Honeybee Wasp Attack| తేనెటీగలు, కందిరీగల గూడు దగ్గరకు అజాగ్రత్తగా వెళ్లడం ప్రమాదకరం. కొన్నిసార్లు ప్రాణాపాయ పరిస్థితి కూడా ఏర్పడవచ్చు. గూడును కదిలించినప్పుడు తేనెటీగలు లేదా కందిరీగలు గుంపుగా దాడి చేసే అవకాశం ఉంటుంది. ఒక్కసారిగా అనేక ఈగలు కుడితే తీవ్రమైన నొప్పితో పాటు అలర్జీ సమస్యలు కూడా రావచ్చు. దీంతో కొంతమంది చనిపోయిన సందర్భాలు కూడా ఉన్నాయి. అందుకే కందిరీగల గూడు కనిపించినప్పుడు ఏం చేయాలి, గుంపు దాడి చేస్తే ఎలా తప్పించుకోవాలో తెలుసుకోవడం ముఖ్యం.
ముఖ్యంగా వాటి గూడును కదిలించినప్పుడు కందిరీగలు గుంపుగా దాడి చేసే అవకాశం ఉంది. ఆ గూడు కదిలినప్పుడు సమీపంలో ఉన్న మనుషులు, జంతువులు అని తేడా లేకుండా ఇవి గుంపుగా ఆ జీవులపై దాడి చేస్తాయి. ఉదాహరణకు అక్కడ సమీపంలో నిలబడి ఉన్న వ్యక్తికి అనేక ఈగలు ఒకేసారి మీదపడి కుడితే తీవ్రమైన నొప్పి, వాపు, అలర్జీ వంటి సమస్యలు రావచ్చు. అందుకే తేనెటీగలు కందిరీగల గూళ్లకు దూరంగా ఉండటం చాలా ముఖ్యం.
కందిరీగ కుట్టిన వెంటనే ఆ ప్రాంతంలో తీవ్రమైన నొప్పి, మంట, దురద ఉంటుంది. కొంతమందిలో కుట్టిన ప్రాంతం కొంతసేపు వాపుతో ఉండవచ్చు. ఒకేసారి ఎక్కువ కుట్లు పడితే తీవ్రమైన ఆరోగ్య సమస్యలు వచ్చే అవకాశం ఉంటుంది. గతంలో కీటకాల కుట్టుకు తీవ్రమైన అలర్జీ వచ్చినవారు మరింత జాగ్రత్తగా ఉండాలి.
ఇంటి దగ్గర, పొలంలో లేదా చెట్లపై కందిరీగలు, తేనెటగల గూడు కనిపిస్తే దానికి దూరంగా ఉండండి. గూడును తాకడం, కదిలించడం లేదా తొలగించడానికి ప్రయత్నించడం ప్రమాదకరం.
ప్రమాదం ఉందని భావించినప్పుడు కందిరీగలు పెద్ద సంఖ్యలో బయటకు వచ్చి దాడి చేసే అవకాశం ఉంది. పెద్ద గూళ్లను తొలగించడానికి నిపుణుల సహాయం తీసుకోవాలి. పిల్లలు, వృద్ధులు గూడు దగ్గరకు వెళ్లకుండా జాగ్రత్తలు తీసుకోండి.
గూడుపై నీరు, సబ్బు, డిటర్జెంట్ లేదా పొగను ఉపయోగించకూడదు. ఇలాంటి ప్రయత్నాలు కందిరీగలను రెచ్చగొట్టి గుంపుగా దాడి చేసేలా రెచ్చగొడతాయి. ఉదయం లేదా సాయంత్రం కందిరీగలు తక్కువగా కనిపించినా గూడు తొలగించడం సురక్షితం కాదు. కందిరీగల ప్రవర్తన జాతి, వాతావరణం, పరిసర పరిస్థితులపై ఆధారపడి మారవచ్చు. గూడు తొలగించాల్సి వస్తే నిపుణుల సలహా తీసుకోవడం మంచిది.
