మనుషులను రాక్షసులుగా మార్చే మందు… రెండు సీజన్లతో వణికిపోయిన ఓటీటీ

Horror series OTT : భయంకరమైన రాక్షసులతో ఒక ఉత్కంఠభరితమైన హిస్టారికల్ హారర్ థ్రిల్లర్ ఓటీటీలో గూస్ బంప్స్ తెప్పిస్తోంది. 1945 నాటి కాలంలో జపాన్ లో సాగే ఈ సిరీస్, మనుషులపై జరిగే క్రూరమైన సైంటిఫిక్ ప్రయోగాల వల్ల పుట్టిన ఒక వింత రాక్షసి చుట్టూ కథ తిరుగుతుంది. భారీ విజువల్స్, అద్భుతమైన యాక్షన్ సన్నివేశాలతో ఈ సిరీస్ ఓటీటీలో బాగా ట్రెండ్ అయింది. రెండు సీజన్లతో వచ్చిన ఈ సిరీస్ ఒక కొత్త ప్రపంచంలోకి తీసుకెళ్తుంది. ఒక్క ఎపిసోడ్ స్టార్ట్ చేస్తే ఇక చివరి ఎపిసోడ్ వరకు కుర్చీలకు అతుక్కుపోతారు.

నెట్‌ఫ్లిక్స్‌ (Netflix)లో స్ట్రీమింగ్

ఈ కొరియన్ హారర్ మిస్టరీ సిరీస్ పేరు ‘గైంగ్‌సియాంగ్ క్రీచర్’ (Gyeongseong Creature). ఇందులో పార్క్ సియో-జూన్, హాన్ సో-హీ ప్రధాన పాత్రల్లో నటించారు. సిరీస్‌లో రాక్షసిని జపాన్ సైన్యం ‘యూనిట్ 731’ పేరుతో చేసిన నిజమైన క్రూర ప్రయోగాల ఆధారంగా సృష్టించారు. దాదాపు 430 కోట్ల రూపాయల భారీ బడ్జెట్‌తో నిర్మించిన ఈ ప్రాజెక్ట్ కోసం 1945 నాటి కొరియా వాతావరణాన్ని అచ్చం అలాగే చూపించేలా భారీ సెట్స్ వేశారు. ఇందులో వాడిన విజువల్ ఎఫెక్ట్స్, ఆ రాక్షసి రూపం హాలీవుడ్ స్థాయి మేకింగ్‌ను తలపిస్తాయి. ముఖ్య పాత్రల్లో నటించిన పార్క్ సియో-జూన్, హాన్ సో-హీలకు ప్రపంచవ్యాప్తంగా ఉన్న క్రేజ్ వల్ల ఈ సిరీస్ నెట్‌ఫ్లిక్స్‌ (Netflix)లో టాప్ ట్రెండింగ్‌లో నిలిచింది. ఇది రెండు భాగాలుగా వచ్చింది. మొదటి భాగం (7 ఎపిసోడ్లు) 2023 డిసెంబర్ 22న విడుదలవ్వగా, రెండో భాగం (3 ఎపిసోడ్లు) 2024 జనవరి 5న విడుదలైంది. మొత్తం 10 ఎపిసోడ్లతో ఈ సీజన్ 1945 కాలం నాటి కథను చూపించింది. ఇక సీజన్ 2: మొత్తం 7 ఎపిసోడ్లతో 2024 సెప్టెంబర్ 27న విడుదలైంది. ఇది మొదటి సీజన్‌కు భిన్నంగా 79 ఏళ్ల తర్వాత, అంటే ప్రస్తుత కాలం నేపథ్యంలో సాగుతుంది.

స్టోరీలోకి వెళ్తే

1945లో జపాన్ పాలనలో ఉన్న కొరియాలో టే-సాంగ్ అనే ఒక ధనవంతుడు ఉంటాడు. ఒక పోలీస్ అధికారి తన ప్రేయసిని వెతికి పెట్టమని ఇతడిని ఆదేశిస్తాడు. దాంతో టే-సాంగ్, తప్పిపోయిన మనుషుల్ని వెతకడంలో ఆరితేరిన చై-ఒక్ అనే యువతి సహాయం తీసుకుంటాడు. వీళ్ళు ఆ అమ్మాయి కోసం వెతుకుతుండగా, అనుమానాస్పదంగా ఉన్న ఒక మిలిటరీ ఆసుపత్రిలోకి వెళ్లాల్సి వస్తుంది. ఆ ఆసుపత్రిలో జపాన్ సైన్యం మనుషులపై రహస్యంగా భయంకరమైన ప్రయోగాలు చేస్తుంటుంది. ఒక వింత వైరస్ వల్ల అక్కడున్న ఒక మనిషి క్రూరమైన రాక్షసిగా మారిపోతుంది. అక్కడ బందీలుగా ఉన్న వారిని కాపాడే ప్రయత్నంలో హీరో హీరోయిన్లు ప్రాణాలకు తెగించి పోరాడుతారు. ఆ ఆసుపత్రి లోపల జరిగే భయానక పరిస్థితులు, సైన్యం చేసే అరాచకాలు ఈ సిరీస్‌లో ప్రధానంగా కనిపిస్తాయి. అయితే కథలో అసలు ట్విస్ట్ ఏమిటంటే, ఆ రాక్షసిగా మారింది మరెవరో కాదు, పదేళ్ల క్రితం చై-ఒక్ కి దూరమైన తన కన్నతల్లి. తన తల్లిని ఆ రూపంలో చూసి ఆమె తట్టుకోలేకపోతుంది. ఆతరువాత యాక్షన్ పీక్స్ కి వెళ్తుంది. అటు రాక్షసి నుండి, ఇటు జపాన్ సైన్యం నుండి తప్పించుకుని హీరో హీరోయిన్లు ఎలా బయటపడ్డారు అనేదే ఈ సీజన్ ఉత్కంఠభరితమైన ముగింపు.