ఫ్లాట్‌మేట్‌తో రోజూ గొడవలు పడుతున్నారా? ప్రశాంతంగా ఉండాలంటే ఈ నియమాలు పాటించండి

Rules for living with a flatmate| ఉద్యోగం, చదువు కోసం మరో నగరానికి వెళ్లినప్పుడు ఫ్లాట్ షేర్ చేసుకోవడం సాధారణమే. ఖర్చులు తగ్గించుకోవడానికి చాలా మంది తెలియని వ్యక్తులతో కలిసి ఉంటారు. అయితే, ఒకే ఇంట్లో భిన్నమైన అలవాట్లు ఉన్నవారు ఉంటే చిన్న విషయాలు కూడా గొడవలకు దారితీయవచ్చు. ఎవరికైనా ఇల్లు ఎప్పుడూ శుభ్రంగా ఉండాలి అనిపిస్తుంది. మరొకరికి చిన్నపాటి గందరగోళం పెద్ద సమస్యగా అనిపించకపోవచ్చు. ఇలాంటి తేడాలు రోజువారీ జీవితంలో ఒత్తిడిని పెంచుతాయి. అందుకే ఫ్లాట్‌లోకి మారిన మొదటి రోజే కొన్ని ముఖ్యమైన విషయాలపై మాట్లాడుకోవడం మంచిది. ముందుగానే నియమాలు నిర్ణయించుకుంటే ఇద్దరూ ప్రశాంతంగా ఉండవచ్చు.

ఖర్చులను మొదటి రోజే స్పష్టంగా పంచుకోవాలి

అద్దె, వై ఫై, కరెంట్, గ్యాస్, కిరాణా వంటి ఖర్చులపై ముందుగానే మాట్లాడుకోవాలి. ఎవరు ఎంత చెల్లించాలి, ఎప్పుడు చెల్లించాలి అనే విషయాన్ని స్పష్టంగా నిర్ణయించండి. ఉమ్మడి ఖర్చులను ఫోన్ యాప్‌లో లేదా నోట్‌బుక్‌లో రాసి పెట్టికోండి. ఇంట్లో ఏదైనా వస్తువు రిపేర్ చేయాల్సి వస్తే ఆ ఖర్చును ఎలా షేర్ చేసుకోవాలో కూడా ముందే మాట్లాడండి.

ఇంటి పనులను ఇద్దరూ సమానంగా పంచుకోవాలి

ఇంటి శుభ్రత విషయంలో ప్రతి ఒక్కరి అభిప్రాయం ఒకేలా ఉండదు. అందుకే ఊడ్చడం, తుడవడం, పాత్రలు కడగడం, బాత్రూమ్ శుభ్రం చేయడం వంటి పనులను ముందుగానే పంచుకోవాలి.
పనిమనిషిని పెట్టుకుంటే ఆమె జీతం, పని సమయంపై కూడా ఇద్దరూ అంగీకరించాలి. వారానికి ఒకసారి పనుల జాబితాను మార్చుకుంటే ఎవరికీ భారం ఎక్కువగా అనిపించదు.

అతిథులు, వ్యక్తిగత వస్తువులపై స్పష్టమైన హద్దులు పెట్టుకోవాలి

ఫ్లాట్‌లో ఉండే ప్రతి ఒక్కరికీ వ్యక్తిగత స్థలం అవసరం. స్నేహితులు లేదా బంధువులు ఇంటికి వచ్చినప్పుడు ముందుగా ఫ్లాట్‌మేట్‌కు చెప్పడం మంచిది. మీ బంధువులు, ఫ్రెండ్స్ ఎవరైనా రాత్రి ఇంట్లో ఉండాల్సి వస్తే ముందుగానే సమాచారం ఇవ్వాలి. అలాగే, ఫ్లాట్‌మేట్ వస్తువులను వారి అనుమతి లేకుండా ఉపయోగించకూడదు.

నిద్ర, రోజువారీ సమయాలను ఒకరినొకరు గౌరవించాలి

ఒకరికి ఉదయాన్నే నిద్రలేచే అలవాటు ఉంటుంది. మరొకరికి రాత్రి ఆలస్యంగా పని చేయాల్సి ఉంటుంది. ఇలాంటి పరిస్థితుల్లో శబ్దం, టీవీ, మ్యూజిక్, ఫోన్ కాల్స్ విషయంలో పరస్పర అవగాహన అవసరం. ఎవరైనా నిద్రపోతున్నప్పుడు పెద్ద శబ్దాలు చేయకుండా ఉండటం చిన్న విషయంలా కనిపించినా చాలా ఉపయోగపడుతుంది.

Also Read: పిల్లలు హైట్ పెరగడం లేదా? రోజూ ఈ 5 యోగాసనాలు వేయండి.. ఆగకుండా ఎత్తు పెరుగుతారు

సమస్యలను దాచకుండా ప్రశాంతంగా మాట్లాడుకోవాలి

కొన్ని సమస్యలను మొదటి రోజే ఊహించి అన్ని నియమాలు పెట్టడం సాధ్యం కాదు. కలిసి ఉండే సమయంలో కొత్త సమస్యలు రావచ్చు. ఏదైనా విషయం ఇబ్బంది పెడితే మనసులో పెట్టుకోకుండా ప్రశాంతంగా మాట్లాడాలి. అదే సమయంలో ఫ్లాట్‌మేట్ చెప్పే విషయాన్ని కూడా ఓపికగా వినాలి.

Also Read: అసలు జ్ఞాన దంతాలతో ఉపయోగం ఉందా? వీటిని ఎప్పుడు తొలగించాలి

పరిస్థితులకు అనుగుణంగా నియమాలను మార్చుకోవాలి

మంచి ఫ్లాట్‌మేట్ సంబంధానికి నియమాలతో పాటు సర్దుకుపోయే మనస్తత్వం కూడా అవసరం. ఉద్యోగ సమయాలు, ఖర్చులు లేదా వ్యక్తిగత పరిస్థితులు మారితే నియమాలను కూడా మార్చుకోండి.
పరస్పర గౌరవం, స్పష్టమైన హద్దులు, మంచి కమ్యూనికేషన్ ఉంటే ఫ్లాట్ షేరింగ్ మరింత సులభంగా మారుతుంది.