వర్షంలో తడిసిన బూట్లు, చెప్పులను త్వరగా ఎలా ఆరబెట్టాలి? ఇలా చేస్తే నిమిషాల్లోనే ఆరిపోతాయి

వర్షాకాలం చల్లని వాతావరణాన్ని తీసుకువచ్చినా తడిసిన చెప్పులు, బూట్లు పెద్ద సమస్యగా మారుతాయి. ముఖ్యంగా కాటన్ ఫ్యాబ్రిక్ షూస్ అయితే ఎక్కువగా నీళ్లని పీల్చుకుంటాయి. వాటిని ఆరబెట్టడం చాలా కష్టం. ఆఫీస్, కాలేజీ లేదా మార్కెట్‌కు వెళ్లే సమయంలో ఒక్కసారిగా వర్షం పడితే షూస్ పూర్తిగా తడిసిపోతాయి. చాలామంది వాటిని త్వరగా ఆరబెట్టడానికి ఎండ, హీటర్ లేదా హెయిర్ డ్రైయర్ ఉపయోగిస్తారు. అయితే ఇలా చేయడం వల్ల షూస్ డ్యామేజ్ అయ్యే ప్రమాదం ఉంటుంది. సరైన పద్ధతిలో ఆరబెడితే చెప్పుల నాణ్యత ఎక్కువకాలం నిలుస్తుంది.

ఇంటికి చేరుకున్న వెంటనే ఈ పని చేయండి

ఇంటికి వచ్చిన వెంటనే షూస్‌లో ఉన్న అదనపు నీటిని తొలగించాలి. చెప్పులను మెల్లగా ఊపి నీటిని బయటకు తీసేయాలి. తర్వాత పొడి టవల్ లేదా మృదువైన గుడ్డతో చెప్పుల లోపలి, బయట భాగాలను బాగా తుడవాలి. దీంతో పైపొరలో ఉన్న తేమ తొలగిపోతుంది.
ఆ తర్వాత షూస్‌ల లేసులు, ఇన్‌సోల్స్‌ తీసి విడిగా ఆరబెట్టాలి. ఇవే ఎక్కువ నీటిని పీల్చుకుంటాయి. వాటిని విడిగా ఆరబెడితే మొత్తం చెప్పు త్వరగా ఎండిపోతుంది.

పాత వార్తాపత్రికలు లేదా పేపర్ టవల్ ఉపయోగించండి

షూస్ లోపల పాత న్యూస్ పేపర్ లేదా పేపర్ టవల్‌ను నింపండి. కాగితం తేమను వేగంగా పీల్చుకుంటుంది. దీంతో షూస్ సహజంగా త్వరగా ఆరిపోతాయి. కొన్ని గంటల తర్వాత కాగితం పూర్తిగా తడిస్తే దాన్ని మార్చి కొత్తది పెట్టాలి. ఈ పద్ధతి చెప్పులకు ఎలాంటి నష్టం కలిగించదు.

గాలి బాగా వచ్చే చోటే ఆరబెట్టండి

గాలి బాగా వచ్చే ప్రదేశంలో షూస్ ఉంచాలి. అవసరమైతే ఫ్యాన్ ముందు కూడా పెట్టవచ్చు. గాలిలో ఆరబెట్టడం వల్ల షూస్ తమ అసలు ఆకారాన్ని కోల్పోకుండా ఆరిపోతాయి.
ఎండలో నేరుగా పెట్టకండి. హీటర్ లేదా ఎక్కువ వేడి వచ్చే హెయిర్ డ్రైయర్ కూడా ఉపయోగించకండి. అధిక వేడి వల్ల లెదర్ పగిలిపోవచ్చు. సింథటిక్ మెటీరియల్ దెబ్బతినే అవకాశం ఉంటుంది. షూస్ గ్లూ కూడా బలహీనపడుతుంది.

సిలికా జెల్ ప్యాకెట్లు ఉపయోగించండి

సిలికా జెల్ ప్యాకెట్లు తేమను చాలా వేగంగా పీల్చుకుంటాయి. వాటిని తడిసిన షూస్ లోపల ఉంచితే త్వరగా ఎండిపోతాయి. కొత్త బ్యాగులు, షూ బాక్స్‌లు లేదా ఎలక్ట్రానిక్ వస్తువులతో వచ్చే ఈ ప్యాకెట్లను భద్రపరచుకోవడం మంచిది.

సిలికా జెల్ లేకపోతే బియ్యం

సిలికా జెల్ అందుబాటులో లేకపోతే పొడి బియ్యాన్ని ఉపయోగించవచ్చు. ఒక పెద్ద డబ్బాలో బియ్యం నింపి షూస్ అందులో కొన్ని గంటలు ఉంచాలి. బియ్యం కూడా కొంతవరకు తేమను పీల్చుకుని చెప్పులు త్వరగా ఆరడానికి సహాయపడుతుంది.

దుర్వాసన పోవాలంటే ఇలా చేయండి

షూస్ పూర్తిగా ఆరిన తర్వాత వాటి లోపల కొద్దిగా బేకింగ్ సోడా చల్లాలి. రాత్రంతా అలాగే ఉంచి ఉదయం ఉపయోగించే ముందు దాన్ని తొలగించాలి. ఇలా చేస్తే తేమ వల్ల వచ్చే దుర్వాసన తగ్గి షూస్ తాజాగా ఉంటాయి.

Also Read: వర్షాకాలంలో రెయిన్‌కోట్‌ ధరించేందుకు ఫ్యాషన్ టిప్స్.. ఏ డ్రెస్ వేసినా స్టైలిష్‌గా లుక్

వర్షాకాలంలో ఈ జాగ్రత్తలు తప్పనిసరి

ప్రతిరోజూ బయటకు వెళ్లేవారు వాటర్ రెసిస్టెంట్ లేదా త్వరగా ఆరిపోయే షూస్ ఉపయోగించడం మంచిది. అలాగే ఒకే జత షూస్ ప్రతిరోజూ ధరించకుండా వాటికి పూర్తిగా ఆరే సమయం ఇవ్వాలి. ఇలా చేస్తే షూస్ ఎక్కువ కాలం మన్నుతాయి.