పెళ్లి రోజున కవల పిల్లల మొదటి ఫోటో షేర్ చేసి ఉపాసన ఎమోషనల్..

Ram Charan Twins: మెగా పవర్ స్టార్ రామ్ చరణ్, ఆయన సతీమణి ఉపాసన కొణిదెల తమ వైవాహిక బంధంలో మరో మధురమైన మైలురాయిని చేరుకున్నారు. తమ వివాహ వార్షికోత్సవాన్ని పురస్కరించుకుని ఈ స్టార్ కపుల్ అభిమానులకు ఒక అద్భుతమైన సర్‌ప్రైజ్ ఇచ్చారు. ఈ ఏడాది జన్మించిన తమ ముద్దుల కవల పిల్లలు– శివరామ్ కొణిదెల, అన్వీర దేవి కొణిదెలల మొదటి ముచ్చటైన ఫొటోను సోషల్ మీడియా వేదికగా పంచుకున్నారు.

ఈ ఫొటోలో కవల పిల్లల చిరు చేతులు ఎంతో క్యూట్‌గా కనిపిస్తున్నాయి. ఈ అపురూపమైన చిత్రాన్ని షేర్ చేస్తూ ఉపాసన కొణిదెల భావోద్వేగమైన నోట్ రాసుకొచ్చారు. “మా పిల్లలతో కలిసి ఈ ఏడాది పెళ్లి రోజును జరుపుకోవడం ఎంతో ప్రత్యేకంగా, మరింత ఆనందంగా ఉంది” అంటూ ఆమె తన సంతోషాన్ని వ్యక్తపరిచారు. ఈ పోస్ట్ ప్రస్తుతం నెట్టింట విపరీతంగా వైరల్ అవుతోంది.

పేర్ల వెనుక..

ఇటీవలే సాంప్రదాయ పద్ధతిలో నిర్వహించిన నామకరణ మహోత్సవంలో ఈ జంట తమ బాబుకు ‘శివరామ్’, పాపకు ‘అన్వీర దేవి’ అని నామకరణం చేశారు. ఈ పేర్ల వెనుక ఉన్న లోతైన అర్థాన్ని రామ్ చరణ్ గతంలో వివరించారు.

శివరామ్: ఈ పేరు శివుడు, శ్రీరాముడి ఆదర్శాలకు ప్రతీక. అంతేకాకుండా, రామ్ చరణ్ తండ్రి, మెగాస్టార్ చిరంజీవి అసలు పేరు (శివశంకర వరప్రసాద్) లోని ‘శివ’ను స్మరిస్తూ, కుటుంబ వారసత్వానికి గౌరవార్థంగా ఈ పేరును ఎంచుకున్నారు.

అన్వీర దేవి: ఈ పేరు అపారమైన ధైర్యాన్ని, దైవిక శక్తిని సూచిస్తుంది. ‘వీర’ అంటే ధైర్యం, దానికి ‘అన్’ చేర్చడం వల్ల అది అనంతమైన ధైర్యంగా మారుతుందని, శక్తితో పాటు సుగుణం కూడా కలిసి ఉండాలనే ఉద్దేశంతో ‘దేవి’ అని చేర్చినట్లు చరణ్ తెలిపారు.

పెళ్లి రోజు కానుకగా మెగా వారసుల ఫొటో బయటకు రావడంతో మెగా అభిమానులు, సినీ ప్రముఖులు సోషల్ మీడియా వేదికగా రామ్ చరణ్-ఉపాసన దంపతులకు వివాహ వార్షికోత్సవ శుభాకాంక్షలు తెలుపుతూ, పిల్లలపై దీవెనలు కురిపిస్తున్నారు. ఈ ఫొటో మెగా ఇంట మరింత పండగ వాతావరణాన్ని తీసుకువచ్చింది.