వారాణసి వీధుల్లో ఒకే ఒక్కరోజులో జరిగే కథ… మనసును హత్తుకునే ఫీల్ గుడ్ డ్రామా

Feel Good Malayalam movie: ప్రతి సినిమా పెద్ద యాక్షన్ సన్నివేశాలు, భారీ ట్విస్టులతోనే ఆకట్టుకోవాల్సిన అవసరం లేదు. కొన్ని కథలు చాలా నెమ్మదిగా సాగినా, చూసిన తర్వాత చాలాసేపు మనసులో నిలిచిపోతాయి. అలాంటి హృదయాన్ని తాకే మలయాళ చిత్రమే ‘Chinna Chinna Aasai’. వారణాసి అందాలు, ఇద్దరు అపరిచితుల మధ్య ఏర్పడే ఆత్మీయ అనుబంధం, జీవితంపై కొత్త ఆశను కలిగించే భావోద్వేగాలతో ఈ సినిమా ప్రత్యేక గుర్తింపు తెచ్చుకుంది. థియేటర్లలో మంచి ప్రశంసలు అందుకున్న ఈ చిత్రం ఇప్పుడు ఓటీటీలో మరింత మంది ప్రేక్షకులను ఆకట్టుకుంటోంది.

కథలోకి వెళ్తే…

తంజావూరుకు చెందిన లీలా జీవితంలో ఎన్నో బాధలు, జ్ఞాపకాలను మోస్తూ వారణాసి యాత్రకు బయలుదేరుతుంది. భక్తితో మొదలైన ఆ ప్రయాణం అనుకోని మలుపు తిరుగుతుంది. ఒక దశలో ఆమె తన టూర్ గ్రూప్ నుంచి విడిపోతుంది. అదే సమయంలో ఆమె బ్యాగ్, డబ్బు, మొబైల్ ఫోన్ కూడా పోతాయి. భాష తెలియని నగరంలో ఎక్కడికి వెళ్లాలో తెలియక తీవ్ర ఆందోళనకు గురవుతుంది.

ఆ సమయంలో కేరళకు చెందిన రిటైర్డ్ ఉపాధ్యాయుడు మాధవన్ మాస్టర్ ఆమెకు ఎదురవుతాడు. లీలా పరిస్థితిని అర్థం చేసుకున్న ఆయన ఆమెకు సహాయం చేయాలని నిర్ణయించుకుంటాడు. మొదట చిన్న సహాయంగా మొదలైన పరిచయం క్రమంగా ఇద్దరి మధ్య ఒక ఆత్మీయ బంధంగా మారుతుంది.

ఇద్దరూ కలిసి వారణాసి సందుల్లో తిరుగుతారు. గంగా ఘాట్ల వద్ద కూర్చొని జీవితంలోని ఎన్నో విషయాల గురించి మాట్లాడుకుంటారు. లీల తన జీవితంలో ఎదుర్కొన్న కష్టాలను పంచుకుంటే, మాధవన్ మాస్టర్ కూడా తన మనసులో దాచుకున్న బాధలను బయటపెడతాడు. వారి మాటల్లో ఎక్కడా అతిశయోక్తి ఉండదు. చాలా సహజంగా, నిజ జీవితంలో జరిగే సంభాషణల్లాగే సినిమా ముందుకు సాగుతుంది.

ప్రయాణం కొనసాగుతున్న కొద్దీ లీలకు వారణాసి కొత్తగా కనిపిస్తుంది. చిన్న చిన్న కోరికలు నెరవేరుతున్న ఆనందం, కొత్త మనిషిలో కనిపించిన ఆప్యాయత, జీవితంపై తిరిగి కలిగిన నమ్మకం ఆమెను పూర్తిగా మార్చేస్తాయి. మరోవైపు మాధవన్ మాస్టర్ కూడా చాలాకాలంగా తనలో నలిగిపోయిన భావోద్వేగాల నుంచి బయటపడటం ప్రారంభిస్తాడు.

ఈ ప్రయాణంలో వారణాసి ఘాట్లు, ఆలయాలు, ఇరుకైన వీధులు కూడా కథలో భాగమైన పాత్రల్లా అనిపిస్తాయి. గోవింద్ వసంత అందించిన సంగీతం ప్రతి సన్నివేశానికి మరింత భావోద్వేగాన్ని జోడిస్తుంది. సినిమా నెమ్మదిగా సాగినా ఎక్కడా బోర్ అనిపించదు. ప్రతి సన్నివేశం తర్వాత ఏమవుతుందనే ఆసక్తిని కలిగిస్తుంది.

చివరికి లీలా తన టూర్ గ్రూప్‌ను కలుసుకుందా? మాధవన్ మాస్టర్ జీవితంలో దాగి ఉన్న అసలు కథ ఏమిటి? ఈ ఒక్క రోజు పరిచయం ఇద్దరి జీవితాలను ఎలా మార్చింది? వారణాసి వారికి ఏ కొత్త అర్థాన్ని నేర్పింది? అనే ప్రశ్నలకు సమాధానమే ‘చిన్న చిన్న ఆసై’ మూవీ.

తెలుగులో ఉందా లేదా?

‘చిన్న చిన్న ఆసై’ చిత్రంలో ఇంద్రన్స్, మధు, అపర్ణ బాలమురళి, విష్ణు అగస్త్య ప్రధాన పాత్రల్లో నటించారు. వర్షా వాసుదేవ్ దర్శకత్వం వహించిన ఈ చిత్రానికి గోవింద్ వసంత సంగీతం అందించారు. ప్రస్తుతం ఈ సినిమా JioHotstarలో తెలుగు, మలయాళం, తమిళం, కన్నడ, హిందీ భాషల్లో స్ట్రీమింగ్ అవుతోంది. మనసుకు ప్రశాంతతనిచ్చే, భావోద్వేగాలతో నిండిన కథలను ఇష్టపడే వారికి ‘చిన్న చిన్న ఆసై’ అద్భుతమైన ఎంపిక. సినిమా పూర్తయ్యాక కూడా ఆ ఇద్దరి ప్రయాణం, వారణాసి అందాలు చాలా సేపు మీ మనసులోనే నిలిచిపోతాయి.