పెళ్ళయిన వ్యక్తితో రిలేషన్ లో… మెదడును కదిలించే క్లైమాక్స్

Malayalam Mystery Drama: ఈతరం యూత్ ట్విట్టర్, ఫేస్ బుక్, ఇన్స్టాల గురించి ఎంత ఆబ్సెస్డ్ గా ఉన్నారో ప్రత్యేకంగా చెప్పక్కర్లేదు. కానీ దానివల్ల వచ్చే అనవసరమైన వివాదాలు కూడా అలాగే ఉన్నాయి. ఈ సోషల్ మీడియా వల్ల ఎన్ని ఉపయోగాలు ఉన్నాయో, అన్నే నష్టాలు కూడా ఉన్నాయి. సోషల్ మీడియా ఒకరి ప్రశాంతమైన జీవితాన్ని ఎలా ముక్కలు చేస్తుంది ? అన్నది తెలుసుకోవాలంటే ‘థియేటర్ ది మిత్ ఆఫ్ రియాలిటీ’ (Theatre The Myth of Reality) అనే ఈ మలయాళం సినిమాను చూడాల్సిందే.

కథలోకి వెళ్తే…

కేరళలోని ఒక మారుమూల ద్వీపంలో ఉన్న పవిత్రమైన దేవతా వనం నేపథ్యంలో కథ నడుస్తుంది. మీరా మన హీరోయిన్ పేరు. ఆమె తల్లితో కలిసి బయట ప్రపంచానికి, ఆధునిక సాంకేతికతకు దూరంగా నివసిస్తుంటారు. సమాజం, బంధువులు వాళ్ళను వెలివేస్తారు. కానీ వాళ్ళు మాత్రం తమ సాంప్రదాయ నమ్మకాలు, ఆచారాలు, దైవ భక్తితో… ఎవ్వరూ లేని ఆ ప్రదేశంలో ఎంతో ప్రశాంతమైన జీవితాన్ని గడుపుతుంటారు. అంతా సజావుగా సాగుతున్న సమయంలో, ఆ ద్వీపంలో ఒక వింతైన ఆరోగ్య అత్యవసర పరిస్థితి తలెత్తుతుంది.

ఆ సమయంలో వారు చేసే కొన్ని పనులు, ప్రవర్తనను ఎవరో ఒకరు ఒక చిన్న వీడియో క్లిప్‌గా రికార్డ్ చేసి, సోషల్ మీడియాలో పోస్ట్ చేస్తారు. ఆ వీడియో కాస్తా ఇంటర్నెట్‌లో విపరీతంగా వైరల్ అయిపోతుంది. రాత్రికి రాత్రి వాళ్ళ జీవితం పబ్లిక్ డొమైన్‌లోకి వెళ్ళిపోతుంది .ఆ ఒక్క వైరల్ వీడియోతో వారి ప్రశాంతమైన జీవితం కాస్తా పబ్లిక్ టాపిక్‌గా మారిపోతుంది. నెటిజన్లు, సోషల్ మీడియా ఇన్‌ఫ్లుయెన్సర్లు ఆ తల్లికూతుళ్ల జీవితాన్ని, వారి నమ్మకాలను తమకు నచ్చినట్లుగా విశ్లేషించడం, ట్రోల్ చేయడం స్టార్ట్ చేస్తారు.

కొందరు వారిని మూఢనమ్మకాలు పాటించే వెనకబడిన వారుగా చిత్రీకరిస్తే, మరికొందరు ఆధ్యాత్మిక గురువులుగా భావిస్తారు. డిజిటల్ ప్రపంచం సృష్టించే అబద్ధపు నిజాలు వాస్తవ జీవితానికి ఎంత దూరంగా ఉంటాయో ఈ సినిమాను చూస్తే అర్థం అవుతుంది. ఇంతకీ ఆ అమ్మాయికి వచ్చిన వ్యాధి ఏంటి ? దానికి సోషల్ మీడియాలో అంత ట్రోలింగ్ ఎందుకు జరిగింది ? ఆ ప్రభావం వాళ్ళపై ఎలా పడింది ? చివరకు ఆ తల్లీకూతుర్లు ఏమయ్యారు ? అన్నది ఈ సినిమాలో చూసి తెలుసుకోవలసిన అంశం.

ఏ ఓటీటీలో ఉందంటే ?

అవార్డు విన్నింగ్ మలయాళ మిస్టరీ డ్రామా ‘థియేటర్ ది మిత్ ఆఫ్ రియాలిటీ’. రీమా కల్లింగల్ ప్రధాన పాత్రలో నటించిన ఈ చిత్రానికి సజిన్ బాబు దర్శకత్వం వహించారు. ManoramaMax, Amazon Prime Videoలలో మలయాళం భాషలో స్ట్రీమింగ్ అవుతోంది. తెలుగు డబ్బింగ్ ఇంకా రాలేదు. 2025లో విడుదలైన ఈ మలయాళం మాస్టర్ పీస్ ను ఇంకా చూడకపోతే వెంటనే ఒక లుక్కేయండి. ముఖ్యంగా సోషల్ మీడియాను వాడే వాళ్ళు అసలు మిస్ అవ్వొద్దు.