Colon Cancer: ఇలాంటి ఆహార పదార్థాలు తింటే.. కోలన్ క్యాన్సర్ ముప్పు దరిచేరదు !

Colon Cancer: ప్రస్తుత కాలంలో మారుతున్న జీవనశైలి, ఆహారపు అలవాట్ల వల్ల క్యాన్సర్ కేసులు పెరుగుతున్నాయి. ముఖ్యంగా కొలొరెక్టల్ క్యాన్సర్ ప్రపంచవ్యాప్తంగా ఆందోళన కలిగిస్తోంది. అయితే.. మనం తీసుకునే ఆహారంలో చిన్నపాటి మార్పులు చేసుకోవడం ద్వారా ఈ ముప్పును 70% వరకు తగ్గించుకోవచ్చని గ్యాస్ట్రోఎంటరాలజిస్టులు సూచిస్తున్నారు. పేగుల ఆరోగ్యాన్ని కాపాడుకోవడానికి, క్యాన్సర్ కణాల పెరుగుదలను అరికట్టడానికి డాక్టర్లు సూచించిన కొన్ని ముఖ్యమైన ‘డూస్ అండ్ డోంట్స్’ (ఏమి తినాలి, ఏమి తినకూడదు) గురించి సమగ్రంగా ఇప్పుడు తెలుసుకుందాం.

పేగు క్యాన్సర్ నుంచి రక్షణ: గ్యాస్ట్రోఎంటరాలజిస్ట్ సూచనలు:

జీర్ణవ్యవస్థలో పేగులు కీలక పాత్ర పోషిస్తాయి. మనం తినే ఆహారంలోని వ్యర్థాలను బయటకు పంపే క్రమంలో పేగుల లోపలి పొరలు దెబ్బతినకుండా ఉండాలంటే ఆహార నియమాలు తప్పనిసరి.

5 Food Do’s (తప్పక తీసుకోవాల్సినవి):

1. ఫైబర్ అధికంగా ఉండే ఆహారం : పీచు పదార్థం పేగుల ఆరోగ్యానికి ప్రధాన ఆధారం. ఇది మలబద్ధకాన్ని నివారించి.. పేగుల్లోని వ్యర్థాలను త్వరగా బయటకు పంపుతుంది. తృణధాన్యాలు, చిక్కుళ్ళు, పండ్లు, కూరగాయలను రోజూ తీసుకోవాలి. ఫైబర్ వల్ల పేగుల్లోని టాక్సిన్స్ బయటకు వెళ్ళిపోతాయి. దీని వల్ల క్యాన్సర్ వచ్చే అవకాశం తగ్గుతుంది.

2. క్రూసిఫెరస్ కూరగాయలు: బ్రోకోలీ, క్యాబేజీ, కాలీఫ్లవర్ వంటి కూరగాయలలో ‘సల్ఫోరాఫేన్’ వంటి ఫైటోన్యూట్రియెంట్లు ఉంటాయి. ఇవి క్యాన్సర్ కణాలను నాశనం చేయడంలో సహాయ పడతాయని పరిశోధనలు చెబుతున్నాయి. వారానికి కనీసం 3-4 సార్లు వీటిని మీ ఆహారంలో భాగం చేసుకోండి.

3. పాలీఫెనాల్స్, యాంటీ ఆక్సిడెంట్లు: బెర్రీలు (స్ట్రాబెర్రీ, బ్లూబెర్రీ), గ్రీన్ టీ, డార్క్ చాక్లెట్లలో యాంటీ ఆక్సిడెంట్లు పుష్కలంగా ఉంటాయి. ఇవి శరీరంలోని ఇన్ఫ్లమేషన్ (వాపు)ను తగ్గించి, కణాల మ్యుటేషన్‌ను అరికడతాయి.

4. కాల్షియం, విటమిన్-డి: పాల ఉత్పత్తులు, ఆకుకూరలు, ఎండ ద్వారా లభించే విటమిన్-డి పేగు క్యాన్సర్ ముప్పును తగ్గిస్తాయి. గ్యాస్ట్రోఎంటరాలజిస్టుల ప్రకారం.. శరీరంలో తగినంత కాల్షియం ఉంటే అది పేగులలోని హానికరమైన యాసిడ్లను నియంత్రిస్తుంది.

