Marathi Family Drama: పిల్లలను చూసుకోవడానికి ఇంట్లోకి ఓ బేబీసిట్టర్ను తీసుకొస్తే… కొద్దిరోజుల్లోనే ఆ పిల్లాడికి ఆమెతో ప్రత్యేకమైన అనుబంధం ఏర్పడుతుంది. కానీ ఆ పిల్లాడు తల్లిదండ్రుల కంటే ఆమె మాటకే ఎక్కువ విలువ ఇస్తున్నట్టు అనిపిస్తే ? మొదట సహాయం కోసం వచ్చిన ఆ వ్యక్తి క్రమంగా కుటుంబంలోనే ఓ ముఖ్యమైన భాగంగా మారితే పరిస్థితి ఎలా ఉంటుంది ? ఇలాంటి సంఘర్షణనే కళ్ళకు కట్టినట్టుగా చూపించే సినిమా ‘అడ్కిట్టా’ (Adkitta). మరి ఈ సినిమా కథ ఏంటి ? బేబీ సిట్టర్ గా వచ్చినావిడ చేసిన పనేంటి ? సినిమా ఏ ఓటీటీలో ఉంది ? అనేది తెలుసుకుందాం.
గౌతమ్, కస్తూరి తమ కొడుకు అర్జున్ ను పెంచుకుంటూ ఉద్యోగం, కుటుంబ బాధ్యతలను బ్యాలెన్స్ చేసేందుకు ప్రయత్నిస్తుంటారు. ఇద్దరికీ పనులు ఉండటంతో పిల్లాడిని చూసుకోవడం కష్టంగా మారుతుంది. ఈ సమస్యకు పరిష్కారంగా మంగళ్ ను కేర్టేకర్గా ఇంట్లోకి తీసుకురావాలని నిర్ణయించుకుంటారు. మంగళ్ మొదట కుటుంబానికి అవసరమైన సహాయం మాత్రమే చేస్తుంది. అర్జున్ ను చూసుకోవడం, అతనితో సమయం గడపడం, అతడి అవసరాలు తీర్చడం… ఇలా రోజులు గడిచే కొద్దీ మంగళ్ కు అర్జున్ తో అనుబంధం పెరుగుతుంది.
అర్జున్ కూడా మంగళ్ తో బాగా కలిసిపోతాడు. తల్లిదండ్రులు తమ పనుల్లో బిజీగా ఉన్న సమయంలో మంగళ్ అతనితో ఎక్కువ సమయం గడపడంతో ఆమె అతని జీవితంలో ముఖ్యమైన వ్యక్తిగా మారుతుంది. మొదట ఈ అనుబంధాన్ని సహజంగానే తీసుకున్న గౌతమ్, కస్తూరికి క్రమంగా అసౌకర్యం మొదలవుతుంది. మంగళ్ కేవలం బేబీసిట్టర్ గా కాకుండా ఇంట్లోని విషయాలపై కూడా ప్రభావం చూపుతున్నట్టు అనిపిస్తుంది. అర్జున్ విషయంలో ఆమె మాటలకు ప్రాధాన్యం పెరుగుతుంది. దీంతో కస్తూరికి తన కొడుకుతో ఉన్న బంధం దూరమవుతున్నట్టుగా అనిపిస్తుంది. గౌతమ్ కూడా పరిస్థితిని అర్థం చేసుకునేందుకు ప్రయత్నిస్తాడు.
ఇదే సమయంలో ఇంట్లో కొన్ని అనుమానాస్పద సంఘటనలు జరగడంతో పరిస్థితి మరింత ఉద్రిక్తంగా మారుతుంది. మంగళ్ నిజంగా కుటుంబానికి సహాయం చేయడానికే వచ్చిందా ? లేక ఆమె ఉనికి వెనుక ఇంకేదైనా ఉందా ? అనే సందేహాలు మొదలవుతాయి. గౌతమ్, కస్తూరి ఏ నిర్ణయం తీసుకోవాలి ? అర్జున్పై మంగళ్ ప్రభావం ఎంత వరకు వెళ్లింది ? తమ కొడుకును కాపాడుకోవాలనే భయం చివరికి తల్లిదండ్రులను ఎలాంటి నిర్ణయం తీసుకునేలా చేస్తుంది ? అనే అంశాలతో సినిమా భావోద్వేగంగా సాగుతుంది. మరి అసలు కేర్ టేకర్ ఎందుకు పిల్లాడిని అలా ప్రభావితం చేసింది ? చివరికి తల్లి తన పిల్లాడిని సొంతం చేసుకుందా లేదా ? అనేది తెలియాలంటే సినిమాపై ఒక లుక్కేయండి.
సాయి తంహాంకర్, సిద్ధార్థ్ చాందేకర్, సఖీ గోఖలే నటించిన ఈ మరాఠీ ఫ్యామిలీ డ్రామాకు ఆశుతోష్ నిఖిల్ పరాండ్కర్ దర్శకత్వం వహించారు. సెప్టెంబర్ 11 నుంచి ZEE5లో స్ట్రీమింగ్ అవుతోంది. అధికారికంగా మరాఠీ ఆడియోలో అందుబాటులో ఉంది. తెలుగుతో పాటు ఇతర భాషలలో ఆడియో అవైలబుల్ గా లేదు.
Share
మచిలీపట్నంలో హోరెత్తిన వీఆర్ఏ జేఏసీ ధర్నా.. వారి డిమాండ్లు ఇవే!
భూమి మనదే.. కానీ అమ్ముకోలేం! 22Aపై జగదీశ్ రెడ్డి కీలక కామెంట్స్
