Sleep: చాలా మందికి రాత్రిపూట చక్కగా నిద్ర పట్టడం పెద్ద సవాలుగా మారింది. ఒత్తిడి, జీవనశైలి మార్పులతో పాటు.. మనం తీసుకునే ఆహారం కూడా నిద్ర నాణ్యతను గణనీయంగా ప్రభావితం చేస్తుంది. కొన్ని రకాల ఆహార పదార్థాలు మన జీర్ణవ్యవస్థను ఇబ్బంది పెట్టి.. లేదా మెదడులోని రసాయనాలను ప్రభావితం చేసి నిద్రలేమికి కారణం అవుతాయి. రాత్రిపూట హాయిగా నిద్రపోవాలంటే.. పడుకునే ముందు తినకుండా ఉండాల్సిన 5 ఆహార పదార్థాలను గురించి ఇప్పుడు తెలుసుకుందాం.
1. కెఫిన్ అధికంగా ఉండే డ్రింక్స్, ఆహారాలు:
కెఫిన్ అనేది ఒక ఉద్దీపన పదార్థం. ఇది మెదడును ఉత్తేజపరిచి.. శరీరాన్ని చురుకుగా ఉంచుతుంది. కాఫీ, టీ, ఎనర్జీ డ్రింక్స్, సోడా వంటి డ్రింక్స్ లతో పాటు, చాక్లెట్లలో కూడా కెఫిన్ ఉంటుంది. కెఫిన్ ప్రభావం శరీరంలో చాలా గంటల పాటు ఉంటుంది. కాబట్టి.. సాయంత్రం వేళల్లో లేదా పడుకోవడానికి కనీసం 6-8 గంటల ముందు కెఫిన్ ఉన్న వాటిని తీసుకోకపోవడం మంచిది. లేదంటే.. నిద్ర పట్టడం కష్టమవుతుంది. లేదా నిద్ర పట్టినా మధ్య మధ్యలో మెలకువ రావచ్చు.
2. కారంగా ఉండే ఆహారాలు:
మసాలాలు, కారంతో కూడిన ఆహారాలు రుచిగా ఉన్నా.. రాత్రిపూట వాటిని తినడం నిద్రకు భంగం కలుగుతుంది. కారం ఎక్కువైన ఆహారాలు శరీర ఉష్ణోగ్రతను పెంచుతాయి. ఇది నిద్రకు ఆటంకం కలిగిస్తుంది. అంతేకాకుండా.. కారపు పదార్థాలు అజీర్ణం, గుండెల్లో మంట (ఎసిడిటీ), గ్యాస్ వంటి సమస్యలకు దారితీస్తాయి. ఇవి నిద్రను చెడగొడతాయి. ముఖ్యంగా యాసిడ్ రిఫ్లక్స్ సమస్య ఉన్నవారు రాత్రిపూట కారంగా ఉండే ఆహారాలకు దూరంగా ఉండాలి.
3. కొవ్వు అధికంగా ఉండే ఆహారాలు:
వేయించిన ఆహారాలు, పిజ్జా, బర్గర్లు, భారీ స్నాక్స్ వంటి కొవ్వు అధికంగా ఉండే ఆహారాలు రాత్రిపూట అస్సలు మంచివి కావు. కొవ్వు పదార్థాలు జీర్ణం కావడానికి ఎక్కువ సమయం పడుతుంది. అంతే కాకుండా ఇది రాత్రిపూట జీర్ణవ్యవస్థపై అదనపు భారాన్ని మోపుతుంది. దీనివల్ల కడుపు ఉబ్బరం, అజీర్ణం వచ్చి నిద్రకు ఆటంకం కలుగుతుంది. శరీరం నిద్రపోవడానికి బదులుగా ఆహారాన్ని జీర్ణం చేయడానికి ప్రయత్నిస్తుంది.
4. ఆల్కహాల్:
ఆల్కహాల్ తాగిన వెంటనే నిద్ర పట్టినట్లు అనిపించినా.. అది నిద్ర నాణ్యతను తీవ్రంగా దెబ్బతీస్తుంది. ఆల్కహాల్ ప్రభావం తగ్గిన తర్వాత.. చాలామందికి రాత్రిపూట తరచుగా మెలుకువలు వచ్చి, నిద్రకు ఆటంకం కలుగుతుంది. ఇది డీహైడ్రేషన్, తలనొప్పికి కూడా దారితీసే ప్రమాదం కూడా ఉంటుంది.
Also Read: ఉదయం పూట వెల్లుల్లి తింటే.. ఎన్ని లాభాలో తెలుసా ?
5. అధిక చక్కెర కలిగిన ఆహారాలు:
ఐస్ క్రీమ్, చాక్లెట్ కేక్స్, స్వీట్లు, ఇతర అధిక చక్కెర కలిగిన ఆహారాలు రాత్రిపూట తీసుకోకూడదు. చక్కెర తీసుకున్న వెంటనే రక్తంలో గ్లూకోజ్ స్థాయిలు వేగంగా పెరిగి.. ఆపై వేగంగా తగ్గుతాయి. ఈ హెచ్చుతగ్గులు శరీరం యొక్క సహజ నిద్ర-మేల్కొనే చక్రంపై ప్రభావం చూపి, నిద్రలేమికి దారితీస్తాయి. అలాగే.. చక్కెర పదార్థాలు జీర్ణం కావడానికి కూడా కొంత సమయం పడుతుంది.
రాత్రిపూట మంచి నిద్ర పొందడానికి.. పడుకోవడానికి కనీసం 2-3 గంటల ముందు తేలికపాటి ఆహారం తీసుకోవడం ఉత్తమం. పైన పేర్కొన్న ఆహార పదార్థాలకు దూరంగా ఉండటం ద్వారా మీరు ప్రశాంతమైన, గాఢమైన నిద్రను పొందవచ్చు. తద్వారా ఉదయం ఉత్సాహంగా, శక్తివంతంగా మేల్కొనవచ్చు.
Share
August Smartphones: ఆగస్టులో విడుదల కాబోయే స్మార్ట్‌ఫోన్లు.. పిక్సిల్ 10, పోకో 7 అల్ట్రా ఇంకా..
Daksha Nagarkar : హైదరాబాదులో సందడి చేసిన దక్ష నాగర్కర్.. ఫోటోలు వైరల్!
