ఫ్రిజ్‌లో నిల్వ చేసిన గుడ్లు చెడిపోలేదు కదా? సులభంగా ఈ చిట్కాలతో తెలుసుకోండి

నాన్ వెజ్ ఆహారం తినే ప్రతీ ఇంట్లో కోడి గుడ్లు నిల్వ ఉంటాయి. గుడ్లు మంచి పోషకాహారం. ఉదయం టిఫిన్ నుంచి అనేక వంటకాల వరకు వీటిని విస్తృతంగా ఉపయోగిస్తారు. గుడ్లలో ప్రోటీన్, విటమిన్లు, మినరల్స్ వంటి ఎన్నో ముఖ్యమైన పోషకాలు ఉంటాయి. అందుకే చాలామంది ఒకేసారి ఎక్కువ గుడ్లు కొనుగోలు చేసి ఫ్రిజ్‌లో నిల్వ చేస్తారు.

అయితే ఎక్కువ రోజులు ఫ్రిజ్‌లో ఉంచిన తర్వాత గుడ్లు ఇంకా తాజాగా ఉన్నాయా లేదా అనేది చాలామందికి సందేహంగా ఉంటుంది. కొన్ని సులభమైన పరీక్షల ద్వారా గుడ్ల తాజాదనాన్ని ఇంట్లోనే తెలుసుకోవచ్చు.

వాటర్ టెస్ట్

గుడ్లు తాజాగా ఉన్నాయో లేదో తెలుసుకోవడానికి ఇది చాలా సులభమైన పద్ధతి. ఒక లోతైన గిన్నె లేదా గ్లాసులో చల్లని నీటిని నింపండి. ఆ తర్వాత గుడ్డును మెల్లగా నీటిలో వేయండి. తాజా గుడ్డు నేరుగా అడుగుకు వెళ్లి అడ్డంగా పడుకుంటుంది. కొంత పాత గుడ్డు అడుగున నిలువుగా నిలబడుతుంది. గుడ్డు పూర్తిగా నీటి పైభాగానికి తేలితే అది పాడైందని అర్థం. అలాంటి గుడ్లను వెంటనే పారేయాలి. వాటిని తినడం ఆరోగ్యానికి ప్రమాదకరం.

శబ్దం ద్వారా తెలుసుకోండి

గుడ్డును చెవి దగ్గర పెట్టుకుని మెల్లగా కదపండి. తాజా గుడ్డులో ఎలాంటి శబ్దం వినిపించదు. ఎందుకంటే అందులోని పచ్చసొన, తెల్లసొన గట్టిగా ఉంటాయి. గుడ్డును కదిలించినప్పుడు లోపల నీరు కదిలినట్లు శబ్దం వస్తే అది పాత గుడ్డు కావచ్చు. గుడ్డు వయస్సు పెరిగే కొద్దీ లోపల గాలి ఖాళీ పెరుగుతుంది. అందువల్ల ద్రవం కదులుతూ శబ్దం చేస్తుంది.

పగులగొట్టి పరిశీలించండి

ఒక శుభ్రమైన ప్లేట్ లేదా గిన్నెలో గుడ్డును పగులగొట్టండి. తర్వాత పచ్చసొన, తెల్లసొన ఎలా ఉన్నాయో గమనించండి. తాజా గుడ్డులో పచ్చసొన గుండ్రంగా, పైకి ఎత్తుగా కనిపిస్తుంది. తెల్లసొన కూడా చిక్కగా ఉండి పచ్చసొన చుట్టూ దగ్గరగా ఉంటుంది. పచ్చసొన చదునుగా మారి సులభంగా పగిలిపోతే అది పాత గుడ్డు కావచ్చు. తెల్లసొన ఎక్కువగా నీరుగా వ్యాపిస్తే కూడా గుడ్డు తాజాగా లేదని భావించాలి.

వాసన ద్వారా గుర్తించండి

గుడ్డు మంచిదా కాదా చెప్పడంలో వాసన కూడా ముఖ్యమైన సూచన. తాజా గుడ్లకు ఎలాంటి దుర్వాసన ఉండదు. పాడైన గుడ్ల నుంచి తీవ్రమైన దుర్వాసన వస్తుంది. కొన్ని సందర్భాల్లో గుడ్డు పగులగొట్టక ముందే కూడా ఈ వాసన తెలుస్తుంది. అలాంటి గుడ్లను ఎట్టి పరిస్థితుల్లోనూ తినకూడదు. అవి ఫుడ్ పాయిజనింగ్, కడుపు సమస్యలకు కారణం కావచ్చు.

Also Read: గర్భవతి మహిళలు పారాసిటమాల్ తీసుకుంటే పిల్లలకు ఆటిజం, బుద్ధిమాంద్యం.. నిజమేనా?

ఫ్రిజ్‌లో గుడ్లను ఎంతకాలం నిల్వ చేయాలి?

పచ్చి గుడ్లను సాధారణంగా ఫ్రిజ్‌లో మూడు నుంచి ఐదు వారాల వరకు భద్రంగా నిల్వ చేయవచ్చు. వాటిని ఫ్రిజ్ తలుపులో కాకుండా లోపలి షెల్ఫ్‌లో ఉంచడం మంచిది. అక్కడ ఉష్ణోగ్రత స్థిరంగా ఉంటుంది. గుడ్లను వీలైనంత త్వరగా ఉపయోగిస్తే రుచి, పోషకాలు కూడా మెరుగ్గా ఉంటాయి.

Share

• 
• 
• 
• 
• 
•