కందిరీగల గుంపు ఒక్కసారిగా దాడి చేస్తే త్వరగా అక్కడి నుంచి వెళ్లండి. వాటిని చేతులతో కొట్టడం లేదా చంపడానికి ప్రయత్నించడం చేయకూడదు. మీ ముఖం, తలను దుస్తులతో కప్పుకుని సురక్షితమైన, మూసివున్న ప్రదేశానికి వెళ్లండి. సురక్షితమైన భవనం లేదా వాహనంలోకి చేరుకునే వరకు ఆగకూడదు. గూడు దగ్గర ఆగడం లేదా నేలపై కూర్చోవడం చేయకూడదు. ఇతరులు సమీపంలో ఉంటే వారిని హెచ్చరించండి.
ఎక్కువ కుట్లు పడితే కొంతమందిలో అనాఫైలాక్సిస్ అనే తీవ్రమైన అలర్జీ రావచ్చు. ఈ పరిస్థితి వేగంగా తీవ్రమై ప్రాణాపాయంగా మారే అవకాశం ఉంటుంది. శ్వాస తీసుకోవడంలో ఇబ్బంది, ముఖం లేదా గొంతు వాపు వంటి లక్షణాలను గమనించండి. తల తిరగడం, వాంతులు, తీవ్రమైన బలహీనత లేదా స్పృహ కోల్పోవడం కూడా ప్రమాద సంకేతాలే. ఇలాంటి లక్షణాలు కనిపిస్తే వెంటనే అత్యవసర వైద్య సహాయం పొందాలి.
Also Read: మీ ముఖాన్ని అద్దెకు ఇస్తారా? కొత్త పార్ట్ టైమ్ బిజినెస్ గురూ
కందిరీగల గుంపు దాడి సమయంలో పిల్లలు భయపడే అవకాశం ఎక్కువగా ఉంటుంది. వారిని వెంటనే సురక్షితమైన ప్రదేశానికి తీసుకెళ్లాలి. వృద్ధులు కూడా తేనెటీగలు కుట్టగానే తర్వాత తీవ్రమైన సమస్యలకు గురయ్యే అవకాశం ఉంటుంది. అలర్జీ చరిత్ర ఉన్నవారు కందిరీగల గూళ్లకు పూర్తిగా దూరంగా ఉండాలి.
Also Read: ప్రేమ లేదా ఫ్రెండ్షిప్.. చాటింగ్లో ఈ చిన్న సంకేతాలు కనిపిస్తే పట్టేయండి
తేనెటీగలు సాధారణంగా తమను తాము రక్షించుకోవడానికి కుడతాయి. కుట్టిన తర్వాత వాటి ముళ్లు మన చర్మంలో మిగిలిపోయే అవకాశం ఉంటుంది. తేనెటీగ కుట్టిన తర్వాత ముల్లు చర్మంలో మిగిలి ఉంటే, దాన్ని వెంటనే తొలగించాలి. ముల్లును జాగ్రత్తగా తొలగించవచ్చు. ముల్లు తొలగించే సమయంలో దాన్ని గట్టిగా నొక్కడం లేదా దాని విషపు సంచిని పిండడం చేయకండి. అలాగే, తేనెటీగల గుంపు ప్రమాదకరం కాదని భావించకండి. పెద్ద గుంపు దగ్గరకు వెళ్లినా లేదా దాన్ని కదిలించినా అనేక తేనెటీగలు ఒకేసారి కుట్టే ప్రమాదం ఉంటుంది.
మరోవైపు, కందిరీగలు సాధారణంగా తమ ముల్లును కోల్పోవు కాబట్టి పలుమార్లు కుట్టగలవు. అందుకే తేనెటీగల కంటే కందిరీగలు ఎక్కువ ప్రమాదకరం.
Share
హార్దిక్ పాండ్యా కంటే నితీష్ కుమార్ బెటర్... వరల్డ్ లోనే బెస్ట్ ఆల్ రౌండర్ ఇతనే
కరెంట్ పోయిన వెంటనే..తప్పకుండా ఆపేయాల్సిన ఎలక్ట్రానిక్ గాడ్జెట్స్
