Telugu Supernatural Thriller: ఓ రాజవంశంలో పుట్టిన మగవాళ్లు 33 ఏళ్లు దాటితే బతకరనే భయంకరమైన నమ్మకం… దాదాపు 200 ఏళ్లుగా అదే కుటుంబాన్ని వెంటాడుతున్న మరణాలు… అసలు ఇది వారాహి అమ్మవారి శాపమా ? లేక ఎవరో కావాలనే సృష్టిస్తున్న కుట్రా ? ఈ మిస్టరీ చుట్టూ తిరిగే తెలుగు డివోషనల్ థ్రిల్లర్ ‘మహేంద్రగిరి వారాహి’ (Mahendragiri Varahi). సుమంత్ ప్రధాన పాత్రలో నటించిన ఈ సినిమా ఇప్పుడు ఓటీటీలోకి వచ్చింది. మరి 33 ఏళ్లకే జరిగే మరణాల వెనుక ఉన్న అసలు రహస్యం ఏంటి ? ఈ సినిమా ఎక్కడ స్ట్రీమింగ్ అవుతోంది ? అంటే…
మహేంద్రగిరి ప్రాంతంలో వారాహి అమ్మవారి ఆలయంతో పాటు అక్కడి రాజవంశానికి కూడా ఓ ప్రత్యేకమైన చరిత్ర ఉంటుంది. ఆ రాజకుటుంబంపై వారాహి అమ్మవారి శాపం ఉందనే నమ్మకం తరతరాలుగా కొనసాగుతుంటుంది. ముఖ్యంగా ఆ కుటుంబానికి చెందిన మగవాళ్లు 33 ఏళ్లు దాటకముందే అనూహ్యంగా చనిపోతుంటారు. ఈ మరణాలు ఒక్కోసారి ప్రమాదాల్లా కనిపించినా, వాటి వెనుక ఏదో తెలియని శక్తి ఉందనే భయం కుటుంబంలో బలంగా ఉంటుంది.
ఇలాంటి పరిస్థితుల్లో రాజేంద్ర వర్మ 33వ పుట్టినరోజు నాడే అనుమానాస్పదంగా చనిపోతాడు. ఈ ఘటన ఆ కుటుంబంలో ఉన్న పాత భయాన్ని మరోసారి బయటకు తీసుకొస్తుంది. అదే సమయంలో సిద్ధార్థ్ అనే యూట్యూబర్ మూఢనమ్మకాలను, వాటి వెనుక ఉన్న నిజాలను బయటపెట్టే ప్రయత్నం చేస్తుంటాడు. దేవుడి పేరుతో జరిగే మోసాలు, భయాలను ఉపయోగించుకుని ప్రజలను నమ్మించే విధానాలపై అతడు వీడియోలు చేస్తుంటాడు. అంటే దొంగ బాబాల గుట్టును బయట పెడతాడు.
అయితే సిద్ధార్థ్ జీవితంలోనే ఓ అనూహ్యమైన సంఘటన జరుగుతుంది. అతడి సోదరుడు రాజీవ్ కూడా అనుమానాస్పద పరిస్థితుల్లో మరణిస్తాడు. మరోవైపు రాజవంశానికి చెందిన నరేంద్ర వర్మ మరణం కూడా అనేక సందేహాలను రేకెత్తిస్తుంది. తన సోదరుడి మరణానికి, రాజకుటుంబానికి మధ్య ఏదైనా సంబంధం ఉందా ? అనే అనుమానం సిద్ధార్థ్‌లో మొదలవుతుంది. ఇక్కడి నుంచే కథ మిస్టరీ మోడ్ లోకి వెళ్తుంది.
ఆ రాజవంశంలోని పురుషులకు 33 ఏళ్లకే ఎందుకు మరణం సంభవిస్తోంది ? రాజీవ్ మరణానికి ఆ కుటుంబానికి ఉన్న సంబంధం ఏంటి ? 200 ఏళ్ల క్రితం మొదలైన ఈ శాపం వెనుక ఉన్న అసలు కథ ఏమిటి ? సిద్ధార్థ్ ఈ రహస్యాన్ని ఛేదించగలడా ? చివరికి ఇది నిజంగానే వారాహి అమ్మవారి శాపమని తేలుతుందా ? లేక అందరి నమ్మకాలను తలకిందులు చేసే మరో నిజం బయటపడుతుందా ? అనేది తెలుసుకోవాలంటే ఈ సినిమాపై ఒక లుక్కేయాల్సిందే.
సుమంత్ (Sumanth), ఐశ్వర్య రాజేష్ (Aishwarya Rajesh), సిద్ధు జొన్నలగడ్డ, వెన్నెల కిషోర్, బ్రహ్మానందం, రాజీవ్ కనకాల తదితరులు ప్రధాన పాత్రల్లో నటించిన ఈ సినిమాకు సంతోష్ జాగర్లపూడి (Santosh Jagarlapudi) దర్శకత్వం వహించారు. ‘మహేంద్రగిరి వారాహి’ అక్టోబర్ 2 నుంచి అమెజాన్ ప్రైమ్ వీడియో (Amazon Prime Video)లో స్ట్రీమింగ్ అవుతోంది. తెలుగుతో పాటు మలయాళం, హిందీ, తమిళ, కన్నడ భాషల్లో అందుబాటులో ఉంది.
Read Also: కోడి చుట్టూ తిరిగే కథ… చివర్లో వచ్చే ట్విస్ట్ ఊహించడం కష్టం… తెలుగులోనే స్ట్రీమింగ్
Share
110 ఇంచుల భారీ స్క్రీన్.. 6,000 నిట్స్ బ్రైట్‌నెస్.. హువావే కొత్త టీవీలు వచ్చేశాయ్!
గూగుల్‌లో ఈ విషయాలను అసలు వెతకొద్దు..సెర్చ్ చేస్తే నేరుగా జైలుకే!
