Disclosure Day OTT Release : ఆకాశంలో వింత వస్తువు కనిపిస్తే అది ఏదో గ్రహశకలం అనుకుంటాం. రేడియోలోనో, టీవీలోనో విచిత్రమైన సంకేతాలు వినిపిస్తే సాంకేతిక లోపం అనుకోవచ్చు. కానీ ప్రపంచం మొత్తం చూస్తున్న ఓ లైవ్ ప్రసారంలోనే ఊహించని సంఘటన జరిగి, భూమిపై మనుషులు మాత్రమే లేరనే విషయం నిజమని తేలితే… దశాబ్దాలుగా దాచి పెట్టిన ఓ రహస్యం ఒక్కసారిగా బయట పడితే ప్రభుత్వాలు, ప్రజలు ఎలా స్పందిస్తారు ? ఇలాంటి ప్రశ్నలతో తెరకెక్కిన సైన్స్ ఫిక్షన్ మిస్టరీ థ్రిల్లర్ ‘Disclosure Day’. థియేటర్లలో ప్రపంచవ్యాప్తంగా సుమారు 241 మిలియన్ డాలర్లు వసూలు చేసిన ఈ చిత్రం కథలో అసలు రహస్యం ఏంటో చూద్దాం.
మార్గరెట్ ఫెయిర్‌ చైల్డ్ ఓ వాతావరణ నిపుణురాలు. టెలివిజన్‌లో ప్రత్యక్ష ప్రసారం చేస్తూ వాతావరణ వివరాలు అందించే సమయంలో ఆమెకు ఊహించని అనుభవం ఎదురవుతుంది. అది సాధారణ ప్రసారంలో జరిగిన చిన్న పొరపాటు కాదు. ఆమె ప్రవర్తన, ఆ క్షణంలో కనిపించిన సంఘటన ప్రజల దృష్టిని ఆకర్షిస్తాయి. లైవ్‌లో జరిగిన ఆ పరిణామం వెనుక ఏదో అసాధారణమైన విషయం ఉందనే అనుమానం మొదలవుతుంది.
సాధారణంగా ఇలాంటి సంఘటన జరిగితే దాన్ని సాంకేతిక సమస్యగా కొట్టి పారేయొచ్చు. కానీ ఈసారి ఆ సంఘటనకు సంబంధించిన ఆధారాలు, దాని వెనుక ఉన్న సమాచారం ఒక్కొక్కటిగా బయటకు రావడం మొదలవుతుంది. అప్పటి వరకు చాలామందికి ఊహాగానంలా కనిపించిన ఏలియన్స్ ఉనికి గురించి చర్చ మరింత తీవ్రమవుతుంది. ఇదే సమయంలో డాక్టర్ డేనియల్ కెల్నర్ అనే సైబర్ సెక్యూరిటీ నిపుణుడు ఈ వ్యవహారంలోకి ఎంట్రీ ఇస్తాడు. ప్రభుత్వ వ్యవస్థల్లో దాగి ఉన్న సమాచారం, రహస్య డేటా, వాటిని బయట పెట్టకుండా ఉంచే ప్రయత్నాలపై అతడు దృష్టి పెడతాడు.
ఈ సంఘటన ఒక్కరోజులో జరిగినది కాదని, దీని వెనుక చాలా కాలంగా కొనసాగుతున్న ఓ కుట్ర ఉండవచ్చని అతడికి అర్థమవుతుంది. మార్గరెట్ కు ఎదురైన అనుభవం, డేనియల్ వెలికితీసే రహస్యాల మధ్య ఉన్న లింకు కథను కీలక మలుపు తిప్పుతుంది. ఏలియన్స్ గురించి ప్రపంచానికి నిజం చెప్పాలనుకునే వాళ్లు ఒకవైపు ఉంటే, ఆ సమాచారాన్ని బయటకు రానివ్వకూడదని భావించే శక్తులు మరోవైపు ఉంటాయి. నిజం బయటపడితే ప్రపంచం మొత్తం మారిపోవచ్చనే భయం కూడా ఈ వ్యవహారంలో భాగమవుతుంది.
ఇక్కడ ఏలియన్స్ ఉన్నాయా లేదా అన్నది అసలు ప్రశ్న కాదు. వాళ్లు ఉన్నారని నిరూపించే ఆధారాలు నిజంగా బయట పడితే, ప్రభుత్వాలు ఇన్నాళ్లూ ఏం దాచాయి ? ప్రజలకు తెలియకుండా ఉంచిన రహస్యం వెనుక కారణమేంటి ? ఈ నిజాన్ని ప్రపంచానికి చెప్పే ప్రయత్నంలో మార్గరెట్, డేనియల్ ఎలాంటి ప్రమాదాలను ఎదుర్కొంటారు ? అన్న ప్రశ్నలకు సమాధానం కావాలంటే ఈ సెన్సేషనల్ మూవీని చూడాల్సిందే.
Also Read : హోటల్ నిండా దెయ్యాలు… చిన్న పిల్లాడిలో డెమాన్… నవ్విస్తూనే భయపెట్టడానికి తిరిగొచ్చిన సీజన్ 2
‘డిస్క్లోజర్ డే’ మూవీకి ‘జురాసిక్ పార్క్’, ‘E.T.’ వంటి చిత్రాలతో ప్రేక్షకులను ఆశ్చర్యపరిచిన స్టీవెన్ స్పీల్‌బర్గ్ దర్శకత్వం వచ్చించారు. ఈ సినిమా అక్టోబర్ 9 నుంచి అమెరికాలో Peacockలో స్ట్రీమింగ్‌కు వచ్చింది. ఎమిలీ బ్లంట్ మార్గరెట్ ఫెయిర్‌చైల్డ్‌గా, జోష్ ఓ’కానర్ డాక్టర్ డేనియల్ కెల్నర్‌గా నటించారు. కోలిన్ ఫిర్త్, ఈవ్ హ్యూసన్, కోల్మన్ డొమింగో, వ్యాట్ రసెల్ కూడా కీలక పాత్రల్లో కనిపిస్తారు. ఈ సినిమా అమెరికాలో 2026 జూన్ 12న థియేటర్లలో విడుదలై, అక్టోబర్ 9 నుంచి ఓటీటీలో స్ట్రీమింగ్‌కు వచ్చింది.
Share
పైకి నవ్వుతున్నా లోపల ఆందోళనా.. ఈ 5 సంకేతాలు మీలో ఉంటే బీ కేర్ ఫుల్!
పోలవరం ఎమ్మెల్యేపై పవన్ కల్యాణ్ సీరియస్.. విచారణకు హైలెవెల్ కమిటీ ఏర్పాటు!
