Malaria Fever : మలేరియా అనేది దోమల కాటు ద్వారా సంక్రమించే ఒక తీవ్రమైన వ్యాధి. ప్రపంచవ్యాప్తంగా ప్రతి సంవత్సరం లక్షల మంది ప్రజలు ఈ వ్యాధి బారిన పడుతున్నారు. ఇది దోమల ద్వారా మనుషులకు వ్యాపిస్తుంది. ముఖ్యంగా ‘ప్లాస్మోడియం’ అనే పరాన్నజీవి ఆడ అనాఫిలస్ దోమల ద్వారా మనుషుల శరీరంలోకి ప్రవేశిస్తుంది. దోమలు పగటిపూట ఎక్కువగా కుడతాయి. అయితే ఈ వ్యాధి వ్యాప్తికి కారణమయ్యే దోమలు రాత్రి పూట చురుకుగా ఉంటాయి.
మలేరియా యొక్క లక్షణాలు:
మలేరియా జ్వరం యొక్క లక్షణాలు సాధారణంగా దోమ కుట్టిన 10-15 రోజులలోపు కనిపిస్తాయి. దీని లక్షణాలు ప్రారంభంలో చాలా సాధారణంగా ఉండి, ఇతర జ్వరాల లక్షణాల్లాగే ఉంటాయి. అయితే సరైన సమయంలో చికిత్స చేయకపోతే.. ఈ లక్షణాలు తీవ్రంగా మారి ప్రాణాపాయానికి కూడా దారి తీయవచ్చు.
ముఖ్య లక్షణాలు:
అధిక జ్వరం: మలేరియా జ్వరం యొక్క ప్రధాన లక్షణం అధిక శరీర ఉష్ణోగ్రత. జ్వరం 102°F నుండి 106°F వరకు ఉంటుంది. ఈ జ్వరం ఒక నిర్దిష్ట కాలంలో వచ్చి తగ్గుతూ ఉంటుంది.
తీవ్రమైన చలి, వణుకు: జ్వరం ప్రారంభమయ్యే ముందు తీవ్రమైన చలి, వణుకుతో కూడిన సెగ, చెమట పట్టడం లాంటి లక్షణాలు కనిపిస్తాయి. జ్వరం వస్తూ, తగ్గుతూ ఉన్నప్పుడు ఈ లక్షణాలు పునరావృతమవుతాయి.
తలనొప్పి: చాలామంది మలేరియా రోగులు తీవ్రమైన తలనొప్పితో బాధపడతారు. ఈ తలనొప్పి సాధారణ పెయిన్ కిల్లర్స్‌తో తగ్గదు.
కండరాల నొప్పి, ఒళ్ళు నొప్పులు: శరీరంలోని కండరాలు, కీళ్ళలో తీవ్రమైన నొప్పి ఉంటుంది.
వికారం, వాంతులు: ఆహారం తీసుకోగానే వికారంగా అనిపించడం, వాంతులు కావడం కూడా సాధారణ లక్షణాలు.
బలహీనత, అలసట: రోగికి తీవ్రమైన బలహీనత, నిరంతరం అలసటగా అనిపిస్తుంది. రోజువారీ పనులు చేసుకోవడం కూడా కష్టమవుతుంది.
మలేరియా వ్యాధి దశలు:
చలి దశ : ఈ దశలో శరీరంలో చలి మొదలవుతుంది. శరీరం వణికిపోతుంది. ఈ దశ 15 నిమిషాల నుండి ఒక గంట వరకు ఉంటుంది.
వేడి దశ : చలి దశ తరువాత శరీర ఉష్ణోగ్రత చాలా ఎక్కువగా పెరుగుతుంది. శరీరమంతా వేడిగా, పొడిగా ఉంటుంది. ఈ దశ రెండు నుంచి ఆరు గంటల వరకు ఉంటుంది.
మూడవ దశ : వేడి దశ తరువాత శరీరం నుంచి చెమట అధికంగా పడుతుంది. ఈ దశలో శరీర ఉష్ణోగ్రత సాధారణ స్థితికి వస్తుంది. ఈ దశ రెండు నుంచి నాలుగు గంటల వరకు ఉంటుంది.
తీవ్రమైన మలేరియా లక్షణాలు:
మలేరియా జ్వరంను సరైన సమయంలో గుర్తించి.. చికిత్స చేయకపోతే కొన్నిసార్లు ఇది తీవ్రంగా మారుతుంది.
శ్వాస తీసుకోవడంలో ఇబ్బందులు
జ్ఞాపకశక్తి కోల్పోవడం, స్పృహ కోల్పోవడం
మూత్రపిండాలు దెబ్బతినడం
రక్తహీనత
చాలా తక్కువ రక్తపోటు
ఈ లక్షణాలు కనిపించిన వెంటనే.. డాక్టర్‌ని సంప్రదించాలి.
Also Read: ముఖంపై మొటిమలా ? ఈ ఒక్క ఫేస్ ప్యాక్‌తో ప్రాబ్లమ్ సాల్వ్
నివారణ చర్యలు:
మలేరియా నుంచి రక్షించుకోవడానికి కొన్ని ముఖ్యమైన నివారణా చర్యలు తీసుకోవడం చాలా ముఖ్యం.
దోమల సంఖ్యను నియంత్రించడం: ఇంటి చుట్టూ నీరు నిలవకుండా చూసుకోవాలి. దోమలు పెరిగే ప్రదేశాలను శుభ్రంగా ఉంచుకోవాలి.
దోమల నివారణ మందులు: దోమల నివారణకు సంబంధించిన లోషన్లు, క్రీములు ఉపయోగించాలి.
దోమతెరలు వాడటం: రాత్రి పడుకునేటప్పుడు దోమతెరలు వాడటం వల్ల దోమకాటు నుండి రక్షించుకోవచ్చు.
పూర్తిగా కప్పి ఉండే దుస్తులు: పొడవాటి చేతుల చొక్కాలు, ప్యాంటు ధరించడం వల్ల దోమ కాటును తగ్గించవచ్చు.
ఇంట్లో దోమల నివారణకు స్ప్రే: ఇంటిలో దోమలు లేకుండా చూసుకోవాలి.
మలేరియా జ్వరం ప్రాణాంతకమైన వ్యాధి అయినప్పటికీ.. సరైన సమయంలో గుర్తించి చికిత్స చేయడం ద్వారా దానిని పూర్తిగా నయం చేయవచ్చు. పైన చెప్పిన లక్షణాలు మీకు కనిపిస్తే.. తక్షణమే వైద్య డాక్టర్‌ని సంప్రదించండి.
Share
Telugu Film Chamber: ఫిలిం ఛాంబర్ లో మొదలైన మీటింగ్ , హాజరైంది వీళ్ళే 
Rainwater business: ఇక్కడ వర్షం నీటిని అమ్మి… కోట్లు గడిస్తున్నారు… ఐడియా అదిరింది కదూ!
