ఒడిశాలో ఘోరం.. రోడ్డుపై అడ్డగించి జంటపై దాడి.. కలకలం రేపుతున్న వీడియో!

Odisha Couple Attack: బిహార్‌లో ఓ మైనర్ బాలుడు, బాలికపై జరిగిన దాడి ఘటన మరవకముందే.. ఒడిశాలోని ధెంకనాల్ జిల్లా (Dhenkanal District)లో మరో దారుణం వెలుగులోకి వచ్చింది. కొంతమంది ఆకతాయిలు ఓ యువ జంటను మార్గమధ్యంలో అడ్డుకుని దాడి చేయడమే కాకుండా వేధింపులకు గురిచేసిన దృశ్యాలు ప్రస్తుతం సోషల్ మీడియాలో తీవ్ర కలకలం రేపుతున్నాయి.

బైక్‌పై వెళ్తుండగా అడ్డగించి..

ధెంకనాల్ జిల్లాలోని ప్రముఖ పర్యాటక ప్రాంతమైన కపిలాష్ వైపు వెళ్తున్న రోడ్డుపై ఈ ఘటన జరిగింది. సదరు యువ జంట ద్విచక్రవాహనంపై ప్రయాణిస్తుండగా మార్గమధ్యంలో కొందరు వ్యక్తులు వారిని అకారణంగా నిలిపివేశారు. ఆ తర్వాత వారంతా ఒకేసారి జంటను చుట్టుముట్టి దౌర్జన్యానికి దిగారు.

#Couple_Allegedly_Harassed_in_Odisha

ODISHA | Viral Video Sparks Outrage : Couple Allegedly Assaulted & Harassed on Kapilash Road in Dhenkanal

🔴Disturbing Footage Surfaces From Dhenkanal : Young Man Allegedly Assaulted, Woman Harassed
🔴Couple Pleads for Help as Alleged… pic.twitter.com/KLUrb1w3a3

— NEWS POP (@NEWSPOPFFF) September 22, 2026

యువతి ఎంత వేడుకున్నా వినకుండా..

నెట్టింట చక్కర్లు కొడుతున్న ఈ వీడియోలో.. గుంపుగా ఉన్న ఆకతాయిలు యువకుడిపై విచక్షణా రహితంగా దాడి చేస్తుండటం స్పష్టంగా కనిపిస్తోంది. అదే సమయంలో అక్కడే ఉన్న మరికొందరు యువతి పట్ల చాలా అసభ్యకరంగా ప్రవర్తించారు. ఆ యువతి కన్నీళ్లు పెట్టుకుంటూ ‘మమ్మల్ని వదిలేయండి’ అని పదే పదే దండం పెట్టి వేడుకున్నప్పటికీ ఆ ఆకతాయిలు కొంచెం కూడా కనికరం లేకుండా వేధింపులను కొనసాగించారు.

రంగంలోకి పోలీసులు..

అయితే ఆ గుంపు జంటను ఎందుకు అడ్డుకుంది? వారి మధ్య అంతకుముందేమైనా గొడవలు జరిగాయా? లేక కావాలనే వేధించారా? అనే విషయాలు ఇంకా స్పష్టంగా తెలియరాలేదు. ఈ ఘటనపై గోండియా బ్లాక్ ఇన్‌స్పెక్టర్ ప్రతాప్ దలై మాట్లాడుతూ.. వీడియో ఆధారంగా దాడికి పాల్పడిన కొందరిని ఇప్పటికే గుర్తించామని చెప్పారు. పూర్తి స్థాయి దర్యాప్తు జరిపి, బాధ్యులపై కఠిన చర్యలు తీసుకుంటామని స్పష్టం చేశారు.

Also Read: ఈఎంఐ తక్కువే అని లోన్ తీసుకుంటున్నారా? పెద్ద తప్పు చేస్తున్నట్లే.. ఈ ప్రశ్నలకు ఆన్సర్ ఉందా?

బిహార్‌లోనూ ఇలాంటి ఘటనే..

బిహార్‌లోని జముయ్ జిల్లాలోనూ సెప్టెంబర్ 19 సాయంత్రం ఇద్దరు మైనర్లపై ఇలాగే దాడి జరిగింది. ఈ ఘటనపై తీవ్ర ఆగ్రహం వ్యక్తమవ్వడంతో.. జముయ్ ఎస్పీ బిశ్వజిత్ దయాళ్ నేతృత్వంలో ‘సిట్’ (SIT) ఏర్పాటు చేశారు. ఈ కేసులో ఇప్పటికే ముగ్గురిని అరెస్ట్ చేయగా మిగిలిన వారి కోసం పోలీసులు గాలిస్తున్నారు.

Also Read: కీబోర్డ్ F, J కీలపై ఉండే చిన్న గీతల కథేంటి? టైపింగ్ వేగానికి, ఆరోగ్యానికి ఉన్న లింకేంటి?