రోగి మరణం వెనుక గత జన్మల మిస్టరీ… సైకియాట్రిస్ట్‌కే మైండ్ బ్లాంకయ్యే ట్విస్ట్

Psychological Thriller: సైకలాజికల్ థ్రిల్లర్లు అంటే చాలా మందికి ఇష్టం. కానీ కొన్ని సినిమాలు మాత్రం హత్య ఎవరు చేశారు ? అనే ప్రశ్న కంటే… అసలు నిజం ఏంటి ? అనే సందేహంతోనే ప్రేక్షకుడిని చివరి వరకు కట్టిపడేస్తాయి. ఒక్కో క్లూ బయటపడే కొద్దీ కథ కొత్త దారిలోకి వెళ్లిపోతుంది. చూసేవాళ్లు కూడా హీరోతో పాటు కేసును సాల్వ్ చేసే ప్రయత్నం చేస్తుంటారు. అలాంటి కథతోనే ప్రేక్షకుల ముందుకొచ్చింది A Private Life. ఆస్కార్ అవార్డు గ్రహీత జోడి ఫోస్టర్ ప్రధాన పాత్రలో నటించిన ఈ ఫ్రెంచ్ సైకలాజికల్ మిస్టరీ థ్రిల్లర్ ప్రస్తుతం ఓటీటీలో మంచి స్పందన అందుకుంటోంది. మరి ఈ సినిమాలో అసలు మిస్టరీ ఏంటి ? ఎందుకు అందరూ దీని గురించి మాట్లాడుకుంటున్నారు ? ఏ ఓటీటీలో ఉంది ? అనే విషయాలను తెలుసుకుందాం పదండి.

కథలోకి వెళ్తే…

పారిస్‌లో పేరున్న సైకో అనలిస్ట్ లిలియన్ స్టైనర్. ఆమె దగ్గర చాలా మంది మానసిక సమస్యలతో చికిత్స తీసుకుంటుంటారు. తన పని పట్ల ఎంతో నిబద్ధతతో ఉండే ఆమె జీవితంలో ఒక రోజు ఊహించని సంఘటన జరుగుతుంది. రెగ్యులర్‌గా థెరపీకి వచ్చే పౌలా అనే మహిళ అకస్మాత్తుగా చనిపోతుంది. మొదట అందరూ అది ఆత్మహత్యే అనుకుంటారు. కానీ పౌలా భర్త మాత్రం ఈ మరణానికి లిలియన్‌నే బాధ్యురాలని ఆరోపిస్తాడు.

అక్కడి నుంచే కథ ఒక్కసారిగా కొత్త మలుపు తిరుగుతుంది. పౌలా దగ్గర దొరికిన ఓ రహస్యమైన ప్రిస్క్రిప్షన్, ఆమె మరణానికి ముందు జరిగిన కొన్ని విచిత్ర సంఘటనలు లిలియన్‌లో అనుమానాలు రేకెత్తిస్తాయి. ఇది సాధారణ ఆత్మహత్య కాదని, దీని వెనుక పెద్ద కుట్ర దాగి ఉందని ఆమె భావిస్తుంది. ఆ అనుమానమే ఆమెను నిజం కోసం చేసే ప్రమాదకరమైన అన్వేషణలోకి నెడుతుంది.

దర్యాప్తు ముందుకు వెళ్లే కొద్దీ హిప్నోథెరపీ, పాస్ట్ లైఫ్ రిగ్రెషన్, మానసిక చికిత్స పేరుతో జరుగుతున్న కొన్ని ఆశ్చర్యకరమైన విషయాలు ఒక్కొక్కటిగా బయటపడతాయి. సైన్స్‌ను మాత్రమే నమ్మే ఒక డాక్టర్… నమ్మశక్యం కాని సంఘటనల మధ్య చిక్కుకుంటే పరిస్థితి ఎలా ఉంటుంది ? అసలు పౌలా మరణానికి కారణం ఎవరు ? నిజంగా అది హత్యేనా ? లేక అందరికీ కనిపిస్తున్న నిజం వెనుక మరో నిజం దాగి ఉందా ? అనే ప్రశ్నలతో సినిమా చివరి వరకు ఆసక్తిని రేకెత్తిస్తుంది ఈ సినిమా.

తెలుగులోనూ స్ట్రీమింగ్

ఈ సైకలాజికల్ మిస్టరీ థ్రిల్లర్ ప్రస్తుతం Netflixలో స్ట్రీమింగ్ అవుతోంది. జూలై 29 నుంచి డిజిటల్ ప్రీమియర్ అయిన ఈ సినిమా ఒరిజినల్ ఫ్రెంచ్‌తో పాటు తెలుగు, హిందీ, ఇంగ్లీష్ ఆడియోల్లో కూడా అందుబాటులో ఉంది. జోడి ఫోస్టర్ తన నటనతో సినిమాను మరో స్థాయికి తీసుకెళ్లగా, దర్శకురాలు రెబెక్కా జ్లోటోవ్‌స్కి కథను నెమ్మదిగా ఉత్కంఠ పెంచుతూ ముందుకు తీసుకెళ్లిన తీరు థ్రిల్లర్ అభిమానులను ఆకట్టుకుంటుంది. ఇది వేగంగా పరిగెత్తే కమర్షియల్ థ్రిల్లర్ కాదు… ప్రతి సన్నివేశంలో ప్రేక్షకుడిని ఆలోచింపజేస్తూ చివరి వరకు ఉత్కంఠను కొనసాగించే సినిమా. ఈ వీకెండ్‌లో కాస్త భిన్నమైన మైండ్ గేమ్ థ్రిల్లర్ చూడాలనుకుంటే దీన్ని మీ వాచ్‌లిస్ట్‌లో చేర్చేయొచ్చు.