H1N1 swine flu symptoms and prevention| స్వైన్ ఫ్లూ అంటే H1N1 వైరస్, కోవిడ్ 19 అంటే కరోనా వైరస్ రెండూ శ్వాసకోశ ఇన్ఫెక్షన్లే. వీటి లక్షణాల్లో కొన్ని ఒకేలా కనిపించినా, వాటికి కారణమయ్యే వైరస్లు వేర్వేరు. దేశంలోని పలు ప్రాంతాల్లో స్వైన్ ఫ్లూ కేసులు పెరుగుతున్నాయి. దేశరాజధాని ఢిల్లీ, బెంగుళూరు నగరాలల్లో ఎక్కువ కేసులు నమోదయ్యాయి. ఢిల్లీలో 2,300కు పైగా కేసులు నమోదైనట్లు నివేదికలు చెబుతున్నాయి. మరోవైపు కర్ణాటకలో కూడా సుమారు 300 నుంచి 400 యాక్టివ్ కేసులు ఉన్నట్లు సమాచారం. దీంతో ప్రజల్లో ఆందోళన పెరుగుతోంది.
అయితే ఆరోగ్య నిపుణులు భయపడాల్సిన అవసరం లేదని చెబుతున్నారు. కొన్ని సాధారణ జాగ్రత్తలు పాటించడం ద్వారా ఇన్ఫెక్షన్ ప్రమాదాన్ని తగ్గించవచ్చు.
ప్రస్తుతం స్వైన్ ఫ్లూ కారణంగా ప్రతి ఒక్కరూ తప్పనిసరిగా మాస్క్ ధరించాలని నిపుణులు సూచించడం లేదు. దేశంలో ICMR డైరెక్టర్ జనరల్ డాక్టర్ రాజీవ్ బహల్ ప్రజలు కోవిడ్ సమయంలో పాటించిన కొన్ని జాగ్రత్తలను కొనసాగించాలని సూచించారు. అయితే ప్రతి ఒక్కరూ మాస్క్ ధరించాల్సిన అవసరం లేదని కూడా ఆయన వివరించారు.
స్వైన్ ఫ్లూ ప్రధానంగా శ్వాస ద్వారా బయటకు వచ్చే తుంపర్ల ద్వారా వ్యాపిస్తుంది. ఇవి సాధారణంగా ఎక్కువ దూరం ప్రయాణించవు.
అందుకే ఫ్లూ లక్షణాలు ఉన్న వ్యక్తులతో సన్నిహితంగా ఉండకుండా జాగ్రత్తపడటం ముఖ్యం.
స్వైన్ ఫ్లూ అనేది ఇన్ఫ్లుయెంజా A వైరస్లో ఒక రకం. ఇది సాధారణ సీజనల్ ఫ్లూ మాదిరిగానే వ్యాపిస్తుంది.
ఇన్ఫెక్షన్ ఉన్న వ్యక్తి దగ్గినప్పుడు, తుమ్మినప్పుడు లేదా మాట్లాడినప్పుడు వైరస్ ఉన్న తుంపర్లు బయటకు వస్తాయి. సమీపంలో ఉన్న వ్యక్తులు వాటిని పీల్చడం ద్వారా ఇన్ఫెక్షన్కు గురయ్యే అవకాశం ఉంటుంది. ఈ తుంపర్లు కళ్లకు, ముక్కుకు లేదా నోటికి చేరినా వైరస్ శరీరంలోకి ప్రవేశించవచ్చు.
వైరస్ ఉన్న వ్యక్తి తాకిన వస్తువులపై వైరస్ ఉండే అవకాశం ఉంటుంది. డోర్ హ్యాండిల్స్, మొబైల్ ఫోన్లు, టేబుల్స్ వంటి వస్తువులను తాకిన తర్వాత ముఖాన్ని తాకడం ప్రమాదాన్ని పెంచుతుంది. అందుకే చేతులను సబ్బుతో తరచుగా శుభ్రం చేసుకోవడం ఉపయోగకరంగా ఉంటుంది.
ఇన్ఫెక్షన్ ఉన్న వ్యక్తితో ఎక్కువసేపు దగ్గరగా ఉండటం వల్ల వైరస్ వ్యాప్తి అవకాశాలు పెరుగుతాయి. ముఖ్యంగా హ్యాండ్ షేక్, వారిని హగ్ చేసుకోవడం, వారు తిన్న ఫ్లేట్లు, తాగిన గ్లాసులు ఉపయోగించడం., వారికి సమీపంగా కూర్చోవడం వంటివి చేయకూడదు. అందువల్ల జలుబు లేదా అలాంటి లక్షణాలు ఉన్నవారితో కొంత దూరం పాటించడం మంచిది. వారు ఉపయోగించిన టవల్స్, గ్లాస్, ప్లేట్లు ముట్టుకో కూడదు. ఈ జాగ్రత్తలు పాటించడం తప్పనిసరి.
స్వైన్ ఫ్లూ అంటే H1N1కు ఇన్ఫ్లుయెంజా A వైరస్ కారణం. కానీ కోవిడ్-19 కు SARS-CoV-2 అనే కరోనా వైరస్ కారణం. రెండింటికీ జ్వరం, దగ్గు, గొంతునొప్పి, అలసట, శరీర నొప్పులు వంటి లక్షణాలు కనిపించవచ్చు.
