ఆహారంలో చేర్చుకోండి. ప్రాసెస్ చేసిన ఆహారాలు, ఉప్పు, చక్కెరను తగ్గించడం మంచిది. పోషకాలు ఉన్న ఆహారం తినడం వల్ల ఆరోగ్య సమస్యలు కూడా రాకుండా ఉంటాయి.

క్రమం తప్పకుండా వ్యాయామం : రోజుకు కనీసం 30 నిమిషాలు నడవడం, జాగింగ్ చేయడం, సైక్లింగ్ వంటి వ్యాయామాలు చేయండి. ఇది మీ గుండె కండరాలను బలోపేతం చేస్తుంది. అంతే కాకుండా గుండె సమస్యలు రాకుండా చేస్తుంది.

పొగతాగడం మానుకోండి: పొగతాగడం గుండె జబ్బులకు అతిపెద్ద కారణం. పొగతాగడం వల్ల రక్తనాళాలు దెబ్బతిని గుండెకు ఆక్సిజన్ సరఫరా తగ్గుతుంది.

మద్యపానం తగ్గించండి: అతిగా మద్యం సేవించడం వల్ల అధిక రక్తపోటు, గుండెపోటు వచ్చే అవకాశాలు పెరుగుతాయి. అందుకే మద్యం తీసుకోకుండా ఉండటం మంచిది.

బరువును అదుపులో ఉంచుకోండి: అధిక బరువు లేదా ఊబకాయం గుండెపై ఒత్తిడిని పెంచుతుంది. బరువును అదుపులో ఉంచుకోవడం ద్వారా గుండె జబ్బుల ప్రమాదాన్ని తగ్గించవచ్చు.

ఒత్తిడిని తగ్గించుకోండి: పని ఒత్తిడి, మానసిక ఆందోళనలు గుండెపై ప్రతికూల ప్రభావం చూపుతాయి. యోగా, ధ్యానం, లేదా మీకు నచ్చిన హాబీలను చేయడం ద్వారా ఒత్తిడిని తగ్గించుకోవచ్చు.

Also Read: విటమిన్ డి కోసం.. ఏ టైమ్‌లో ఎండలో నిలబడాలి ?

క్రమం తప్పకుండా నిద్రపోండి: రోజుకు 7-8 గంటలు నిద్రపోవడం చాలా అవసరం. మంచి నిద్ర గుండెకు విశ్రాంతిని ఇస్తుంది.

నీరు ఎక్కువగా తాగండి: శరీరంలో రక్త ప్రసరణకు నీరు చాలా అవసరం. తగినంత నీరు తాగడం వల్ల గుండె పనితీరు మెరుగుపడుతుంది.

గుండెకు మేలు చేసే కొవ్వులు : అవకాడో, నట్స్, ఆలివ్ ఆయిల్ వంటి ఆరోగ్యకరమైన కొవ్వులు గుండెకు చాలా మంచివి. అందుకే వీటిని ఆహారంలో భాగంగా చేసుకోవడం వల్ల మంచి ఫలితం ఉంటుంది.

క్రమం తప్పకుండా ఆరోగ్య పరీక్షలు చేయించుకోండి: రక్తపోటు, కొలెస్ట్రాల్, రక్తంలో చక్కెర స్థాయిలను తరచుగా పరీక్షించుకోవడం వల్ల గుండె జబ్బులను ముందుగానే గుర్తించి, చికిత్స తీసుకోవచ్చు.

Share

• 
• 
• 
• 
• 
•