శాపగ్రస్తుడైన రాజ కుటుంబంలో జన్మ… ఫ్యామిలీ మొత్తాన్ని తుడిచిపెట్టేసే శాపం

Telugu Horror Thriller : ఓటీటీల్లో క్రైమ్ థ్రిల్లర్లు, హారర్ సినిమాలు చాలానే ఉంటాయి. కానీ పురాణాలు, సనాతన ధర్మంలోని రహస్యాలు, సూపర్‌నేచురల్ అంశాలను కలిపి తెరకెక్కించిన సినిమాలు మాత్రం చాలా అరుదుగా వస్తుంటాయి. అలాంటి డిఫరెంట్ కాన్సెప్ట్‌తో ప్రేక్షకుల ముందుకు వచ్చిన చిత్రమే ‘త్రికాల’ (Trikala – Script of God). మణి తెల్లగూటి దర్శకత్వంలో రూపొందిన ఈ తెలుగు సూపర్‌నేచురల్ థ్రిల్లర్‌లో అజయ్, శ్రద్ధా దాస్, మాస్టర్ మహేంద్రన్, సాహితి అవంచ ప్రధాన పాత్రలు పోషించారు. మిస్టరీ, పురాణ నేపథ్యం, థ్రిల్లింగ్ ఎలిమెంట్స్ ఇష్టపడే వారికి ఈ సినిమా మంచి ఛాయిస్‌గా నిలుస్తుంది.

కథలోకి వెళ్తే…

వైతరణ్ (అజయ్) తరతరాలుగా శాపానికి గురైన ఒక రాజవంశానికి వారసుడు. చిన్నప్పుడే తల్లిని కోల్పోయిన అతన్ని సవతి తల్లి ఎంతో ప్రేమగా పెంచుతుంది. కానీ అతను ఒక వింత, అంతుచిక్కని వ్యాధితో బాధపడుతూ ఉంటాడు. ఇదే సమయంలో తన ప్రేయసి నిధి కనిపించకుండా పోవడంతో ఆమె కోసం వెతుకుతూ శివ (మాస్టర్ మహేంద్రన్) కథలోకి వస్తాడు.

వైతరణ్ పరిస్థితిని అర్థం చేసుకోవడానికి సైకియాట్రిస్ట్ డాక్టర్ మాయ (శ్రద్ధా దాస్) రంగంలోకి దిగుతుంది. అయితే చికిత్స జరుగుతుండగానే వైతరణ్ తన సవతి తల్లిని హత్య చేసి, ఆ తర్వాత ఆత్మహత్య చేసుకుంటాడు. కానీ అతని మరణంతో కథ ముగియదు. అతని ఆత్మ ఆ పురాతన భవనాన్ని వెంటాడటం ప్రారంభిస్తుంది. అక్కడి నుంచి కథ మరింత ఉత్కంఠగా మారుతుంది.

ఒక్కో రహస్యం బయటపడుతున్న కొద్దీ రాజవంశాన్ని వెంటాడుతున్న శాపం వెనుక ఉన్న అసలు కారణం ఏమిటి? దైవిక శక్తి కలిగిన ‘శక్తి ఏత’ అనే ఆయుధం ప్రాధాన్యం ఏమిటి? పురాతన తాంత్రిక గ్రంథాల కోసం ఎవరు ప్రయత్నిస్తున్నారు? శివ తన ప్రేయసి నిధిని కనుగొన్నాడా? అనే ప్రశ్నలకు సమాధానమే సినిమా మిగతా కథ. చివరి వరకు సస్పెన్స్ కొనసాగుతూ క్లైమాక్స్‌లో కీలక రహస్యాలను బయటపెడుతుంది.

ఎందుకు చూడాలి?

సూపర్‌నేచురల్ థ్రిల్లర్లు, పురాణాల ఆధారంగా సాగే కథలు, మిస్టరీ ఎలిమెంట్స్ ఇష్టపడే వారికి ‘త్రికాల’ ఆసక్తికరమైన అనుభూతిని ఇస్తుంది. విజువల్స్, బ్యాక్‌గ్రౌండ్ స్కోర్, డార్క్ వాతావరణం సినిమాకు బలంగా నిలుస్తాయి. శ్రద్ధా దాస్, అజయ్, మాస్టర్ మహేంద్రన్ తమ పాత్రల్లో ఆకట్టుకునే ప్రయత్నం చేశారు. కమర్షియల్ హంగామా కంటే మిస్టరీ, పురాణం, సస్పెన్స్‌లను ఆస్వాదించే ప్రేక్షకులకు ఈ సినిమా మంచి ఎంపికగా చెప్పకోవచ్చు.

త్వరలోనే ఓటీటీలోకి

‘త్రికాల – స్క్రిప్ట్ ఆఫ్ గాడ్’ (Trikala: Script of God) 2026 మే 28న థియేటర్లలో విడుదలైంది. ఇది సూపర్‌నేచురల్ థ్రిల్లర్ జానర్‌లో తెరకెక్కిన తెలుగు చిత్రం. ప్రస్తుతం ఈ సినిమాకు సంబంధించిన ఓటీటీ డీల్ ఇంకా అధికారికంగా ప్రకటించలేదు. ఏ ఓటీటీ ప్లాట్‌ఫామ్‌లో స్ట్రీమ్ అవుతుందో, విడుదల తేదీ ఎప్పుడు అనేది మూవీ టీమ్ వెల్లడించాల్సి ఉంది. త్వరలోనే ఇది ఓటీటీలోకి వచ్చే అవకాశం ఉంది.