5. నీరు, హైడ్రేషన్: పేగులు సాఫీగా కదలడానికి నీరు చాలా అవసరం. రోజుకు కనీసం 3-4 లీటర్ల నీరు తాగడం వల్ల జీర్ణ ప్రక్రియ మెరుగుపడుతుంది. అంతే కాకుండా మల విసర్జన సాఫీగా జరిగి పేగు గోడలు ఆరోగ్యంగా ఉంటాయి.

5 Food Don’ts (దూరంగా ఉండాల్సినవి):

1. ప్రాసెస్ చేసిన మాంసం: సలామీ, సాసేజ్, బేకన్ వంటి ప్రాసెస్ చేసిన మాంసాలను ‘గ్రూప్-1 కార్సినోజెన్’ (క్యాన్సర్ కారకాలు)గా WHO గుర్తించింది. వీటిని నిల్వ చేయడానికి ఉపయోగించే నైట్రేట్లు పేగుల గోడలను దెబ్బతీస్తాయి. వీటిని పూర్తిగా మానేయడం లేదా చాలా పరిమితంగా తీసుకోవడం మంచిది.

2. రెడ్ మీట్ : గొర్రె, మేక లేదా గొడ్డు మాంసం వంటి రెడ్ మీట్ అధికంగా తీసుకోవడం వల్ల పేగు క్యాన్సర్ ముప్పు పెరుగుతుంది. వారానికి 500 గ్రాముల కంటే తక్కువగా తీసుకోవాలని డాక్టర్లు సూచిస్తున్నారు.

3. శుద్ధి చేసిన కార్బోహైడ్రేట్లు: మైదా, వైట్ బ్రెడ్, చక్కెర, స్వీట్లు పేగులలో వాపును కలిగిస్తాయి. ఇవి ఇన్సులిన్ స్థాయిలను పెంచి.. క్యాన్సర్ కణాలు పెరగడానికి అనుకూలమైన వాతావరణాన్ని కల్పిస్తాయి.

4. అతిగా కాల్చిన ఆహారం: మాంసం లేదా కూరగాయలను బొగ్గుల మీద అతిగా కాల్చడం వల్ల ‘హెటెరోసైక్లిక్ అమైన్స్’ అనే హానికర రసాయనాలు విడుదలవుతాయి. ఇవి క్యాన్సర్‌కు దారితీసే అవకాశం ఉంది. ఆహారాన్ని మితమైన వేడిపై ఉడికించడం ఉత్తమం.

Also Read: అతి వేగంగా శ్వాస తీసుకోవడం.. ఇది ఆందోళనా లేక అనారోగ్యమా?

5. ఆల్కహాల్, కూల్ డ్రింక్: మద్యపానం పేగులలోని కణాలను నేరుగా దెబ్బతీస్తుంది. అలాగే సోడాలు, అధిక చక్కెర ఉన్న డ్రింక్స్ తీసుకోవడం వల్ల శరీరంలో ఫ్రీ రాడికల్స్ పెరిగి క్యాన్సర్ ముప్పును పెంచుతాయి.

పేగు క్యాన్సర్ అనేది నివారించదగిన వ్యాధి. మీరు పైన పేర్కొన్న 5 డూస్ అండ్ డోంట్స్‌ని పాటిస్తూ.. క్రమం తప్పకుండా వ్యాయామం చేస్తే మీ ఆరోగ్యం మీ చేతుల్లోనే ఉంటుంది. 45 ఏళ్లు దాటిన వారు లేదా కుటుంబ చరిత్రలో క్యాన్సర్ ఉన్నవారు క్రమం తప్పకుండా ‘కొలొనోస్కోపీ’ పరీక్ష చేయించుకోవడం ఉత్తమమని నిపుణులు చెబుతున్నారు.

Share

• 
• 
• 
• 
• 
•