Maremma OTT Release : గ్రామదేవత జాతర అంటేనే పూజలు, సంప్రదాయాలు, ఊరంతా కలిసి జరుపుకునే సంబరాలు గుర్తుకొస్తాయి. కానీ ఓ గ్రామంలో పదేళ్లకోసారి జరిగే జాతరలో ఓ గేదెను బలి ఇవ్వడం ఆనవాయితీగా మారితే ? చిన్నప్పటి నుంచి ప్రేమగా పెంచుకున్న ఆ జంతువునే బలి కోసం ఎంపిక చేస్తే, దాన్ని పెంచిన యువకుడి మనసు ఎలా ఉంటుంది ? ఇలాంటి సంప్రదాయం ఒకవైపు, మూగ జీవితో అనుబంధం మరోవైపు… వంటి అంశాలతో తెరకెక్కిన తెలుగు రూరల్ యాక్షన్ డ్రామానే ‘Maremma’. మరి ‘మారెమ్మ’ కథ ఏంటి ? ఏ ఓటీటీలో తాజాగా స్ట్రీమింగ్ కి వచ్చింది ? అన్న వివరాల్లోకి వెళ్తే…
ఈ సినిమా కథ 1996లో వరంగల్ జిల్లాలోని మహిషాపురం అనే గ్రామంలో సాగుతుంది. గ్రామానికి మారెమ్మ అనే దేవతపై అపారమైన నమ్మకం ఉంటుంది. ప్రతి పదేళ్లకు ఒకసారి నిర్వహించే జాతరలో మాంసాహార బలి ఆచారంలో భాగంగా ఓ గేదెను ఎంపిక చేస్తారు. ఈసారి ఆ బాధ్యత కోసం మారి అనే గేదెను నిర్ణయిస్తారు. అయితే ఆ గేదె కేవలం బలి కోసం పెంచిన జంతువు కాదు. కర్ణి అనే యువకుడికి అది కుటుంబ సభ్యుడితో సమానం.
కర్ణి చిన్నప్పటి నుంచే మారిని ఎంతో ప్రేమగా పెంచుతాడు. దాని అవసరాలను చూసుకుంటూ, దానితో సమయం గడుపుతూ ఉంటాడు. తన జీవితంలో మారికి ఉన్న ప్రత్యేక స్థానాన్ని గ్రామంలోని వారందరూ అర్థం చేసుకోలేరు. కొందరికి అది జాతరలో భాగంగా జరిగే ఆచారం మాత్రమే. కానీ కర్ణికి మాత్రం మారిని బలి ఇవ్వడం అంటే తనకు ఎంతో దగ్గరైన జీవిని కోల్పోవడమే. ఈ పరిస్థితి అతడిని తీవ్రంగా కలచివేస్తుంది.
ఇదే సమయంలో కర్ణి జీవితంలో మంజు కూడా కీలకమైన వ్యక్తి. ఆమె అతడికి బంధువు మాత్రమే కాదు, అతడి మనసుకు దగ్గరైన యువతి కూడా. బి.ఎడ్. చదువుతున్న మంజు భవిష్యత్తుపై ఆశలు పెట్టుకుంటుంది. మరోవైపు గ్రామంలో రాజకీయ పలుకుబడి ఉన్న జలంధర్‌కు కర్ణిపై పాత కక్ష ఉంటుంది. ఈ ఇద్దరి మధ్య ఉన్న విభేదాలు కేవలం వ్యక్తిగత సమస్యలుగా ఉండకుండా, గ్రామంలో జరిగే పరిణామాలతో మరింత తీవ్రమవుతాయి.
జాతర సమయం దగ్గర పడుతున్న కొద్దీ గ్రామంలో ఉద్రిక్తత పెరుగుతుంది. అప్పుడు అనూహ్యంగా మారి కనిపించకుండా పోతుంది. గేదెను ఎవరు తీసుకెళ్లారు ? దాని వెనుక ఎవరి హస్తం ఉంది ? అంటూ ఊరంతా వెతుకుతారు. మారి కనిపించకపోవడంతో గ్రామస్తుల అనుమానం కర్ణిపై పడుతుంది. తనకు ఎంతో ఇష్టమైన గేదెను తానే దాచిపెట్టాడని కొందరు భావిస్తారు. మరోవైపు జలంధర్ కూడా మారి కోసం వెతకడం మొదలు పెడతాడు. ఇద్దరూ ఒకే గేదె కోసం వెతుకుతున్నప్పటికీ, వారి ఉద్దేశాలు మాత్రం ఒకటేనా అనే సందేహం కలుగుతుంది. మారి అదృశ్యం వెనుక ఉన్న నిజం ఏమిటి ? కర్ణి తనకు ఇష్టమైన మారిని కాపాడుకోగలడా ? అనే ప్రశ్నలకు సమాధానం కావాలంటే ఈ సినిమాను చూడాల్సిందే.
Also Read : కోహినూర్‌ను మించిన వజ్రం కోసం వేట… హంపి ట్రిప్ లో అదిరిపోయే ఛేజింగ్… బెంగాలీ అడ్వెంచర్ థ్రిల్లర్
‘మారెమ్మ’ మూవీలో మాధవ్ భూపతిరాజు, దీపా బాలు, వికాస్ వశిష్ట, వినోద్ కుమార్ తదితరులు ప్రధాన పాత్రల్లో నటించారు. మంచాల నాగరాజు దర్శకత్వం వహించగా, ప్రశాంత్ ఆర్. విహారి సంగీతం అందించారు. ఈ చిత్రం 2026 సెప్టెంబర్ 10న థియేటర్లలో విడుదలైంది. గ్రామీణ నేపథ్యం, స్థానిక సంప్రదాయాలు, మనుషులకు జంతువులతో ఏర్పడే అనుబంధం, రాజకీయ కక్షలు వంటి అంశాలతో కథ సాగుతుంది. ఈ సినిమా ఆహా (Aha)ప్లాట్‌ఫామ్‌లో అందుబాటులోకి వచ్చింది. అక్టోబర్ 9 నుంచి స్ట్రీమింగ్ అవుతోంది.
Share
హోమ్ ఎంటర్‌టైన్‌మెంట్ నెక్స్ట్ లెవెల్..తక్కువ ధరలో భారీ స్క్రీన్
‘నేను బాగానే ఉన్నా’ అన్న ప్రతీసారీ నమ్మకండి.. పిల్లల ఆ ప్రవర్తన వెనుక పెద్ద రహస్యమే ఉంది!
