చావు అంచుల దాకా తీసుకెళ్ళే తొందరపాటు… ఫీల్ గుడ్ మలయాళం మూవీ

Ayothi movie OTT : కొన్ని సినిమాలు వినోదాన్ని అందిస్తాయి. మరికొన్ని మనసును తాకుతాయి. చాలా అరుదుగా వచ్చే కొన్ని చిత్రాలు మాత్రం మనిషిలోని మానవత్వాన్ని గుర్తు చేస్తాయి. అలాంటి హృదయానికి హత్తుకునే చిత్రమే అయోథి (Ayothi). 2023లో విడుదలైన ఈ తమిళ ఎమోషనల్ డ్రామాకు ఆర్. మంతిర మూర్తి దర్శకత్వం వహించారు. ఎం. శశికుమార్, యశ్‌పాల్ శర్మ, ప్రీతి అస్రాని, పుగళ్ ప్రధాన పాత్రల్లో నటించారు. విడుదలైన సమయంలో విమర్శకుల ప్రశంసలు అందుకున్న ఈ చిత్రం ప్రస్తుతం ZEE5లో స్ట్రీమింగ్ అవుతోంది. కుటుంబ బంధాల నేపథ్యంలో తెరకెక్కిన ఈ సినిమా ప్రతి ఒక్కరూ తప్పక చూడాల్సిన చిత్రంగా నిలిచింది.

అయోథి కథేంటి?

కథ ఉత్తరప్రదేశ్‌లోని అయోధ్యలో నివసించే బలరామ్ అనే వ్యక్తి కుటుంబంతో ప్రారంభమవుతుంది. సంప్రదాయాలను గట్టిగా నమ్మే అతను భార్య, ఇద్దరు పిల్లలతో కలిసి రామేశ్వరానికి పుణ్యక్షేత్ర యాత్రకు వస్తాడు. బలరామ్ ప్రవర్తన, కోపం వల్ల ఆ కుటుంబం ఎప్పుడూ భయపడుతూనే ఉంటుంది. రామేశ్వరం వెళ్లే దారిలో వీరు ప్రయాణిస్తున్న టాక్సీ ప్రమాదానికి గురవుతుంది. ఈ ప్రమాదంలో భార్య జానకి తలకు తీవ్ర గాయమై, హాస్పిటల్‌లో చికిత్స పొందుతూ మరణిస్తుంది.

సొంత ఊరు కాని చోట, భాష తెలియని ఆ ముగ్గురు (బలరామ్, శివాని, తమ్ముడు) ఒంటరిగా మిగిలిపోతారు. శవాన్ని అయోధ్యకు తీసుకెళ్లడానికి బలరామ్ దగ్గర డబ్బులు ఉండవు. పైగా మతాచారాల పేరుతో బలరామ్ శవాన్ని అక్కడే వదిలేసి వెళ్ళిపోదామనేలా ప్రవర్తిస్తాడు. ఆ సమయంలో వారికి రామేశ్వరంలో ఉండే అబ్దుల్ మాలిక్ (శశికుమార్) అనే ఒక ముస్లిం యువకుడు, అతని స్నేహితుడు అండగా నిలబడతారు. ఎలాంటి స్వార్థం లేకుండా, కేవలం మానవత్వంతో ఆ శవాన్ని అయోధ్యకు చేర్చడానికి వారు బాధ్యత తీసుకుంటారు. ఒక ముస్లిం వ్యక్తి తమకు సహాయం చేయడం బలరామ్‌కు అస్సలు నచ్చదు. అయినప్పటికీ, మాలిక్ తన ప్రాణాలను, డబ్బును పణంగా పెట్టి ఆ కుటుంబానికి ఎలా సహాయం చేశాడు? మాలిక్ చూపించిన మానవత్వం బలరామ్ మనసును ఎలా మార్చింది? అనేదే ఈ సినిమా ముగింపు.

ఎందుకు చూడాలి?

సినిమాలో పెద్ద యాక్షన్ సన్నివేశాలు, మాస్ ఎలివేషన్లు ఉండవు. కానీ ప్రతి సన్నివేశం మనసును తాకేలా ఉంటుంది. ముఖ్యంగా కష్టాల్లో ఉన్నప్పుడు మనిషికి మతం, భాష, ప్రాంతం కంటే మానవత్వమే ముఖ్యమని దర్శకుడు చాలా సహజంగా చూపించాడు. శశికుమార్ పాత్ర ఎక్కువసేపు తెరపై కనిపించకపోయినా, కథలో అతని పాత్ర ప్రభావం చాలా బలంగా ఉంటుంది. యశ్‌పాల్ శర్మ నటన కూడా సినిమాకు ప్రధాన ఆకర్షణ. మొదట కఠినంగా కనిపించే అతని పాత్రలో వచ్చే మార్పును ఎంతో సహజంగా చూపించారు. ప్రీతి అస్రాని తన పాత్రలో హృదయానికి హత్తుకునే నటన కనబరిచింది. ఎమోషనల్ డ్రామాలు, కుటుంబ కథలు, మానవత్వాన్ని గొప్పగా చూపించే సినిమాలు ఇష్టపడేవారికి అయోథి తప్పకుండా నచ్చుతుంది. ఓటీటీలో ప్రశాంతంగా కూర్చుని కుటుంబంతో కలిసి చూడదగ్గ అరుదైన చిత్రాల్లో ఇది ఒకటి.