Animated Fantasy Movie: మంచి కథ, భావోద్వేగం ఉండే యానిమేషన్ సినిమాలను చూస్తే వచ్చే కిక్కే వేరు. చిన్న పిల్లల నుంచి పెద్దల వరకు అందరినీ ఆకట్టుకునే ఇలాంటి సినిమాలను ఎవరు ఇష్టపడరు చెప్పండి. ముఖ్యంగా జంతువుల చుట్టూ తిరిగే కథలు మనసుకు మరింత దగ్గరవుతాయి. అలాంటి ఓ అద్భుతమైన యానిమేటెడ్ ఫాంటసీ మూవీ ‘ఆల్ డాగ్స్ గో టు హెవెన్’ (All Dogs Go to Heaven). చనిపోయిన ఓ కుక్క తిరిగి భూమిపైకి వచ్చి తన శత్రువుపై పగ తీర్చుకోవాలని ప్రయత్నించడం, ఆ ప్రయాణంలో ప్రేమకు అసలైన అర్థం తెలుసుకోవడం ఈ సినిమా స్పెషాలిటీ.
చార్లీ బి. బార్కిన్ అనే కుక్క తన వ్యాపార భాగస్వామి కార్‌ఫేస్ తో కలిసి ఓ క్యాసినోను నడుపుతుంటుంది. అయితే, వ్యాపారంలో లాభాలను పంచుకోవడం ఇష్టం లేని కార్‌ఫేస్, చార్లీని చంపేందుకు ప్లాన్ వేస్తాడు. అతని మనుషులు చార్లీని కారుతో తొక్కించి చంపేస్తారు. అలా చనిపోయిన చార్లీ నేరుగా స్వర్గానికి చేరుకుంటుంది. అక్కడ ఓ దేవదూత కుక్క దానికి ఓ ప్రత్యేకమైన పాకెట్ వాచ్ చూపిస్తుంది. ఆ వాచ్ చార్లీ జీవితానికి ప్రతీక. అది నడుస్తున్నంత కాలం చార్లీ బతికి ఉంటుందని చెబుతుంది.
కానీ, చార్లీకి స్వర్గంలో ఉండటం నచ్చదు. తనను మోసం చేసి చంపిన కార్‌ఫేస్‌పై పగ తీర్చుకోవాలనే కోరికతో తిరిగి భూమిపైకి రావాలని నిర్ణయించుకుంటుంది. స్వర్గంలోకి మళ్లీ ప్రవేశించే అవకాశం కోల్పోతావని హెచ్చరించినా వినకుండా, ఆ వాచ్‌ను వెనక్కి తిప్పి భూమిపైకి వచ్చేస్తుంది. అక్కడ తన పాత స్నేహితుడు ఇచీని కలుసుకుని, కార్‌ఫేస్‌పై ప్రతీకారం తీర్చుకోవడానికి ప్లాన్ చేస్తుంది.
ఈ క్రమంలో కార్‌ఫేస్ ఓ అనాథ బాలిక ఆన్-మేరీని తన క్యాసినో కోసం ఉపయోగించుకుంటున్నాడని చార్లీకి తెలుస్తుంది. జంతువులతో మాట్లాడగలిగే ప్రత్యేక శక్తి ఉన్న ఆ చిన్నారి, ఏ గుర్రం లేదా జంతువు గెలుస్తుందో ముందే చెప్పగలదు. దీంతో కార్‌ఫేస్ ఆమెను తన లాభాల కోసం వాడుకుంటుంటాడు. చార్లీ కూడా మొదట తన ప్రతీకార ప్లాన్ కోసం ఆన్-మేరీని ఉపయోగించుకోవాలని అనుకుంటుంది. కానీ ఆ చిన్నారితో గడిపే క్రమంలో ఆమెపై ప్రేమ పెరుగుతుంది.
ఒకవైపు కార్‌ఫేస్‌పై పగ, మరోవైపు ఆన్-మేరీతో పెరుగుతున్న అనుబంధం… ఈ రెండింటి మధ్య చార్లీ మనసు మారుతుంది. చివరకు ఆ చిన్నారి ప్రాణాలకు ప్రమాదం ఎదురైనప్పుడు, తనను తాను కాపాడుకోవడం కంటే ఆమెను రక్షించడమే ముఖ్యమని నిర్ణయించుకుంటుంది. ఆ క్రమంలో తన ప్రాణాలను సైతం పణంగా పెడుతుంది. పగతో భూమిపైకి వచ్చిన చార్లీ చివరకు ఏం చేశాడు ? పగను ఎలా తీర్చుకున్నాడు ? క్లైమాక్స్ ఏంటి ? అన్నది తెలియాలంటే సినిమాను చూడాల్సిందే.
‘ఆల్ డాగ్స్ గో టు హెవెన్’ 1989లో విడుదలైన ఇంగ్లీష్ యానిమేటెడ్ ఫాంటసీ మూవీ. అమెజాన్ ప్రైమ్ వీడియో (Amazon Prime Video)లో స్ట్రీమింగ్ అవుతున్న ఈ సినిమా ఇంగ్షీషులో ఉంది. 1989లో విడుదలైన ఈ క్లాసిక్ చిత్రానికి డాన్ బ్లూత్ (Don Bluth) దర్శకత్వం వహించారు. బర్ట్ రేనాల్డ్స్ (Burt Reynolds), డోమ్ డెలూయిస్ (Dom DeLuise), విక్టైబ్యాక్ (Vic Tayback), జుడిత్ బార్సీ (Judith Barsi) తదితరులు తమ గొంతులతో పాత్రలకు ప్రాణం పోశారు. ఈ సినిమా పిల్లలతో పాటు పెద్దలకూ నచ్చేలా ఉంటుంది. కాబట్టి మీ పిల్లలతో కలిసి ఈ వీకెండ్ ఈ సినిమాపై ఒక లుక్కేయడం మరచిపోవద్దు.
Read Also: స్పాంజ్‌బాబ్ ఫ్రెండ్ పాట్రిక్‌కి సొంతంగా షో…. నవ్వులు పూయించేందుకు వచ్చేసిన నయా సీజన్
Share
యశ్ కోసం రామాయణ రిజెక్ట్ చేసిన నటి...నీ పిచ్చి తగలెయ్యా !
ఆకాశం నుంచి మాంసం ముక్కల వాన.. భయంతో జనాలు పరుగులు, ఎక్కడంటే?
