ఇన్వర్టర్ బ్యాటరీ త్వరగా పాడవుతోందా? నీరు పోసేటప్పుడు ఈ తప్పులు అస్సలు చేయకండి

How to increase inverter battery life| విద్యుత్ సరఫరా నిలిచిపోయినప్పుడు మన ఇంట్లో ఇన్వర్టరే పెద్ద ఆధారం. అయితే, కరెంట్ పోగానే ఇన్వర్టర్ కొద్దిసేపటికే ఆగిపోతుందా? బ్యాటరీ ఛార్జింగ్ ఉన్నప్పటికీ ఎక్కువసేపు బ్యాకప్ ఇవ్వడం లేదా? అయితే, మీ ఇన్వర్టర్ బ్యాటరీ నిర్వహణపై దృష్టి పెట్టాల్సిన సమయం వచ్చింది. కొన్ని కారణాలు దాని పనితీరును దెబ్బతీస్తాయి. అయితే చిన్న జాగ్రత్తలు పాటిస్తే బ్యాటరీ జీవితకాలాన్ని పెంచుకోవచ్చు. మరి నీళ్లు పోసేటప్పుడు ఎలాంటి జాగ్రత్తలు తీసుకోవాలో తెలుసుకుందాం.

బ్యాటరీలో వాటర్ లెవెల్ సూచికలతో గుర్తించవచ్చు

ఇన్వర్టర్ బ్యాటరీపై ఉండే చిన్న ఇండికేటర్లు వాటర్ లెవెల్‌ని తెలియజేస్తాయి. వీటిలో ఉండే కలర్ ఇండికేటర్స్ గమనిస్తే నీళ్లు అవసరమో లేదో తెలుసుకోవచ్చు.

సాధారణంగా బ్యాటరీలో గ్రీన్, రెడ్ సూచనలు కనిపిస్తాయి

గ్రీన్ మార్క్: రెడ్ ఫ్లోట్ గ్రీన్ మార్క్ దగ్గర ఉంటే వాటర్ లెవెల్ సాధారణంగా సరిపోతుంది. అలాంటప్పుడు అదనంగా నీళ్లు పోయాల్సిన అవసరం లేదు.
రెడ్ మార్క్: ఫ్లోట్ కిందకు వెళ్లినప్పుడు వాటర్ లెవెల్ తగ్గి ఉండవచ్చు. అప్పుడు డిస్టిల్డ్ వాటర్ అవసరమవుతుంది.

ప్రతి సెల్‌లో వాటర్ లెవెల్‌ని విడివిడిగా పరిశీలించాలి. బ్యాటరీ తయారీదారు సూచనలను కూడా తప్పనిసరిగా పాటించాలి.

బ్యాటరీలో సాధారణ నీరు లేదా ఆర్‌వో నీరు పోయకండి

బ్యాటరీ నిర్వహణలో సరైన వాటర్ ఎంచుకోవడం చాలా ముఖ్యం. పొరపాటున కూడా నల్లా నీళ్లు, ఆర్వో నీళ్లు ఉపయోగించకూడదు. సాధారణ నీటిలో ఉండే ఖనిజాలు బ్యాటరీలో పేరుకుపోవచ్చు. ఇవి లోపల ఉండే ప్లేట్లను దెబ్బతీసి బ్యాటరీ సామర్థ్యాన్ని తగ్గించవచ్చు. అందుకే బ్యాటరీ కోసం ప్రత్యేకంగా తయారుచేసిన డిస్టిల్డ్ వాటర్ మాత్రమే ఉపయోగించాలి. మార్కెట్లో ఇది బ్యాటరీ వాటర్ పేరుతో లభిస్తుంది. కొనుగోలు చేసేటప్పుడు బాటిల్‌పై ఉన్న వివరాలను పరిశీలించాలి.

బ్యాటరీలో నీళ్లు పోసే ముందు ఈ జాగ్రత్తలు పాటించండి

నీళ్లు పోసే సమయంలో తొందరపడకూడదు. బ్యాటరీలో యాసిడ్ ఉండటంతో తగిన రక్షణ అవసరం.
ముందుగా ఇన్వర్టర్‌ను ఆఫ్ చేసి విద్యుత్ సరఫరాను నిలిపివేయాలి.
చేతులకు రబ్బరు గ్లౌజులు, కళ్లకు రక్షణ కళ్లద్దాలు ధరించాలి.
బ్యాటరీపై ఉన్న దుమ్మును పొడి గుడ్డతో శుభ్రం చేయాలి.
క్యాప్స్ తెరిచి ప్రతి సెల్‌లో వాటర్ లెవెల్‌ని పరిశీలించాలి.
శుభ్రమైన ప్లాస్టిక్ బాటిల్ లేదా గరాటుతో డిస్టిల్డ్ వాటర్ పోయాలి.
నిర్దేశించిన స్థాయి చేరగానే నీళ్లు పోయడం ఆపాలి.
చివరగా అన్ని క్యాప్స్‌ సరిగ్గా మూసివేయాలి.

Also Read: స్కూల్‌ వెళ్లడానికి మీ పిల్లాడు భయపడుతున్నాడా? పిల్లలు బుల్లీయింగ్‌‌కు గురవుతున్నట్లు తెలిపే సంకేతాలు ఇవే

ఈ మూడు తప్పులు చేస్తే బ్యాటరీ త్వరగా పాడవుతుంది

1. అవసరానికి మించి నీళ్లు పోయడం: బ్యాటరీలో నిర్ణీత స్థాయికి మించి నీళ్లు నింపకూడదు. ఎక్కువ నీళ్లు పోస్తే ఛార్జింగ్ సమయంలో బయటకు పొంగే ప్రమాదం ఉంటుంది.

2. నీటి స్థాయిని పట్టించుకోకపోవడం: నీళ్లు తగ్గితే బ్యాటరీ ప్లేట్లు దెబ్బతినవచ్చు. ముఖ్యంగా వేసవిలో అన్ని సెల్స్‌ను క్రమం తప్పకుండా పరిశీలించాలి.

3. నీరు ఉపయోగించడం: నల్లా, ఆర్వో లేదా ఏసీ నుంచి వచ్చే నీటిని బ్యాటరీలో పోయకూడదు. తయారీదారు సూచించిన డిస్టిల్డ్ వాటర్ మాత్రమే ఉపయోగించాలి.

Also Read: స్వీట్స్ తినడం కంటే ఇది డేంజర్.. షుగర్ సమస్య పెరగడానికి అతిపెద్ద కారణం ఇదే

చిన్న జాగ్రత్తలతో బ్యాటరీ జీవితకాలాన్ని పెంచుకోండి

ఇన్వర్టర్ బ్యాటరీని క్రమం తప్పకుండా పరిశీలించడం చాలా అవసరం. వాటర్ లెవెల్‌ని క్రమంగా చెక్ చేస్తూ, సరైన డిస్టిల్డ్ వాటర్ ఉపయోగించాలి. తయారీదారు సూచించిన నిర్వహణ పద్ధతులను పాటించాలి. ఇలా చేస్తే బ్యాటరీ పనితీరును మెరుగ్గా ఉంచుకోవచ్చు.