Crime Thriller OTT : థ్రిల్లర్ ఎలిమెంట్స్ తో ఒక హాలీవుడ్ రివెంజ్ డ్రామా ఆసక్తికరమైన కథనంతో ఆకట్టుకుంటోంది. కూతురు చనిపోయిన బాధలో ఉన్న ఒక తల్లి, పోలీసుల మీద కసిగా చేసే పోరాటమే ఈ కథ. ఇది మామూలు సెంటిమెంట్ సినిమా కాదు, ఇందులో పాత్రలు నోటికొచ్చినట్టు తిట్టుకుంటూ, అవసరమైతే బాంబులు కూడా వేసుకునేంత రఫ్ గా ఉంటాయి. ఎవరు హీరోనో ఎవరు విలనో అర్థం కానంత గందరగోళంగా, చాలా గ్రిప్పింగ్గా సాగే సినిమా ఇది. ఐయండిబిలో 8.1 రేటింగ్ ఉన్న ఈ సినిమా ఆస్కార్ ను కూడా గెలిచింది.
ఈ క్రైమ్ థ్రిల్లర్ మూవీ పేరు ‘త్రీ బిల్బోర్డ్స్ అవుట్సైడ్ ఎబ్బింగ్, మిస్సౌరీ’ (Three Billboards Outside Ebbing, Missouri). 2017లో వచ్చిన ఈ సినిమా బాక్సాఫీస్ వద్ద భారీ విజయం సాధించడమే కాకుండా విమర్శకుల ప్రశంసలు అందుకుంది. ముఖ్యంగా హీరోయిన్ ఫ్రాన్సిస్ మెక్డోర్మాండ్ తన నటనతో అందరినీ కట్టిపడేసి ఉత్తమ నటిగా ఆస్కార్ అందుకున్నారు. అలాగే పోలీస్ ఆఫీసర్ పాత్రలో నటించిన సామ్ రాక్వెల్ కూడా ఉత్తమ సహాయ నటుడిగా ఆస్కార్ గెలుచుకున్నారు. మొత్తంగా ఈ సినిమా 7 ఆస్కార్ నామినేషన్లను దక్కించుకోవడమే కాకుండా, గోల్డెన్ గ్లోబ్, బాఫ్టా వంటి ప్రతిష్టాత్మక అవార్డులను కూడా కొల్లగొట్టింది. మార్టిన్ మెక్డొనాల్డ్ ఈ చిత్రాన్ని చాలా ఎమోషనల్ గా తెరకెక్కించారు. ఇది జియో హాట్ స్టార్, ప్రైమ్ వీడియోలో అందుబాటులో ఉంది.
అమెరికాలో ఉండే మిస్సౌరీలోని ఒక చిన్న ఊరిలో మిల్డ్రెడ్ అనే మహిళ ఉంటుంది. ఆమె కూతురు ఏడు నెలల క్రితం దారుణంగా హత్యకు గురవుతుంది. కానీ పోలీసులు గాలికి వదిలేశారని, అసలు నిందితుడిని పట్టుకోవడంలో ఏమాత్రం శ్రద్ధ చూపడం లేదని మిల్డ్రెడ్ తెగ ఫీలవుతుంది. దీంతో ఒకరోజు ఊరి చివర ఎవరూ పట్టించుకోని మూడు పాత బిల్బోర్డ్లను అద్దెకు తీసుకుంటుంది. వాటి మీద కొన్ని అక్షరాలు రాయించి నిరసన తెలుపుతుంది. ఈ బోర్డులు చూసి పోలీస్ చీఫ్ విలౌబీకి, ఆఫీసర్ డిక్సన్కు చిర్రెత్తుకొస్తుంది. ఊరి ప్రజలు కూడా మిల్డ్రెడ్ని తప్పుబడతారు. ఎందుకంటే విలౌబీకి క్యాన్సర్ ఉందని, ఆయన మంచివాడని అందరూ నమ్ముతారు.
కానీ మిల్డ్రెడ్ మాత్రం వెనక్కి తగ్గదు. నా కూతురు చనిపోయిన బాధ ముందు, నీ క్యాన్సర్ పెద్ద విషయం కాదని ముక్కుసూటిగా చెబుతుంది. విలౌబీ మర్యాదగా చెప్పినా వినదు, పైగా తనను అడ్డుకోవాలని చూసిన డిక్సన్ లాంటి వాళ్ళకి చుక్కలు చూపిస్తుంది. ఈ క్రమంలో ఆమె పోలీస్ స్టేషన్ మీద పెట్రోల్ బాంబు వేయడం వంటి సీన్లు మాస్ రేంజ్లో ఉంటాయి. కథలో ట్విస్ట్ ఏంటంటే.. చీఫ్ విలౌబీ అనారోగ్యంతో ఆత్మహత్య చేసుకుంటాడు. ఆయన చనిపోతూ మిల్డ్రెడ్కు, డిక్సన్కు విడివిడిగా ఉత్తరాలు రాసి వెళ్తాడు. దీంతో కథ మరింత ఇంటెన్స్ గా మారుతుంది అసలు ఆ ఉత్తరాలలో ఏముంది ? కిల్లర్ ఎవరు ? పోలీసులు పట్టుకుంటారా ? ఈ క్లైమాక్స్ ఏమిటి ? అనే విషయాలను ఈ సినిమాను చూసి తెలుసుకోవాల్సిందే. .
Read Also : స్క్రీన్ ముందు నుంచి కదలనీకుండా చేసే నెట్ ఫ్లిక్స్ సిరీస్ లు… వీటిలో ఒక్కటి చూసినా బుర్ర కరాబ్
Share
150 మీటర్ల ఎత్తున నిర్మాణానికే మొగ్గు.. తుమ్మిడిహట్టి బ్యారేజీపై రేవంత్ రెడ్డి కీలక ఆదేశం
Krithi Shetty : చీరలో వయ్యారాలు వలకబోస్తున్న కృతి.. చూపుతిప్పుకోలేరు...