స్వైన్ ఫ్లూలో కొందరికి వికారం, వాంతులు లేదా విరేచనాలు కూడా రావచ్చు.
కోవిడ్-19లో కూడా వ్యక్తిని బట్టి వివిధ లక్షణాలు కనిపించవచ్చు. గతంలోని కొన్ని వేరియంట్లలో రుచి, వాసన కోల్పోవడం ఎక్కువగా కనిపించింది.
స్వైన్ ఫ్లూ సోకిన తర్వాత సాధారణంగా ఒకటి నుంచి నాలుగు రోజుల్లో లక్షణాలు కనిపిస్తాయి. కోవిడ్-19లో ఈ వ్యవధి వైరస్ వేరియంట్, వ్యక్తిగత పరిస్థితులపై ఆధారపడి మారవచ్చు. రెండు ఇన్ఫెక్షన్లు కూడా లక్షణాలు కనిపించకముందే ఇతరులకు వ్యాపించే అవకాశం ఉంది.
ఇన్ఫ్లుయెంజా వైరస్లు తరచుగా జన్యుపరమైన మార్పులకు లోనవుతాయి. దీన్నే యాంటీజెనిక్ డ్రిఫ్ట్ అంటారు. కొన్ని సందర్భాల్లో పెద్ద మార్పులు కూడా జరగవచ్చు. అందుకే ఫ్లూ పర్యవేక్షణ, వ్యాక్సిన్ నవీకరణలు ముఖ్యమైనవి. SARS-CoV-2 కూడా కాలక్రమేణా అనేక వేరియంట్లుగా మారింది.
ఫ్లూ లక్షణాలు ఉన్న వ్యక్తులకు సాధ్యమైనంత దూరంగా ఉండండి.
చేతులను సబ్బు, నీటితో తరచుగా శుభ్రం చేసుకోండి.
శుభ్రంగా లేని చేతులతో కళ్లను, ముక్కును, నోటిని తాకకండి.
దగ్గేటప్పుడు లేదా తుమ్మేటప్పుడు ముక్కు, నోటిని కప్పుకోండి.
అనారోగ్యంగా ఉంటే ఇంట్లోనే ఉండి ఇతరులతో సన్నిహితంగా ఉండటం తగ్గించండి.
H1N1 లక్షణాలు సాధారణ ఫ్లూ మాదిరిగా ఉండవచ్చు. చాలామందిలో విశ్రాంతి, ద్రవాలు, తగిన సంరక్షణతో పరిస్థితి మెరుగుపడుతుంది.
అయితే కొన్ని లక్షణాలు తీవ్రంగా మారితే ఆలస్యం చేయకుండా వైద్యుడిని సంప్రదించాలి.
జ్వరం ఎక్కువగా ఉండి తగ్గకపోతే వైద్య సలహా తీసుకోవాలి.
శ్వాస తీసుకోవడంలో ఇబ్బంది లేదా ఊపిరి ఆడకపోవడం కనిపిస్తే వెంటనే వైద్య సహాయం పొందాలి.
ఛాతిలో నొప్పి, తీవ్రమైన బలహీనత లేదా తల తిరగడం ఉంటే నిర్లక్ష్యం చేయకండి.
నిరంతర వాంతులు లేదా నీరు తాగలేని పరిస్థితి ఏర్పడితే వైద్యుడిని సంప్రదించాలి.
లక్షణాలు తగ్గిన తర్వాత మళ్లీ తీవ్రమైన జ్వరం లేదా దగ్గు వస్తే పరీక్ష అవసరం కావచ్చు.
వృద్ధులు, చిన్నపిల్లలు, గర్భిణీలు లేదా ఇతర ఆరోగ్య సమస్యలు ఉన్నవారు ముందుగానే వైద్య సలహా తీసుకోవడం మంచిది.
తీవ్రమైన శ్వాస సమస్యలు, స్పృహలో మార్పులు లేదా పరిస్థితి వేగంగా క్షీణిస్తే అత్యవసర వైద్య సహాయం పొందాలి.
Also Read: వర్షాకాలంలో నోటి దుర్వాసన, చిగుళ్లలో సమస్యలు తీవ్రం.. ఈ జాగ్రత్తలు పాటించండి
H1N1, COVID-19 వేర్వేరు వైరస్ల వల్ల వచ్చే ఇన్ఫెక్షన్లు. అయితే రెండూ శ్వాసకోశ మార్గాల్లో వ్యాపించగలవు. ప్రస్తుతం అందరూ మాస్క్ ధరించాల్సిన అవసరం లేదని నిపుణులు చెబుతున్నారు. అయితే అనారోగ్యంతో ఉన్నవారు లేదా సమస్యలు వచ్చే ప్రమాదం ఎక్కువగా ఉన్నవారు వైద్యుల సలహా పాటించాలి.
Also Read: దగ్గు, జలుబు మందులపై ఆంక్షలు విధించిన కేంద్రం.. పిల్లలకు కఫ్ సిరప్ ఇచ్చే ముందు ఇది తెలుసుకోవాలి
Share
బంపర్ ఆఫర్ ప్రకటిస్తున్న జబర్దస్త్ జడ్జెస్.. కంటెస్టెంట్స్ కి పండుగే!
అమెరికాలో ఘోర రోడ్డు ప్రమాదం.. ముగ్గురు తెలంగాణ విద్యార్థులు మృతి, ఎలా జరిగింది?
